Vətəni canından artıq sevən Fərid

Vətən, torpaq sevgisi Fərid Quliyevin canına, qanına ana südü ilə birgə hopmuşdu. Odur ki, 44 günlük haqq savaşımızda doğma Azərbaycanın bütövlüyü uğrunda sinəsini sipər etməyi bacardı. Özü şəhid olsa da, Vətəni canı, qanı bahasına alınmaz qalaya çevirdi. Bu hünərlə Fəridin ömrü qısa oldu, amma torpağına, elinə-obasına məhəbbət mücəssəməsinə döndü, şərəfli həyatı əsl qəhrəmanlıq məktəbi kimi tarixə yazıldı.Ölümsüzlüyə qovuşan qəhrəmanımız həm də dövlət tərəfindən “Döyüşdə fərqlənməyə görə”, “Vətən uğrunda”, “Xocavəndin azad olunmasına görə” medallarına layiq görülüb.

Fərid Ayazxan oğlu Quliyev 1994-cü ildə Cəlilabad rayonu, Babalı kəndində dünyaya göz açıb. Təmiz, müqəddəs bir ailə ocağında boy atıb müstəqil həyata qədəm qoyan Fəridin yaxşı işləri, xeyirxah əməlləri tez də ona hörmət, nüfuz qazandırır. Vətən eşqi, el sevdası qəlbinə hakim kəsilmiş gənc bir qayda olaraq erməni dığaların Qarabağımızın işğalına qarşı barışmaz mövqe ortaya qoyur. Odur ki, əsgərlik yaşı çatanda yağıdan qisas almaq məqsədilə 2012-ci ildə ordu sıralarına böyük həvəslə yola düşür. Cəbhə bölgəsində xidmət etməklə Vətəni göz-bəbəyi kimi qoruyur. Köksündə əsl qəhrəman ürəyi döyünən Fərid komandirlərin, əsgərlərin sevimlisi olur.

Fərid əsgərlik həyatını üzüağ başa vurur. Amma müqəddəs Qarabağımızın düşmən tapdağında qalması ona rahatlıq vermir. Qeyrət qanı coşan Vətən sevdalısı 2019-cu ilin oktyabr ayında Dövlət Sərhəd Xidmətinə yazılır. İlkin hazırlıq kursunu keçdikdən sonra 13.03.2020-ci il tarixdən xidmətini davam etdirmək üçün Sərhəd Qoşunlarının Xudat sərhəd dəstəsinə göndərilir. Fərid xidmətini kəşfiyyatçı kimi davam etdirmək istəyirdi. Odur ki, arzusu nəzərə alınır. Qazax əlahiddə sərhəd diviziyasında nümunəvi xidmət etməklə bərabər, həm də hər an işğalçı düşməndən Vətən torpaqlarının qisasını alacağı günü gözləyir. Məqsədinə nail olmaq üçün hərbi təlimlərdə həvəslə iştirak etməklə bütün sınaqlardan uğurla keçir. Həmçinin Ermənistanla bilavasitə həmsərhəd ərazilərdə xidmət çətin olsa da, bir o qədər Fərid bununla qürur duyur və öz vəzifələrinin öhdəsindən layiqincə gəlir...

Sentyabrın 27-də 44 günlük haqq savaşımız başlayanda kiçik gizir Fərid Quliyev birbaşa odun-alovun içinə atılır. SinəsiniVətənə sipər edib məkrli düşmənin kabusuna çevrilir. Əsl qəhrəman olduğunu isə döyüş meydanında erməni dığalarına qan uddurmaqla bildirir. Xocavənd rayonu ərazisində iştirak etdiyi bir-neçə ölüm-dirim savaşında çoxlu sayda dığanı, onların texnikasını məhv edir.

Lakin onun döyüş yolu qısa oldu, o, böyük Zəfəri görə bilmədi. 9 oktyabrda Hadrutda gedən ağır müharibə meydanında qəfil atılan yağı gülləsinə tuş gəlir və 26 yaşlı Fəridin döyünən ürəyi əbədi olaraq dayanır.

Zəfər ORUCOĞLU

Azərbaycan Jurnalistlər Birliyinin üzvü

Unikal.- 2025.- 24 yanvar, №3.- S.13.