Azərbaycan pəhləvanlıq sənəti
Azərbaycanda pəhləvanlığın milli
kökənli, qədim,
bənzərsiz təməl
ənənələri var. Bu, əzəli, əbədi döyüşkənliyimizin
ifadəsi olmaqla yanaşı, xalq ruhunun ayrı-ayrı fərdlərdə yaşamasının
bariz nümunəsidir.
Hər xalq pəhləvan yetirə bilmir. Pəhləvanlıq
türk ruhunun yenilməzliyinin ifadəsidir.
Burada hər bir hərəkət məzmunludur. Bu gün Azərbaycanda pəhləvanlıq ənənəsi
az-çox yaşadılır.
Amma təəssüf
ki, pəhləvanlığın
böyük mənada
ənənəviləşməsi, ömrümüzə, ruhumuza,
qanımıza keçməsi
o qədər də müşahidə edilmir. Bütün çatışmazlıqlara baxmayaraq,
Azərbaycanda pəhləvanlıq
ənənəsi zənnimizcə,
qloballaşan, milli dəyərlərə arxa
çevirən dünyanın
indiki çağında
yeni bir mərhələyə qədəm
qoymalıdır. Təəssüf
ki, bu gün
Azərbaycanda qədim
el adət-ənənələrini
yeni dəblər üstələyir. Bu onunla
şərtlənir ki,
hazırda Azərbaycan
toylarının hətta
kəndlərdə və
qəsəbələrdə belə restoranlaşması
dəb halını alıb. İndi çoxu toylarda pəhləvanların qurşaq
tutmasına az qala lağ edir,
bunu müasir qaydalara tamamilə yad sayır. Əvvəllər Azərbaycanın kəndlərinə
pəhləvanlar tez-tez
gedər, müxtəlif
maraqlı proqramla camaatın qarşısında
çıxış edərdilər.
Sovet dövründə hələ
kəndlərdə televiziyanın
olmadığı bir
vaxtda pəhləvanın
çıxışları daim camaatda milli
ruha bağlılıq
ənənəsi yaradırdı.
Azərbaycanda pəhləvanlıq
ənənəsinə, tarixinə
qısaca da olsa nəzər salaq. Bu mövzuda araşdırmalar
aparmış tanınmış
mərhum folklorçu-alim,
filologiya elmləri doktoru, professor Mürsəl Həkimovu yaxşı xatırlayıram.
O, özü də gəncliyində pəhləvanlıq sənəti
ilə məşğul
olub. 1945-1946-cı illərdə
Qazax mahalında el pəhləvanı kimi tanınırdı.
1948-ci ildə Qazağın
mal meydanında iki saata yaxın
SSRİ idman ustası
Yengəbiryanla güləşmiş
və onun kürəyini yerə vurmuşdu. O, bu hadisəni belə xatırlayırdı:
"O zaman mən Qazaxdakı
Müəllimlər İnstitutunun tələbəsi idim. Gördüm bu Yengəbiryan meydan oxuyur. İnstitutun direktoru Xanməmməd Mirzəyev üzünü
tələbələrə tutub dedi ki,
görəsən, İncə
dərəsində, Daş
Salahlıda bir ürəyi təpərli
yoxdurmu ki, erməninin qabağına
çıxsın? Direktor
dedi ki, kim ermənini yıxsa, institutu qurtarana kimi günorta yeməyi məndəndir, həmçinin
bir aylıq əlaçı təqaüdü
də verəcəyəm.
Təqaüd və yemək barədə belə fikirləşmədən
ermənini yıxmaq eşqiylə meydana çıxdım. Zurnaçıdan
xahiş etdim ki, qulağımın dibində bir dəli "Cəngi" çalsın. Nərə
çəkib erməninin
kürəyini yerə
vurdum. Ondan sonra el pəhləvanı
kimi məşhurlaşdım".
Xalq mərasimlərinin, meydan tamaşalarının tərkib
hissəsi kimi bu gün də
öz formasını
qoruyub saxlayan güc sınamaq, güşt tutmaq, daş oynatmaq, kərən sındırmaq,
buğa boynu əymək, kəndirbazlıq
etmək yalnız oğuz-türk xalqlarının
deyil, həm də bütün dünya xalqlarının dinamik-dramatik
oyunları olub, tamaşaçıların zövqünü
oxşayıb. Zorxana,
pəhləvanlıq xalq
tamaşaları Bahar-Novruz
mərasimlərindən sonrakı
inkişaf mərhələlərində
ayrıca tamaşa növünə, peşəyə
çevrilib. Azərbaycan
ruhunun ifadəsi kimi zəngin folklor nümunələrimizdə
belə pəhləvan
obrazı son dərəcə bənzərsiz,
bitib-tükənməyən güc rəmzi kimi təqdim edilir. Pəhləvan obrazının xalq ruhunda yenilməz, məğlubedilməz şəkildə
təqdim edilməsi adi səciyyə daşımayıb. Pəhləvan
xalq ruhundan doğan real bir obraz idi.
O, zorxanaya çıxanadək
bərkdən-boşdan keçir,
sözün əsl mənasında yetkinliyə
çatırdı. Pəhləvanların
öz qüvvəsini
sınaması zorxana tamaşalarında daha böyük maraq doğurur. Zorxana xalq milli oyunlarını
təkcə bahar mərasimi ilə məhdudlaşdırmaq olmaz.
