"20 Yanvar şahid jurnalistlərin gözü ilə"

Mətbuat Şurasında "dəyirmi masa" keçirilib

Ötən gün Azərbaycan Mətbuat Şurasının təşəbbüsü ilə "20 Yanvar şahid jurnalistlərin gözü ilə" mövzusunda "dəyirmi masa" keçirilib. Tədbiri giriş sözü ilə açan MŞ sədri Əflatun Amaşov 20 Yanvar hadisələrinin Azərbaycan xalqının müstəqillik taleyində önəmli mərhələlərdən biri olduğunu vurğulayıb. Onun sözlərinə görə, 20 il öncə yaşanan proseslərdə, qəhrəmanlıqlarda hər bir vətənpərvər azərbaycanlının müstəsna rolu olub: "Bu mənada peşə vəzifəsini yerinə yetirən jurnalistlərin fədakar əməyi xüsusi qeyd edilməlidir. Çünki onlar millətin haqq səsinin, dəhşətli faciənin məşəqqətlərinin bütün dünyaya çatdırılmasını təmin etmək kimi vacib missiyanı yerinə yetiriblər".

Ə.Amaşov 20 Yanvar faciəsi barədə istər ölkə, istərsə də dünya ictimaiyyətinin məlumatlandırılmasında həmin vaxt nəşr olunan "Səhər" qəzetinin başlıca rol oynadığını önə çəkib. O, tədbir iştirakçılarına qəzetin 20 Yanvar hadisələrini əks etdirən "Güllələnmiş qəzet" adlı toplusunu təqdim edib.

"Səhər" qəzetinin baş redaktoru Məzahir Süleymanzadə çıxışında toplunun məhz "Güllələnmiş qəzet" adlandırılması zərurətinə diqqət çəkib: "Senzuranın mövcudluğuna baxmayaraq böyük çətinliklərlə də olsa, qəzet çap edildi. Nəşrdə faciə bütün təfərrüratları ilə əks olundu. Şəkillərdə qətllərin qanlı foto görüntüləri yer almışdı. Yadımdadır ki, "Səhər"in səhifələri redaksiyanın qarşısındakı mağazanın şüşəsinə vurulmuşdu və insanlar əraziyə toplaşaraq onu oxuyurdular. Getdikcə sayları çoxalırdı. Fövqəladə vəziyyət rejimində o boyda insanın bir yerə toplaşması mümkünsüz idi. Tezliklə əsgərlər gəldi. Lakin heç kəs oradan uzaqlaşmırdı. Hərbçilərin göyə atdıqları xəbərdarlıq atəşləri də nəticə vermədi. Sonda onlar şüşəyə atəş açdılar. Şüşə ilə birgə qəzet səhifələri də güllələndi".

M.Süleymanzadə "Səhər" qəzetinin 20 il öncəki fəaliyyətindən danışarkən nəşrin faciəyə ilə bağlı sayının 2 milyon tirajla çıxdığını qeyd edib. O, mövzunu əks etdirən ilk materialın "Vətən bu gün ağı deyir" sərlövhəli reportaj olduğunu diqqətə çatdırıb və yazını 11 jurnalistin müştərək məhsulu kimi dəyərləndirib. 20 Yanvar tarixini Azərbaycan jurnalistlərini birləşdirən gün kimi xarakterizə edən baş redaktor "Səhər"in ilk saylarının çıxmasında əməyi keçən hər bir şəxsə minnətdarlığını bildirib.

"Xalq qəzeti"nin baş redaktor müavini Tahir Aydınoğlu o zaman hələ "Kommunist" adlanan bu nəşrin binası önünün jurnalistlərin qərargahına çevrildiyini vurğulayıb: "Həmin vaxt qarara gəlindi ki, belə bir dəhşətli faciədən sonra qəzet "Kommunist" adı ilə çıxarılmasın. Buna mənəvi haqqımızın olmadığı bildirildi. Çox yaxşı ki, Azərbaycanın müstəqilliyinin elan olunmasından 55 gün öncə nəşrin adı dəyişdi. "Səhər" "Kommunist"in iqtisadi əlavəsi kimi fəaliyyətə başlayıb. Bununla belə, bu nəşrin ilk günlərdən siyasi proseslərə aktiv müdaxiləsinin mövcudluğu qaçılmaz sosial sifarişdən qaynaqlanıb".

20 Yanvar faciəsinin şahidlərindən olan Araz Qurbanov qələm sahiblərinin o zamankı fəaliyyət istiqamətlərindən ətraflı söhbət açıb. O, jurnalistlərin ağ xalatlarda həkim kimi gizlincə xəstəxanalarda olmalarını və yaralılarla intervülər təşkil etmələrini konkret cəsarət nümunəsi kimi dəyərləndirib. "Zaman Azərbaycan" qəzetinin baş redaktoru Enes Cansevər çıxışında rəhbəri olduğu nəşrin 20 Yanvar həqiqətlərinin dünyaya çatdırılması sayəsində gördüyü işlərin müxtəlif məqamlarından bəhs edib. Onun sözlərinə görə, faciə və ondan sonrakı proseslər Azərbaycan xalqının qüdrətinin nümayişi olmuşdu: "Eyni zamanda bu, keçmiş SSRİ-yə daxil olan digər respublikaların azadlıqlarına qovuşmalarında mühüm həlqələrdən idi. Bu mənada indi müstəqillik qazanmış bir çox postsovet ölkələri Azərbaycan xalqına minnətdar olmalıdırlar".

Çıxış edənlərdən Mətbuat Şurası İdarə Heyətinin üzvləri - Beynəlxalq Avrasiya Mətbuat Fondunun rəhbəri Umud Rəhimoğlu, "Paralel" qəzetinin baş redaktoru Tapdıq Abbas, eyni zamanda 20 Yanvar hadisələri dönəmində "İzvestiya" qəzetinin müxbiri olmuş Vasif Səmədov, "Assa İrada" İnformasiya Agentliyinin baş direktoru Fazil Abbasov və başqaları ayrı-ayrı jurnalistlərin faciənin beynəlxalq aləmə çatdırılması istiqamətindəki fəaliyyətlərindən söhbət açıblar.

Ülviyyə Şamilqızı

Xalq Cəbhəsi.- 2010.- 20 yanvar.- S.14.