Qəbələ rayonunun turizm potensialı

Bununla bağlı info-tur keçirilib

Mədəniyyət və Turizm Nazirliyinin dəstəyi və "Gilan-Turizm" MMC-nin təşkilatçılığı ilə Qəbələ rayonunun turizm potensialının təqdimatı ilə bağlı info-tur keçirilib. APA-nın Qəbələyə ezam olunmuş müxbirinin məlumatına görə, yerli və xarici turizm şirkətlərinin Qəbələdəki otel və sanatoriyalarla yaxından tanış olması, onlar arasında əlaqələrin qurulması, xidmətlərin nümayiş etdirilməsi, eləcə də daxili turizmin effektli və davamlı inkişaf etdirilməsi məqsədilə keçirilən info-turun ilk günü "Gilan Holdinq" MMC-nin "Qafqaz Riverside" Hotelinin təqdimatı olub. Tədbirdə 50-yə yaxın yerli, eləcə də xarici turizm şirkətinin, 15-ə yaxın KİV-in nümayəndəsi iştirak edib. Mədəniyyət və Turizm Nazirliyinin turizm şöbəsinin turizmin inkişafı sektorunun əməkdaşı Cəfər Qarayev bildirib ki, tədbirin keçirilməsi Qəbələ rayonunda fəaliyyət göstərən mehmanxana və mehmanxana tipli obyektləri turizm şirkətləri ilə yaxından tanış etmək, gələcəkdə daxili və xarici turistlərin rayonda qəbul olunması üçün operativ və keyfiyyətli iş fəaliyyəti göstərmək məqsədi daşıyır. "Qafqaz Riverside" otelinin baş administratoru Süleyman Məmmədovun sözlərinə görə, bu tip info-tur bir dəfə nəzərdə tutulub: "Həm xarici, həm də yerli turistlərin qısa bir zamanda otelimizə maraq göstərməsi əldə olunan uğurlardan biridir. "Gilan-Turizm" olaraq biz turizm sahəsində böyük işlər görmüş qardaş Türkiyədən peşəkar otelçi heyəti dəvət etmişik. Onlar vaxtaşırı keçirdikləri treninqlərdə burada xidmət səviyyəsinin dünya standartlarına çatdırılmasına çalışırlar".

Otel rəsmisinin sözlərinə görə, oteldə hazırda 350 işçi heyəti fəaliyyət göstərir. Beş ulduzlu mehmanxananın 16 hektar ərazisi, yüksək standartlara cavab verən 123 nömrəsi və 38 kotteci var. Hoteldə restoran, konfrans zalları, sağlamlıq mərkəzi, sauna, üzgüçülük hovuzu, idman zalı fəaliyyət göstərir. Təqdimatda eləcə də "Gilan-Turizm" MMC Qəbələdə mədəni turizm, ekoloji turizm və kənd yaşıl turizmin inkişafı sahəsində görülən işlərdən, qazanılan uğurlardan, gələcəkdə nəzərdə tutulan tədbirlərdən bəhs edilib.

Qəbələ rayon Mədəniyyət və turizm şöbəsinin müdiri Nargilə Qafarova turizm sahəsində Qəbələdə son illər çoxsaylı işlər görüldüyünü diqqətə çatdırıb və bunun da turist axınına səbəb olduğunu qeyd edib: "Digər bölgələrlə yanaşı, Qəbələdə də turizmin inkişafına çox böyük diqqət yetirilir. Yaxın zamanlarda yəqin ki, yalnız yay mövsümü deyil, qış mövsümündə də daxili və xarici turistləri qəbul edəcəyik. Son 6 ay ərzində Qəbələyə 20 minə yaxın turist gəlib. Onların 5 mini xarici turistlər olub".

Tədbirin proqramına uyğun olaraq həmin gün Şou-proqram keçirilib. Bundan əlavə Mədəniyyət və Turizm Nazirliyinin işçiləri, turizm şirkətlərinin və KİV nümayəndələri iki gün ərzində rayonda fəaliyyət göstərən mehmanxana və sanatoriyalar, eləcə də Qəbələ Tarix Diyarşünaslıq Muzeyi və "Cümə" məscidi ilə də tanış olublar.