Zorxana xalqın adət-ənənəsinə daxil
olmuş sinkretik tamaşa mərasimidir.
"Pəhləvanı el
saxlar"- demişlər.
Zorxana ən çox Bahar bayramı mərasimlərində,
meydan tamaşalarında
keçirilir. Görəsən,
qədim təməlli,
milli adət-ənənələrimizdən
soraq verən pəhləvanlıq sənətinin
daşıyıcıları barədə nə bilirik? Azərbaycan türklərinin 18-ci əsrdən
etibarən adlı-sanlı,
yenilməz, güclü
pəhləvanları artıq
dünyada tanınmağa
başlamışlar. Bu baxımdan
18-ci əsrin sonlarında
Çin, Hindistan, İran və Misirdə şöhrət
tapmış Maştağalı
Hüseynqulu Hacı Mürsəloğlu, onun yetirməsi, vaxtilə
"altıaylıq pəhləvan"
adı ilə məşhur olan Əbdüləli Axundov, yenilməz meydan pəhləvanı Abşeronlu
Hüseynqulu Mirzə Haşım oğlu, Balaxanılı Sap Pənci,
Bakılı Şobı
oğlu Abdulla, Əhmədli Məmməd,
Atababa bu dövrdə zorxana üzrə xüsusi hörmət qazanmış
pəhləvanlar olublar.
19-cu əsrin sonları,
20-ci əsrdə Azərbaycanda
Sali Süleyman və Rəşid Yusifov kimi məşhur
pəhləvanlar el hörməti qazanmışdılar.
Muxtar Dadaşov və Salar Aslanovun
"Azərbaycan pəhləvanları"
kitabında Sali Süleymanın pəhləvanlığı
haqqında bunları oxuyuruq:
"Məşhur pəhləvan İvan Poddubnının rəhbərliyi ilə beynəlxaq yarışlara hazırlaşan Sali Süleyman tezliklə misilsiz atletik bədən quruluşu, fenomenal gücü və güləş texnikası ilə idman həvəskarlarını valeh etmişdi. Avropanın sirk meydanlarında-London, Paris, Praqa, Roma və başqalarında dünyanın bir çox tanınmış güləşçilərini məğlub edən Sali Süleyman "çempionların qənimi" kimi şöhrət tapmışdı. O, öz məşqçisi İvan Poddubnı ilə birlikdə Vaşinqtonda və Çikaqoda keçirilmiş beynəlxalq turnirlərdə də müvəffəqiyyətlə çıxış etmişdi". Sali Süleyman həmçinin Bakıda, Tiflisdə, İrəvanda, Gəncədə, Dərbənddə, Qroznıda, Mahaçqalada, Moskvada və başqa şəhərlərdə özünəməxsus çıxışları ilə tamaşaçıları heyran qoymuşdu. Dünyada məşhur olan Rəşid Yusifov yenilməz pəhləvanlar Eldar Göyçaylının, Məmməd Hüseynovun, Əşrəf Sultanovun, Sabir Məmmədovun, İsgəndər Hacıyevin, Qiyas Nuriyevin, Məmməd Abdullayevin ustadı olub. Mürsəl Həkimov bənzərsiz bahadırların hünər yolunu davam etdirən yeni pəhləvanlar nəsli barədə də danışırdı: "Qazax bölgələrindən Sabir Qazaxlı, Laylabaşoğlu, Qənbər Salahlı, Tovuzlu Məmməd Muradov, Qəbələli Əbdürrəhman Atakişiyev, Köçəri Beyləqanlı, Göyçaylı Rasim Məmmədnəbi, Qaçay Hüseynov və oğulları Təvəkkül, Allahverdi, Şəkili Gəray Löymanov, Famil Löymanov və başqalarının adı həmişə el arasında məşhur olub." Mürsəl Həkimov "Həkimlilər" soyundan olan pəhləvan Müsəllim Həkimlinin igidliyindən, soyunun pəhləvanlığından da danışırdı: "Müsəllimin əsil-nəcabətində babalarından Rüstəm Zal, Mehdi Bayramoğlu, Şaqqulu oğlu Məmməd kimi el pəhləvanları Qazax, Borçalı bölgələrində məşhur olmuşlar. 19-cu əsrdə yaşamış Rüstəm Zal Zaqatalaya səfər edərkən yolda qəfildən pələnglə rastlaşıb, onun cəngini ayıraraq öldürüb. O, həmişə el toylarında sərrast gülləsinə görə nəmər alıb. Mehdi Bayramoğlu isə Gəncəbasarda ən sərrast güləşən el pəhləvanı olub. Mehdi pəhləvan ölənədək meydanda məğlubiyyət nə olduğunu bilməyib". Azərbaycan ruhu yenilməzdir, məğlubedilməzdir. Çox zaman fitrətimizin dərinliklərə çəkilməsinə göz yumur, imkanlarımızı səfərbər etməyə girişmirik. Unuduruq ki, olanları nəinki qorumaq, hətta artırmaq hava-su qədər gərəklidir. Əks təqdirdə milli müəyyənliyimizdən, xəlqi keyfiyyətlərimizdən uzaq düşürük. Təkcə "Dədə Qorqud dastanları"nda pəhləvanlığın kifayət qədər daşıyıcılarına rast gəlmək mümkündür.
Qaliboğlu
Elçin
Xalq
Cəbhəsi.- 2010.- 25 dekabr.- S.11.