Ölümsüz həyat

Şəhid kapitan Vüsal Tahir oğlu Quliyev 44 günlük haqq savaşımızda Vətən, xalq yolunda özünü fəda etdiyinə görə əbədi bir ömür qazanıb. Bu, Vətən sevdalısı indi təkcə doğulub boya-başa çatdığı cənub mirvarisi Lənkəranın deyil, bütün Azərbaycanın qürur yeridir. Qərinələr keçəcək, gələcək nəsillərə də onun keçdiyi şərəfli həyat yolu örnək olacaq. Necə deyərlər, şəhidlər heç vaxt ölmür, səmada parlaq günəşə çevrilib mənən milyonların könlünə köç edirlər.

Ölümsüzlüyə qovuşan, ürəklərin əbədi sakini olan şəhid Vüsal Quliyev 39 yaşına qədəm qoydu. Lənkəran şəhər Heydər Əliyev Mərkəzində "Tariximiz qürurumuzdur" layihəsi çərçivəsində bu münasibətlə “Şəhidlər ölməz” adlı tədbir baş tutdu.

Lənkəran şəhər İcra Hakimiyyəti rəsmilərinin, şəhid ailələrinin , Qarabağ müharibəsi əlillərinin, veteranların, rayon ictimaiyyəti nümayəndələrinin, şəhidin təhsil aldığı Lənkəran şəhər Xarici Dillər Təmayüllü Gimnaziyasının müəllim və şagirdlərinin qatıldığı tədbirdə əvvəlcə Vüsal Quliyevin şəxsi əşya və fotolarından ibarət sərgiyə baxış oldu.

Azərbaycan Respublikasının Dövlət Himninin səslənməsi, ulu öndər Heydər Əliyevin və Vətən torpaqlarının azadlığı naminə şəhid olan qəhrəmanların xatirəsini bir dəqiqəlik sükutla yad etməklə tədbir başladı. Şəhid kapitanın həyat yolunu özündə yaşadan video çarxın nümayişindən sonra Lənkəran Şəhər İcra Hakimiyyəti başçısının müavini - İctimai-siyasi və humanitar məsələlər şöbəsinin müdiri Ülviyyə Əliyeva dedi:-Azərbaycan Prezidenti cənab İlham Əliyevin və rəşadətli ordumuzun qətiyyəti sayəsində 44 günə əzəli yurd yerimiz, 30 il əsarətdə olun Qarabağımız düşmən işğalından azad edildi. Qazanılan möhtəşəm zəfər sayəsində həm də ölkəmizin həyatında yeni mərhələnin və inkişaf dövrünün əsası qoyuldu.

Digər natiqlər bildirdilər ki, Vüsal bizim fəxrimizdir. Onun ömür yolu nə qədər qısa olsa da, o, gələcək nəsillər üçün bir şərəfli tarix yazıb. Vətənpərvərlik, cəsurluq, igidlik, mərdlik məktəbidir Vüsalın keçdiyi yol. Belə ölümsüzlüyə qovuşan qəhrəmanları yad etmək, xatirəsini əziz tutmaq hər bir azərbaycanlının ən müqəddəs borcudur. Vüsalın axıtdığı qanla Qarabağımız canlanır, Vətən yaşayır.

Aşağı-Nüvədi kənd Sənətkarlıq Evinin müdiri Vüsal Bağırov Azərbaycan Yazıçılar Birliyinin üzvü, "Payızın 44 anı" kitabının müəlliflərindən biri, şairə Xatirə Xatunun sözlərinə yazılan və musiqisini Zəminə Tariyel qızı bəstələyən Vüsal Quliyevə həsr olunan mahnını ifa etdi. Məktəblilərin, eləcə şəhidin Vətənə əmanət qoyduğu övladlarının ifasında səslənən şerlər tədbirə özgə ovqat qatdı. Həmçinin Heydər Əliyev Mərkəzinin baş fond mühafizi Aygün Əkbərova çıxışında ürəkləri riqqətə gətirən sözlər dedi və şəhidin anasına yağlı boya ilə çəkilmiş Vüsalın portretini təqdim etdi.

Şəhidin ailə üzvləri dövlətimiz tərəfindən şəhid ailələrinə göstərilən diqqət və qayğıya görə ölkə rəhbəri İlham Əliyevə və Birinci vitse-prezident Mehriban xanım Əliyevaya minnətdarlığını bildirdilər, tədbirin təşkilində əməyi olan hər bir kəsə təşəkkür etdilər.

Uşaqlıqdan Vətənə sevgi, düşmənə nifrət ruhunda böyüyən Vüsal Quliyev həyatını hərbiyə bağlayıb. Belə ki, orta təhsilini Lənkəran şəhər Xarici Dillər Təmayüllü Gimnaziyada alıb, Heydər Əliyev Ali Hərbi Məktəbinə daxil olub. 2007-ci ildə oranı leytenant kimi bitirib Gəncə, Ağstafa, Ağcabədi, Beyləqan, Goran və Tərtərdə yerləşən hərbi hissələrdə Vətənə oğulluq borcunu şərəflə, ləyaqətlə yerinə yetirib. Hərbin sirlərinə mükəmməl yiyələnib, hər an işğalçı düşməndən qisas alacağı günü gözləyib. 2020-ci ilin 27 sentyabrda arzuladığı məqam yetişib. Vüsal ilik gündən kapitan rütbəsində ön cəbhəyə yollanıb, Vətən torpaqlarının azadlığı naminə özünü odun-alovun içinə atıb. Tərtər rayonu, Suqovuşan kəndində gedən ağır müharibə meydanında düşmənə qarşı son nəfəsə qədər döyüşüb şəhidlik zirvəsinə ucalıb.

Ölümündən sonra 3-cü dərəcəli “Rəşadət” ordeninə, “İgidliyə görə” “Vətən uğrunda” və Füzulinin, Qubadlının azadlığına görə medallarına layiq görülüb. Otuz beş yaşında əbədiyyət adlı dünyasına qovuşan Vüsal xalqına iki qız, bir oğlan əmanət qoyub. Övladları da onun kimi Vətənpərvər böyüyürlər...

Zəfər Orucoğlu,

Azərbaycan Jurnalistlər Birliyinin üzvü

Unikal.- 2024.- 5 iyul, №23.- S.13.