YAP Binəqədi rayon təşkilatının yaradılmasının 17-ci ildönümü qeyd olundu

Azərbaycan Respublikasının Prezidenti İlham Əliyevin 2010-cu ili “Ekologiya ili” elan etməsini əldə rəhbər tutan YAP Binəqədi rayon təşkilatının fəalları təşkilatın yaradılmasının 17-ci il dönümü münasibətilə təşkil etdikləri toplantıya iməciliklə — ağacəkmə kampaniyası ilə başladılar. İməcilikdən sonra təşkilatın qərargahında keçirilən tədbiri YAP Binəqədi rayon təşkilatının sədri Nəbi Xəlilov açdı.

O, “Yüksək əqidə və intellektə malik çoxsaylı insanları birləşdirən Yeni Azərbaycan Partiyası 1992-ci il noyabrın 21-də Naxçıvanda Heydər Əliyevin sədrliyi ilə 550 nəfərdən ibarət təşəbbüs qrupunun keçirdiyi konfransda təsis olunduqdan 6 ay sonra xalqın böyük inamını qazanaraq siyasi hakimiyyətə gəldi” – fikirləri ilə partiyanın keçdiyi yola nəzər saldı. Bildirdi ki, həmin vaxtdan respublikanın bütün rayonlarında YAP-ın ilk təşkilatları yaranmağa başladı. Binəqədi rayonunda 450 nəfər partiya təəssübkeşi bir araya gələrək 1993-cü il martın 7-də keçirilən konfransda YAP Binəqədi rayon təşkilatını təsis etdilər. Bununla da, rayon təşkilatı partiyanın qarşıya qoyduğu vəzifələri və təşkilatlanma işlərini uğurla həyata keçirməyə başladı. Qısa müddətdə partiya sıraları genişlənərək idarə və müəssisələrdə ərazi ilk partiya təşkilatları yaranmağa başladı. 2001-ci ildə respublikada ilk olaraq Binəqədi rayonunda Yeni Azərbaycan Partiyasının təşkilatı üçün qərargah binası tikilib istifadəyə verildi ki, bu da partiyanın fəaliyyətində müsbət dönüş yaratdı.

N. Xəlilov dedi ki, ötən il ulu öndər Heydər Əliyevin anadan olmasının 86-cı ildönümü və anım günü yüksək səviyyədə qeyd edilmiş, onun ilk dəfə respublikaya rəhbər seçilməsinin 40 illiyi ilə əlaqədar YAP rayon təşkilatı rayon icra hakimiyyəti ilə birlikdə silsilə tədbirlər keçirmişdir. 20 Yanvar—şəhidlərin anım günü, 2 fevral— Gənclər günü, 31 mart—Azərbaycanlıların soyqırımı günü, 31 dekabr— Dünya Azərbaycanlılarının Həmrəyliyi günü və Yeni il bayramı qeyd olunmuşdur. Həmçinin YAP mərkəzi aparatının təşəbbüsü ilə Bayıl qəsəbəsində keçirilən yaşıllaşdırma aksiyasında rayon partiya təşkilatının fəalları da yaxından iştirak etmişlər. Təşkilat tərəfindən müqəddəs Ramazan və Qurban bayramlarında ehtiyacı olanlara bayram sovqatı verilmiş, tənha və xəstə qocalara yardım aksiyası ilə müxtəlif növ ərzaq məhsulları çatdırılmış, partiyanın qadınlar şurası və Binəqədi qəsəbə gənclər təşkilatı ilə birlikdə Saray qəsəbəsində yerləşən 7 saylı əqli cəhətdən zəif olan uşaq evində 2 dəfə xeyriyyə tədbiri keçirilmiş, imkansız ailələrin uşaqları üçün kiçik toy mərasimi təşkil edilmiş, Qarabağ döyüşlərində hər iki gözünü itirmiş Sarvan Hüseynovun ailəsinə qiymətli hədiyyə verilmişdir.

