BDU-da Atatürkü anma - gənclik və idman bayramı qeyd olundu

HULUSİ KILIÇ: "ATATÜRKÜN ƏRMƏĞANINI QORUMAQ ÜÇÜN HƏR BİRİMİZ SƏYLƏ ÇALIŞMALIYIQ"

DÜNƏN Bakı Dövlət Universitetində Atatürkü anma və gənclik və idman bayramı qeyd olunub. Tədbiri giriş sözü ilə açan prorektor İsmayıl Əliyev universitetdə təhsil alan türkiyəli tələbələri bu bayram münasibətilə təbrik edib: "19 may 1919-cu ildən 90 il ötür. 19 may həm də Türkiyə Cümhuriyyətinin zəfər və qələbə bayramıdır. Çünki məhz, həmin ərəfədə türk xalqının ulu öndəri Mustafa Kamal Atatürkün hakimiyyətə gəlişi ilə Türkiyəni zəbt etmək istəyən qüvvələrin məkrli planlarının qarşısı alındı. Atatürk özü şəxsən inqilaba başçılıq etdi. Nəticədə dünyanın ən güclü dövlətlərindən olan böyük Türk Cümhuriyyətinin əsası qoyuldu. O vaxt düşmən gəmilərini görən Atatürk "gəldikləri kimi də gedərlər" demişdi. Ona "ordu yoxdur" dedilər, "yaranar" dedi, "pul yoxdur" dedilər, "tapılar" dedi, "düşmən çoxdur" dedilər, "məğlub olar" dedi" deyən İ.Əliyev Atatürkdən sitat gətirib və bildirib ki, Türkiyə həmişə Azərbaycanın yanında və onun ən yaxın müttəfiqi olub: "Bəzi qüvvələr müəyyən müddətə də olsa bu dostluğa zərbə vurmağa çalışsalar da, onların bu planı baş tutmadı. Baş nazir Rəcəb Tayyib Ərdoğanın səfəri də bu dostluğun yenilməz olduğunu bir daha sübut etdi". Türkiyənin ölkəmizdəki fövqəladə və səlahiyyətli səfiri Hulusi Kılıç isə öz çıxışında böyük Atatürk tərəfindən qurulan Cümhuriyyətin bir əmanət olduğunu və bu əmanəti qorumağın isə gənclərin ən ümdə vəzifəsi olduğunu vurğulayıb: "Atatürk kimi şəxsiyyətləri tarix hər yüz ildə bir dəfə yetişdirir. Belə şəxsiyyətlərdən biri də Türkiyənin taleyinə düşüb. Bu bayramı gənclərə o ərməğan edib. Bu ərməğanı qorumaq üçün hər birimiz səylə çalışmalıyıq. Cümhuriyyətin gələcək taleyi siz gənclərə tapşırılıb. Sizlər təhsil aldığınız və ondan sonrakı müddətdə də şərəf və ləyaqətlə türklüyə, türkçülüyə xidmət etməlisiniz. Yaşasın Türk dünyası, yaşasın Azərbaycan-Türkiyə dostluğu". Sonra Azərbaycan Texniki Universitetinin hazırladığı "Bu günlərə necə gəldik" mövzusunda sənədli film nümayiş olunub. Tədbirin sonunda Azərbaycan Rəssamlıq Akademiyasının təşkil etdiyi "Bir millət-iki dövlət" adlı rəsm sərgisinin açılışı münasibətilə səfirlik adından universitetin rektoruna diplom təqdim olunub.

Afaq

Üç nöqtə.- 2009.- 20 may.- S. 4.