"Azərsun Holdinq" ailəsi ənənəvi qanvermə aksiyası keçirdi

ABDULBARİ GÖZƏL: "AZƏRBAYCANA CANIMIZ VƏ QANIMIZLA XİDMƏT GÖSTƏRMƏKDƏN MƏMNUNUQ"

CƏMİYYƏTDƏ sosial problemlərin mövcudluğu, qohum nikahların olması, xəstəliklərin artması, xüsusilə qan xəstəliklərinin getdikcə uşaqlar arasında çoxalmasının qarşısını almaq üçün hər bir vətəndaş öz səyini fərdi və ya qrup şəklində olmaqla bu və digər formada göstərir. Qrup formasında qanvermə kampaniyasına qoşulan şirkətlərdən birincisi "Azərsun Holdinq" Şirkətlər Qrupudur.

Bu şirkət cəmiyyətdə mövcud olan bu və ya digər problemlərin həllində hər zaman təşəbbüskarlığı ilə fərqlənib. "Azərsun Holdinq"in planlarına qanvermə aksiyası da daxildir. Şirkət dünən ənənəsinə sadiq qalaraq, talassemiya xəstəliyindən əziyyət çəkən uşaqlara yardım məqsədi ilə Azərsun Holdinq Mədəniyyət Mərkəzində növbəti qanvermə aksiyası keçirdi. Xeyirxah kampaniyaya "Azərsun Holdinq"in tərkibində fəaliyyət göstərən bütün müəssisələrin 630-dan çox əməkdaşı qatıldı. Aksiyada iştirak edən şirkətin prezidenti Abdulbari Gözəl ilk növbədə bu aksiyanın əhəmiyyətindən danışdı və belə tədbirlərin hər il davam etdiriləcəyini vurğuladı. O, "Azərsun Holdinq" ailəsi olaraq Azərbaycana həm istehsal fəaliyyəti, həm də xeyriyyə tədbirləri ilə, bir sözlə, canı və qanı ilə xidmət göstərməkdən məmnunluğunu dilə gətirdi: "Mən bəzən rastlaşdığım insanlardan indiyə qədər nə yaxşılıq etdiyini soruşuram. Bəziləri belə deyir ki, mənim imkanım yaxşı olmayıb. Lakin düşünürəm ki, Allah bütün insanlara yaxşılıq etmələri üçün imkan verib. Bu, insanların qanları ilə başqasına həyat vermə imkanıdır. Bundan qiymətli heç nə yoxdur. Təşkil olunan bu aksiya, ehtiyacı olan insanlar üçün həyatı qədər vacib və önəmlidir. Belə aksiyaları şirkət rəhbəri olaraq mən hər zaman dəstəkləyəcəyəm və başqa şirkətlərə də bu xeyriyyə tədbirlərinə qoşulmağı məsləhət görürəm". Şirkət rəhbəri qeyd etdi ki, qanvermə kampaniyası holdinqin regionlarda fəaliyyət göstərən müəssisələrində də təşkil olunacaq. Apardığımız müşahidələr zamanı qanvermədən əvvəl və sonra qan verən şəxslərə yüksək səviyyədə tibbi yardım göstərildiyinin əyani şahidi olduq. Prosesi həyata keçirən Qanköçürmə İnstitutunun əməkdaşları ilə söhbətimizdə bildirildi ki, talassemiya irsi keçən qanazlığı xəstəliyidir. Bu xəstəliyə tutulmuş uşaq düzgün və vaxtında müalicə alarsa, sağlam həmyaşıdlarından heç nə ilə seçilmir. Aksiyada toplanan donor qanları Qanköçürmə İnstitutunun Qan Bankına təhvil verildi. Məlumat üçün bildirək ki, "Azərsun Holdinq" artıq 3-cü ildir ki, belə aksiya keçirir.

Əfsun

Üç nöqtə.- 2009.- 20 may.- S. 5.