Vətən yolunda şəhid olan igid Əli

Əli Turac oğlu Quliyev 22 oktyabr 2001-ci ildə İran İslam Respublikasının müqəddəs Məşhəd şəhərində dünyaya göz açmışdır. 5-ci sinfə qədər Məşhəd şəhərində oxumuşdur. Bundan sonra o, ailəsi ilə birlikdə Masallı rayonunun Böyük Kolatan kəndinə, öz doğma kəndinə köçməli olur. Təhsilini Masallı rayon şəhid Simran Rzayev adına Böyük Kolatan kənd tam orta məktəbində davam etməyə başlayır. Orta təhsilini 2019-cu ildə başa vurduqdan sonra Vətənə olan borcunu yerinə yetirmək üçün Masallı rayon Hərbi komissarlığı tərəfindən həqiqi hərbi xidmətə çağırılır və Cocuq Mərcanlıda yerləşən "N" saylı hərbi hissəyə yola salınır.

27 sentyabr 2020-ci ildən etibarən başlayan və 44 gün davam edən II Qarabağ müharibəsində Füzuli və Xocavənd istiqamətində gedən şiddətli döyüşlərdə iştirak etmiş və düşmənin bir neçə postunun ələ keçirilməsində böyük şücaət göstərmişdir. Düşmənə ağır zərbələr endirən igid əsgər -Əli Quliyev oktyabr ayının 26-dan 27-nə keçən gecə düşmən gülləsinə tuş gələrək Azərbaycan Respublikasının ərazi bütövlüyü uğrunda qəhrəmancasına şəhid olur. Şəhidin nəşi 29 oktyabr tarixində böyüyüb, boya-başa çatdığı Masallı rayonunun Böyük Kolatan kəndinə gətirilir və orada torpağa tapşırılır.

Prezident İlham Əliyev Azərbaycan Respublikası Silahlı Qüvvələrinin hərbi qulluqçularının medallarla təltif edilməsi haqqında imzaladığı Sərəncama əsasən, Azərbaycan Respublikasının ərazi bütövlüyünün təmin edilməsi uğrunda döyüş əməliyyatlarında iştirak etmiş və hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirmiş Azərbaycan Respublikası Silahlı Qüvvələrinin hərbi qulluqçusu, şəhid əsgər Əli Turac oğlu Quliyev ölümündən sonra "Vətən uğrunda" və "Füzulinin azad olunmasına görə" medalları ilə təltif edilir. Allah rəhmət eləsin. Vətən sağ olsun!

Zəfər Orucoğlu

Unikal.- 2021.- 8 may.- S.18.