İctimai Televiziyanın 5 yaşı tamam olur

Əkbər Qoşalı: "Türklük ruhunun, Azərbaycançılıq məfkurəsinin mahiyyətinin açılmasında bu televiziyanın müstəsna xidmətləri var"

Mehriban Zeynalova: "İctimai Televiziya milli-mənəvi dəyərlərin təbliğində özünü doğruldub"

Ədalət Əsgəroğlu: "İctimai TV 5 il ərzində öz funksiyanı layiqincə yerinə yetirib"

Avqustun 29-da İctimai Telviziyanın yaradılmasının 5 ili tamam olur. Ötən 5 il ərzində telekanal Azərbaycan teleməkanında özünəməxsus yer tutub və yarandığı gündən ölkəmizdə informasiyalı cəmiyyətin qurulmasına yaxından köməklik göstərir. Azərbaycanın tarixi, coğrafiyası, milli mənəvi dəyərləri, adət-ənənələri, Ermənistan-Azərbaycan, Dağlıq Qarabağ problemi, torpaqlarımızın işğal tarixi eləcə də dünyada baş verən ictimai-siyasi proseslər, iqtisadi dəyişikliklər İctimai Televiziyanın fəaliyyətində prioritet təşkil edən əsas mövzulardan olub. İctimai TV-də Azərbaycan aşıq yaradıcılığına, saz-söz sənətinə, muğama geniş yer verilir, dəyərlərimiz ürəkaçan şəkildə təbliğ olunur və buna görə də gənclərimizin daha çox bu sənətlərə meyl göstərmələrinin şahidi oluruq. Bundan başqa İctimai Televiziya Türkiyə telekanalı olan "TRT-Avaz"la birgə layihə həyata keçirir ki, bu da Azərbaycan tarixi, Azərbaycan həqiqətlərini dünyaya çatdırmaqda müstəsna xidmətlər göstərir. Telekanalın sırf milliliyə xidmət etməsi, dəyərlərimizə hörmətlə yanaşması bu televiziyanın uğur əldə etməsinə daha çox zəmin yaradıb ki, bu uğuru da yüksək qiymətləndirməmək olmaz. Televiziyanın fəaliyyətini yüksək qiymətləndirən tanınmış tamaşaçılar yüksək səviyyəli verlişlərin sayının artırılmasının tərəfdarıdırlar və onların konkret təklifləri də var.

Dünya Gənc Türk Yazarlar Birliyinin sədri Əkbər Qoşalının sözlərinə görə, İctimai Televiziya və radio haqqında danışarkən ilk növbədə milli siması olan bir telekanal göz önünə gəlir: "Hesab edirəm ki, 5 yaşlı təsisat üçün bu çox böyük uğurdur. Telekanal adına uyğun olaraq ictimaiyyətin fikrini, hissini ekrana yansıtmaq missiyasını daşıyır və bu mənada da özünü doğruldub. Türklük ruhunun, Azərbaycanlılıq məfkurəsinin mahiyyətinin açılmasında bu televiziyanın müstəsna xidmətləri var. Xüsusi olaraq qeyd etmək lazımdır ki, aşıq musiqisinə, ozan dünyasına bu telekanalda ayrıca diqqət yetrilir və efir vaxtı ayrılır". İctimai televiziyada görmək istədiyi verilişlərin əsasının qoyulduğunu qeyd edən Əkbər Qoşalı öz təkliflərini də irəli sürdü: "Yaxşı olardı ki, telekanalda QHT-lərə, xüsusilə də yaradıcı təşkilatlara onların fəaliyyəti ilə bağlı daha geniş imkan tanınsın. Bundan başqa, efirdə digər sənət və peşə sahibləri ilə birgə yeni nəsil yaradıcı insanlar içərisində şairlərin, yazıçıların öz fikir və istəklərini, yaradıcılıq məhsullarını ictimaiyyətlə bölüşməsinə vaxt ayrılsa, "Səhər Ovqatı" proqramında və bu kimi verilişlərdə yaşlı nəslin nümayəndələri ilə yanaşı, yeni nəslin nümayəndələri də görünsə yaxşı olardı. Bütün bu fikirlərin yekunu olaraq mən fürsətdən istifadə edib İctimai Televiziyanın 5 yaşını təbrik edirəm, orda çalışan hər kəsə öz məhəbbət və ehtiramımı çatdırırıam".

"Təmiz Dünya" İctimai Birliyinin sədri Mehriban Zeynalovanın sözlərinə görə telekanalın fəaliyyətini yüksək qiymətləndirmək olar: "Bu televiziyanın əməkdaşları gənc də olsalar peşəkarlıq nümayiş etdirirlər. İctimai Televiziya istər milli-mənəvi dəyərlərin təbliğində, istərsədə bu və ya digər sahələrdə özünü doğruldub. Amma bizim QHT olaraq bu telekanaldan gözləntilərimiz var. Yaxşı olardı ki, bizə pulsuz reklam çarxları veriləydi, sosial problemlərin müzakirəsinin efirdə səslənməsinə vaxt ayrılaydı, hər hansı problem QHT tərəfindən gündəmə gətirilərsə onun ictimaiyyətin diqqətinə çatdırılmasında yaxından köməklik göstəriləydi. Bu məsələlərdə bizim İctimai Televiziyaya çox ehtiyacımız olur".

Azərbaycan Yazıçılar Birliyinin İctimaiyyətlə Əlaqələr Şöbəsinin rəhbəri Ədalət Əsgəroğlu bildirdi ki, İctimai Televiziya artıq 5 ildir ki, Azərbaycan xalqının mənəviyyatına, ictimai həyatına daxil oluub: "Adından da göründüyü kimi sırf ictimaiyyətlə əlaqə missiyasını daşıyır. Fikrimcə telekanal 5 il ərzində bu funksiyanı layiqincə yerinə yetirib. İctimai Televiziyada gedən verilişlər öz aktuallığı ilə hər zaman diqqəti cəlb edir. İnsanların mənəviyyatının sabaha açılan pəncərəsi rolunu oynayır. Mən Yazıçılar Birliyini təmsil etdiyimə görə deyə bilərəm ki, yaradıcı adamlara, saz-söz sənətinə telekanalda çox böyük əhəmiyyət verilir və bununla bağlı gedən verilişlər də maraqla izlənir. Saz-söz sənətinin əhəmiyyətini vurğulayan bir şair kimi mən heç vaxt İctimai Televiziyaya dəvət almasam da, şairlərimizin, yazıçılarımızin, dünyadan köçən klassiklərimizin həyatına, fəaliyyətinə işıq salan verilişlər məni çox sevindirir. Yəni, mənim qələm yoldaşlarım, həmkarlarım əgər bu telekanalda tez-tez görsənirlərsə, xalqın mənəviyyatına zənginləşdirirlərsə əllbətə ki, bu telekanal mənim üçün qiymətlidir". Onun sözlərinə görə hazırda İctimai Televiziyada gedən verilişlər mühüm əhəmiyyətə malikdir: "Amma biz arzulayırıq ki, belə verilişlərin, proqramların sayı çoxaldılsın. Məsələn vətənpərvərlik mövzusundakı verilişlərin, sərhəd bölgələrindən proqramların hazırlanması, gənclərin fəaliyyətinə həsr olunmuş verilişlərin sayının artırılması və eyni zamanda şair və yazıçılarımızın bölgələrdə, ön cəbhədən çıxışlarının işıqlandırılması çox vacibdir".

Nicat Göyüşlü

Xalq cəbhəsi.- 2010.- 28 avqust.- S. 11.