Daha bir məscid bağlanır

YAQUT ƏLİYEVA: "SƏNƏDLƏRİ QAYDASINDA OLMAYAN MƏSCİDLƏRƏ XƏBƏRDARLIQ EDİLİR"

HACI İLQAR: "MƏSCİDLƏRLƏ BELƏ DAVRANMAQ - MİLLƏTİN MENTAL DƏYƏRLƏR KODUNU POZMAQ DEMƏKDİR"

SON vaxtlar paytaxtda bir neçə məscid bağlanıb. "Əbu-Bəkr" və "Şəhidlər" məscidlərinin bağlanmasından sonra indi də Bakı Dövlət Universitetinin tələbə yataqxanalarının yerləşdiyi ərazidəki "İlahiyyat camesi" bağlanmaq təhlükəsi ilə üzləşib. 1996-cı ildə Türkiyə Diyanət İşləri Vəqfi tərəfindən tikilən məscidin mayın 22-də cümə namazından sonra fəaliyyətini dayandıracağı bildirilir. Maraqlıdır ki, 13 ildir fəaliyyət göstərən məscidin birdən-birə qanunsuz tikildiyi meydana cıxıb.

Məsələyə münasibət bildirən Dini Qurumlarla İş üzrə Dövlət Komitəsinin mətbuat xidmətinin rəhbəri Yaqut Əliyeva məscidin sənədlərinin qaydasında olmadığını deyir: "Məscid rəhbərliyinə tövsiyə olunub ki, qeydiyyat sənədlərini qaydaya salsın. Hələlik məscidin bağlanması ilə bağlı heç bir söhbət yoxdur". Məscidin neçə illərdir fəaliyyət göstərməsinə baxmayaraq, nə üçün məhz indi xəbərdarlıq edilməsinə gəldikdə isə, Y.Əliyeva bunu qeydiyyat sənədləri ilə bağlı yenidən araşdırmaların aparılması ilə əlaqələndirdi: "Son 3 il müddətində məscidlərin və dini icmaların qeydiyyat məsələləri yenidən araşdırılır. Bu proses mütəmadi olaraq davam etdirilir və sənədləri qaydasında olmayan məscidlərə xəbərdarlıq edilir. Problemin indi daha çox gündəmə gəlməsi isə məncə, jurnalistlərin bu məsələyə daha həssas yanaşması ilə bağlıdır". Yasamal rayon İcra hakimiyyətinin başçısı İbrahim Mehdiyev "ANS Press"ə açıqlamasında məscidin bağlanması ilə bağlı rəsmi göstəriş olmadığını bildirib: "Məscidin bağlanması ilə bağlı məndə məlumat yoxdur. Həmin məscidə hər cümə günü 5-6 minə yaxın adam toplaşır. Bura toplaşanların əksəriyyəti isə "Əbu-Bəkr" və "Şəhidlər" məscidinə gedənlərdir. Belə ki, hər iki məscid fəaliyyət göstərmədiyindən insanlar əsasən bura gəlirlər". Məsələyə münasibət öyrənmək üçün Bakı Dövlət Universiteti ilə əlaqə saxlamağa çalışdıq. Universitetin mətbuat xidmətindən telefon zənglərimizə cavab verən olmadı. Universitetin rektoru Abel Məhərrəmovun köməkçisi də hadisədən xəbərsiz olduğunu dedi. Dini Etiqad və Vicdan Azadlıqlarının Müdafiə Mərkəzinin sədri Hacı İlqar məscidlərin bağlanılmasının düzgün olmadığını bildirdi: "Azərbaycan paytaxtında növbəti məscid bağlanır. Qəribə də olsa, bu məscid də qanunsuz tikili adlandırılıb. Bu hərəkətə qol qoyanlar fərqinə varırlarmı, "məscid" və "qanunsuz" ibarələrinin yanaşı işlədilməsi sağlam zəkaya, məntiqə, mənəvi dəyərlərə nə dərəcədə ziddir? Məscidlər - mənəviyyat mərkəzi, insanlara əbədi dəyərlərə məhəbbəti aşılayan bir məkandır. Məscidlərlə belə davranmaq - millətin mental dəyərlər kodunu pozmaq deməkdir". Hacı İlqarın qənaətinə görə, Bakının "İslam mədəniyyətinin paytaxtı" elan edildiyi vaxtda islamın başlıca simvolları olan məscidlərlə belə rəftar etmək absurddur: "Mənəvi, əxlaqi rəzilliyin toplumda baş alıb getdiyi, boşanmaların, intiharların adi statistikaya çevrildiyi bir şəraitdə mənəvi dəyərlərin, inanc mövzularının maarifçiliyinin genişləndirilməsi əvəzinə, bunun tam əksini görürük. Əgər iddia edilirsə ki, məscidin hansısa sənədləri qaydasında deyil, məscid fəaliyyətinə davam edə-edə bu sənədləri asanlqla sahmana salmaq olar".

Xalid

Üç nöqtə.- 2009.- 21 may.- S. 11.