Laçının işğalından 17 il ötdü

RAMİZ CƏBRAYILOV: "LAÇIN TORPAĞINDAN HEÇ KİMƏ DƏHLİZ VERİLƏ BİLMƏZ"

LAÇIN rayonunun ermənilər tərəfindən işğalından 17 il ötdü. Dünən anım günü ilə bağlı Laçın rayon İcra Hakimiyyətinin əməkdaşları, Qarabağ Azadlıq Təşkilatının üzvləri və rayon ictimaiyyətinin nümayəndələri Şəhidlər Xiyabanını ziyarət etdilər. Laçın rayon İcra hakimiyyətinin başçısı Ramiz Cəbrayılov abidə kompleksinin önünə əklil qoydu.

Laçın rayonunun strateji əhəmiyyəti ilə bağlı danışan Ramiz Cəbrayılov işğala müxtəlif amillərin səbəb olduğunu bildirdi: "Laçının işğalından bizi 17 il ayırır. Amma hazırda da işğal günü gözlərimiz önündən kino lenti kimi keçir. Laçının işğal olunması səbəblərindən biri həmin dövrdə ölkə rəhbərliyinin yerində olmaması, vəzifənin millətin mənafeyindən yüksək tutulması oldu. Xalqa biganə münasibət, ordunun müxtəlif adamlara xidmət etməsi də Laçının itirilməsinə şərait yaratdı. Laçın Qarabağın yeganə qapısı idi. Həmin qapının əldən verilməsi ilə digər rayonların işğalı asanlaşdı". Dağlıq Qarabağda erməni icmasının təhlükəsizliyi üçün Laçın dəhlizinin Ermənistana verilməsi ilə bağlı düşmən tərəfin bəyanatlarına münasibət bildirən Ramiz Cəbrayılov bunu əsassız saydı: "Laçının ərazisindən heç kimə dəhliz verilə bilməz. Əminik ki, öz torpağımıza qayıdıb quruculuq işləri ilə məğul olacağıq. Ermənilər həmin əraziyə başqa yerlərdən əhali köçürə bilərlər, amma bu sonu olmayan bir işdir". Qeyd edək ki, 1835 kvadratkilometr ərazisi olan Laçın rayonu 1930-cu ildən inzibati ərazi vahidi kimi tanınıb. İşğal zamanı 63 min nəfərdən artıq əhalisi olan rayonun 121 kəndi olub. İşğal zamanı 300-dən artıq hərbi və mülki şəxs həlak olub və itkin düşüb. 8 950 bina, o cümlədən 7 sənaye və tikinti müəssisəsi, 471 xidmət idarəsi, yüzlərlə tarix-mədəniyyət abidəsi işğal altında qalıb. Erməni silahlı qüvvələrinin işğalı nəticəsində burada 30-dan artıq mədəniyyət və tarixi abidə dağıdılıb.

Xalid

Üç nöqtə.- 2009.- 19 may.- S. 6.