Təşkilatın sədri seçki kampaniyasında seçicilərlə aparılan işin yüksək səviyyədə qurulması üçün rayon ərazisində mərkəzi və yerli seçki qərargahları yaradılmasını xatırladaraq bildirdi ki, kampaniya zamanı təbliğat-təşviqat işlərinin yüksək qurulması üçün Binəqədi, M.Ə.Rəsulzadə, Biləcəri, Xocasən, Sulutəpə və 28 May qəsəbələrinin, həmçinin 6, 7, 8 və 9-cu mikrorayonlarda seçicilərlə YAP-ın səlahiyyətli nümayəndələri— Milli Məclisin komitə sədri Eldar İbrahimovun, millət vəkilləri Madər Musayevin, Rafael Cəbrayılovun və rayon ağsaqqalı Həsən Mirzəyevin iştirakı ilə çoxsaylı görüşlər keçirilmişdir. Eyni zamanda, partiyanın qərargahında təhsil, səhiyyə işçiləri, ilk dəfə səsvermə hüququna malik olan gənc və tələbə seçicilərlə də görüşlər təşkil edilmiş və seçkilərə dair ətraflı məlumat verilmişdir. Rayonda fəaliyyət göstərən 5 bələdiyyəyə partiya tərəfindən namizədliyi irəli sürülən 73 nəfərdən 44-ü — 13 nəfər qadın, 12 nəfər isə gənc bələdiyyə üzvü seçilmişdir.

Ötən illər ərzində YAP-da siyasətçilərin yeni nəslinin yetişməsindən söz açan N. Xəlilov bu nəslin ən parlaq nümayəndəsi, Heydər Əliyev siyasi məktəbinin layiqli yetirməsi Prezident İlham Əliyevin YAP-ın bu dövrdəki fəaliyyətinə verdiyi qiyməti diqqətə çatdırdı. “Biz azadıq, biz müstəqilik, biz güclü Azərbaycan yaradırıq, güclü dövlət qururuq. Mən bu dövlət quruculuğunda Yeni Azərbaycan Partiyasının rolunu çox yüksək qiymətləndirirəm”. Təşkilatlanma istiqamətində əldə olunmuş uğurlar qeyd edildi. Bildirildi ki, ərazi ilk partiya təşkilatlarının sayı 208-ə, partiya üzvlərinin sayı isə 12 minə çatmışdır. Son bir ildə partiya sıralarına qəbul olunanların və yeni yaradılan ərazi ilk partiya təşkilatlarının sayı artmışdır. Üzvlərin 65 faizi gənclərdir. Göründüyü kimi, son dövrlər gənclərin, ziyalıların, cəmiyyətdə fəal mövqe tutan insanların partiyaya axını daha da güclənmiş və bunlar Yeni Azərbaycan Partiyasının sədri Prezident İlham Əliyevə inamın, rəğbətin güclənməsi və onun uğurlu rəhbərliyinin məntiqi nəticəsidir.

Tədbirdə Binəqədi Rayon İcra Hakimiyyətinin başçısı Alı Qocayev, Milli Məclisin deputatı Nizami Xudiyev, YAP İdarə Heyətinin üzvü Şahlar Əsgərov, rayon ağsaqqalı Həsən Mirzəyev, təşkilatın qadınlar şurasının sədri Məlahət İbrahimova çıxış edərək ümumxalq partiyasına çevrilən YAP-ın parlament və bələdiyyə seçkilərində əldə etdiyi uğurlardan söz açdılar. Qeyd olundu ki, aparılan uğurlu islahatlar, vətəndaşların rifah halının ildən-ilə yüksəlməsi ölkə başçısının apardığı siyasətin alternativsiz olmasına tutarlı sübutdur və bu imkan verir deyək ki, növbəti parlament seçkilərində də YAP inamlı qələbə qazanacaq. Milli Məclisin deputatları Madər Musayevin, Rafael Cəbrayılovun, KİV nümayəndələrinin və digər qonaqların iştirak etdiyi toplantının sonunda partiya fəallarına fəxri-fərmanlar verildi, partiya sıralarına yeni qəbul olunanlara üzvlük vəsiqələri təqdim olundu və 8 Mart Beynəlxalq Qadınlar Günü münasibəti ilə qadınları təbrik etdilər.

Zərifə BƏŞİRQIZI

Xalq qəzeti.- 2010.- 11 mart.- S. 4.