Bir kəndin, bir nəslin

Azərbaycana bəxş etdiyi Qəhrəmanlar!

Vətən müharibəsinin ilk günündən bütün Azərbaycan xalqı kimi, Qubanın igid oğulları da Ali Baş Komandan cənab İlham Əliyevin çağırışı ilə səfərbər olub, ön cəbhədə savaşa atıldılar. Xaltan bələdiyyəsinin tərkibindəki Utuq kəndinin sakinlərindən olan Mövlanovlar ailəsinin isə üç təmsilçisi torpaqlarımızın azadlığı uğrunda gedən döyüşlərdə əsil qəhrəmanlıq göstərdilər. Azərbaycan Silahlı Qüvvələrinin polkovniki Nizami Bəydəmir oğlu Mövlanov 1976-cı ilin 16 oktyabrında Quba rayonunun Utuq kəndində anadan olub.

O, 1991-ci ildə Utuq kənd orta məktəbinin 7-ci sinfini bitirib Cəmşid Naxçıvanski adına İbtidai Hərbi məktəbə daxil olmuşdur. 1-ci Qarabağ savaşının iştirakçısı olan böyük qardaşı, o zaman kiçik gizir (indi polkovnik-leytenant) Tərlanın davamçısı olaraq vətəni qorumaq arzusu ilə yaşayan Nizami 1994-cü ildə orada təhsilini başa vurduqdan sonra Bakı Ali Birləşmiş Komandanlıq məktəbinə qəbul edilir. O, 1998-ci ildə buranı da bitirərək N saylı Hərbi hissədə leytenant rütbəsində hərbi xidmətə başlayır. 2015-ci ilin dekabrınadək müxtəlif hərbi hissələrdə yüksələn rütbələrlə fərqli vəzifələr daşıyan zabit N.Mövlanov, həmin vaxtdan 2018-ci ilin aprelinə kimi “Silahlı Qüvvələrin Təlim və Tədris Mərkəzin”ndə baş müəllim işləmişdir. Polkovnik 2019-cü ildən bəri ön cəbhədə müdafiə məqsədli əməliyyatlarda N saylı hərbi hissənin qərargah rəisi kimi iştirak edib və Vətən müharibəsinin ilk günündən hərbi birləşmə komandiri kimi döyüşlərə qatılıb. Yaralanmağına baxmayaraq son döyüşlərədək cəbhədə fədakarcasına vuruşub.

Xidmət etdiyi dövrdə 10-dan çox medal və 20-yə yaxın Fəxri Fərmanla təltif edilən, 2019-cu ildə “İgidliyə görə” medalına layiq görülən Nizami Mövlanov, Vətən müharibəsi Zəfərlə başa çatdıqdan sonra “Şuşanın azad olunmasına görə”, “Xocavəndin azad olunmasına görə”, “Füzulinin azad olunmasına görə” və “Cəbrayılın azad olunmasına görə” medalları ilə təltif olunub. Azərbaycanın ərazi bütövlüyünün bərpa edilməsində xüsusi xidmətlərinə və işğal olunmuş ərazilərin azad olunması zamanı düşmənin məhv edilməsi üzrə qarşıya qoyulmuş döyüş tapşırığını yerinə yetirən zaman göstərdiyi qəhrəmanlıq nümunəsinə, həmçinin hərbi qulluq vəzifəsini yerinə yetirən zaman igidlik və mərdlik nümayiş etdirdiyinə görə Azərbaycan Respublikasının Prezidenti cənab İlham Əliyevin 9 dekabr 2020-ci il tarixli Sərəncamına əsasən polkovnik Nizami Bəydəmir oğlu Mövlanova “Vətən Müharibəsi Qəhrəmanı” adı verilib. 7 il təhsil aldığı Utuq kənd orta məktəbində şərəfinə məxsusi tanıtım güşəsi qurulan və Zəfərdən sonra Qubaya qayıdışı böyük təntənə və fəxarətlə qarşılanan bir oğul atası Nizami komutanı Müzəffər Ordumuzun generalı kimi görmək əksəriyyətimizin arzusudur şəksiz.

Qəhrəmanın qardaşı, 2016-cı il Aprel döyüşlərinin qazisi və təltifçisi (“Vətən uğrunda” medalı) olan polkovnik-leytenant, birinci ordu korpusunun artilleriya rəisinin müavini Tərlan Mövlanov da 44 günlük 2-ci Qarabağ müharibəsində göstərdiyi igidliklərə və şücaətə görə “Azərbaycan Bayrağı” ordeni, “Ağdamın azad olunmasına görə” və “Suqovuşanın azad olunmasına görə” medalları ilə təltif olunub. Bəydəmir müəllimin ailəsində doğulub yetişən bu igidlərlə bütün Qubalılar, bütün Azərbaycan xalqı fəxr edir və qürur duyurlar!

C. Alpoğlu Albantürk

Unikal.- 2021.- 16 aprel.- S.19.