Qeyd edək ki, son illər Qəbələ sürətlə inkişaf etməkdədir. Şəhərin bütün infrastrukturu müasir Avropa standartlarına uyğun yenidən qurulub. Qəbələ tarixi şöhrətini və əhəmiyyətini özünə qaytarmaqla ölkənin şimal paytaxtına çevrilməkdədir. Rayonun fisunkar təbiəti, təbii resursları, insan potensialı və qonaqpərvərliyi, habelə son illər yatırılan investisiyalar buranı gözəl bir məkana çevirib. Hətta bu ilin martında Qəbələdə olan "Kurtlar Vadisi" serialının qəhrəmanları şəhərin gözləlliklərindən heyran olduqlarını dilə gətirmişdilər. "Kurtlar Vadisi Pusu"nun baş rolunun (Polat Alemdar) ifaçısı Necati Şaşmaz xarici turistləri Qəbələyə çağırmışdı: "Biz Qəbələdə tam bir cənnətin içinə düşdük. Qəbələ cənnətin özüdür".

Qəbələdə turizm istirahət kompleksləri müxtəlif və rəngarəngdir. Rayonda kasıblar da istirahət edə bilər, milyonçular da. Belə ki, burada bir günlük istirahətin qiyməti yerindən və xidmətlərin səviyyəsindən asılı olaraq 20 manatdan 500 manata qədər dəyişir. Hərə öz cibinin imkanlarına uyğun məkan seçə bilər. Hətta şəxsi maşını olanlar üçün dağlıq ərazilərə səyahət də mümkündür. İldən-ilə Qəbələdə yeni, müasir, dünya standartlarına uyğun turizm obyektləri açılır. Yeni layihələr əsasında kurortların tikintisi, dağlara turların təşkili və digər xidmətlər nəzərədə tutulur. Ayrı-ayrı layihələrə milyonlarla sərmayə yatırılır. Qəbələnin turizm xidmətləri sahəsində böyük potensialı var. Hökumət də qeyri-neft sektorunda prioritet sahələrdən biri kimi turizmi seçib. Azərbaycan regionlarda turizm xidmətini və bu sahədə sahibkarlığı inkişaf etdirməklə böyük gəlir əldə edə bilər. Hökumət turizmlə bağlı proqnozlarda optimistdir - turizm sahəsində artım müşahidə olunur. Dünya İqtisadi Forumu (DİF) tərəfindən turizm, aviadaşımalar və səyahətlər biznesinin inkişafı üzrə hesablanan rəqabətlilik reytinqində də Azərbaycan ötən il 133 dövlət arasında Ukrayna ilə birlikdə 76-77-ci yerləri tutub. Azərbaycan sözügedən reytinqdə mövqeyini 3 pillə yaxşılaşdırıb. Bu zaman turizm biznesinin inkişafı üzrə Azərbaycana verilən xüsusi indeks (Travel & Tourism Competitiveness Index - TTCİ) göstəricisi 3,84 təşkil edib. Ən yüksək turizm indeksi (5,68) alaraq siyahıda liderlik edən İsveçrə olub. Asiya qitəsi ölkələri arasında Azərbaycan daha yüksək yerlərdədir. MDB ölkələri arasında isə Azərbaycan Rusiya və Gürcüstandan sonra 3-cü nəticə göstərib. Bu zaman turizm sahəsində qanunvericiliyin keyfiyyəti subindeksinə görə ölkəmiz 47-ci yerdədir. Qeyd edək ki, turizm sahəsində rəqabətlilik reytinqi və TTCİ indeksinin hesablanması zamanı ölkədə turizm infrastrukturu və qanunvericiliklə bərabər səyahətlərlə bağlı şirkətlərdə olan işçilərin sayı, təbiətin mühafizəsi, bankomat və POS-terminallar şəbəkəsinin genişliyi, mehmanxana və nəqliyyatda olan tariflər, sanitar-epidemioloji mühit, turistlərin təhlükəsizliyi, vizaların verilməsi qaydaları, eləcə də yanacaq qiymətləri, yol-nəqliyyat hadisələrinin sayı, suvenir istehsalı, tibbi sığorta sisteminin tətbiqi, stadion və idman mərkəzlərinin vəziyyəti, İnternet və mobil rabitə şəbəkələrindən istifadə edənlərin sayı və 70 yaxın digər amil nəzərə alınır.

Mahir

Xalq Cəbhəsi.- 2010.- 10 avqust.- S.12.