VƏTƏNƏ BAĞLI QƏHRƏMAN

Birinci Qarabağ müharibəsində Vətən, torpaq naminə can qoyub şəhidlik zirvəsinə ucalan Elşad Saday oğlu Əhədov Masallının Təzə Alvadı kəndində boya-başa çatıb. Bu dünyada yaşamağı cəmi 25 il çəkdi. Qaldı ki, elə bir qəhrəmanlıq göstərdi ki, bununla ölməzliyə qovuşdu Elşad. İndi onun şərəfli ömür yolu örnək olaraq dillərdən düşmür. Masallı camaatı hər yerdə, hər dəfə öz qəhrəman oğlunun adını böyük qürurla, iftixarla çəkir.

Canında, qanında Vətən sevgisi olan Elşad 1982-ci ildə doğma kənd məktəbində yeddinci sinfi bitirib C. Naxçıvanski adına Hərbi liseyə daxil olub. Burada təhsil aldığı illərdə vətənpərvərliyi, yüksək nizam-intizamı, seçdiyi peşəyə sonsuz sədaqəti ona yalnız hörmət qazandırıb. Liseydən sonra hərbiçı sənətini daha mükəmməl öyrənmək üçün Ukrayna respublikasına gedib və Ali Komandirlər Məktəbində oxuyub.1989-cu ildə baş leytenant rütbəsi ilə Volqoqrad vilayətindəki hərbi hissələrdən birinə rota komandiri göndərilib. Erməni dığalarının Qarabağımıza təcavüzü zamanı Vətənin şərəfini qorumaq istəyi gənc zabit bir müddətdən sonra doğma Azərbaycana gətirib. Elşad əvvəlcə Bakının Güzdək qəsəbəsində, sonra isə Lənkəran rayonunda rota komandiri kimi fəaliyyət göstərib.

Qaldı ki, Qarabağda tez-tez yağ tərəfindən baş verən qanlı hadisələr Elşadı çox narahat edib. Vətənin belə bir ağır günündə o, öz yerini döyüşən cəbhə bölgəsində görüb. Gənc zabit ilk döyüşə Füzuli rayonu ərazisindən başlayıb. Əlində silah daha sonra Nərgiz təpə, Aşağı Veysəlli və Şiş qayda düşmənə layiqli cavab verib. Beyləqanın müdafıəsində isə Elşad sözün əsl mənasında tarix yazıb. Onun minaladığı sahəyə 8 düşmən tankı və onlarla erməni yaraqlısı düşərək məhv olub. Göstərdiyi hünər zabitləri, əsgərləri heyran qoyub.

Elşad Əhədov öz rotası ilə növbəti döyüş əməliyyatına 11 dekabr 1993-cü ildə Ağdaş yüksəkliyində girib. Sayca iki dəfə çox olan erməni quldurları hücumun qarşısını almaq üçün güclü sədd yaradıblar. Qeyri-bərabər döyüşdə o, ağır yaralanıb. Həkimlərin cidd-cəhdinə baxmayaraq, komandirin həyatını xilas etmək mümkün olmayıb. Həmin günü onun Vətən eşqli ürəyi əbədi dayanıb. Bununla əsl qəhrəman olduğunu torpaq uğrunda axıtdığı qani ilə möhürləyib.

Sinəsini Vətəni üçün sipər edən Elşad Saday oğlu Əhədov ölümündən sonra Azərbaycan Respublikası Prezidentinin 14 dekabr 1993-cü il tarixli fərmanı ilə “Azərbaycan Bayrağı” ordeninə və 16 sentyabr 1994-cü il tarixli 203 saylı fərmanı ilə “Azərbaycanın Milli Qəhrəmanı” adına layiq görülüb. Doğma Alvadı kəndində torpağa tapşırılan qəhrəmanın adına rayonda orta məktəb, parkı vardır. Bizə yadigar qoyduğu iki övladı da ataların adını həmişə uca tuturlar.

Zəfər ORUCOĞLU,

Azərbaycan Jurnalistlər Birliyinin üzvü

Unikal.- 2025.- 10 yanvar, №1.- S.13.