"Qəzet camaat üçündür,
camaat qəzet üçün
deyil"
Maarif Teymur: "Arxivdə Həsən
bəy Zərdabinin fondu zənginləşdirilir"
Azərbaycan
milli mətbuatının tanınmış nümayəndələrinin
arxiv fondlarının yaradılması mədəniyyət
tariximizin öyrənilməsində əvəzsiz mənbədir.
Dövlət
Ədəbiyyat və İncəsənət arxivinin direktoru,
tanınmış tədqiqatçı, əməkdar mədəniyyət
işçisi Maarif Teymurla söhbətimizdə arxivdə
saxlanan ədəbiyyat və incəsənət nümunələri
sırasında Azərbaycan jurnalistikasının ilkin
dövründən - "Əkinçi"dən başlayaraq
çağımıza qədər hansı soraqların
olmasıyla maraqlandıq. Arxivdə milli jurnalistikamıza, bu
sahədə çalışanların fəaliyyətinə
dair xeyli əhəmiyyətli sənədlər qorunaraq
saxlanılır. M.Teymur deyir: "Vaxtilə "Qəzet
camaat üçündür, camaat qəzet üçün
deyil" prinsipini əsas götürən Həsən bəy
Zərdabi bütün şüurlu həyatını
xalqın ziyalanmasına, maariflənməsinə həsr
etdi".
7 il əvvəl
Zərdabinin arxivdə 653 saylı fondu yaradılıb:
"H.Zərdabinin həyatı və
yaradıcılığı hələ tam dəqiqliyilə
öyrənilməyib, yenə müəyyən
anlaşılmazlıqlar var. Bu sahədə Heydər
Hüseynov, Hazim Axundov, Ziyəddin Göyüşov, Mirzə
İbrahimov, İzzət Rüstəmov, Vəli Məmmədov,
Xeyrulla Məmmədov, Məmməd Məmmədov və
başqaları tədqiqatlar aparıblar. Yeri gəlmişkən,
bir məqamı qeyd etmək istəyirəm: Zərdabinin həyat
yoldaşı Hənifə Məlikova xatirələrində
onun 1837-ci il noyabrın 12-də anadan olduğunu yazır. Ancaq
yenə də onun doğum tarixində bəzən
yanlışlıqlar edilməsi yolverilməz
sayılmalıdır. Təsadüfi deyil ki, H.Zərdabinin
1947 və 1957-ci illərdə doğum tarixinin qeyd edilməsi
onun məhz bu tarixdə anadan olduğunu bir daha təsdiq
edir".
M.Teymur
daha sonra qeyd edir ki, Zərdabinin başladığı bu gərəkli
milli əməl az sonra davamlı şəkildə bəhrəsini
verməyə başladı: "Cəlil Məmmədquluzadə
yazırdı ki, biz H.Zərdabinin tələbələriyik.
Məlumdur ki, Mirzə Cəlil məşhur
yazıçılığıyla yanaşı 20-ci
yüzilin əvvəllərində Azərbaycanın mətbuat
tarixində hünərli, qorxmaz jurnalistlərdən biri olub,
mətbuatımızın inkişafına güclü təkan
verib".
Ədəbiyyat
və İncəsənət, həmçinin Dövlət
Tarix arxivlərində "Əkinçi" və onun
yaradıcısı H.Zərdabinin həyatı, fəaliyyəti
ilə bağlı zəngin soraqlar var. Heçə ildir ki,
H.Zərdabinin Ədəbiyyat və İncəsənət
Arxivində fondu açılıb: "Zərdabinin qohumu
Fatimə xanımla neçə illər əvvəl
görüşmüşdük, o, bizə müəyyən
sənədlərin tapılması ilə bağlı köməklik
etmişdi".
Maarif
müəllimin rəhbərlik etdiyi arxivdə Zərdabiyə
aid olan fond sənədləri daim zənginləşdirilir:
"Bu sırada H.Zərdabinin Hənifə xanıma
yazdığı məktublar diqqəti xüsusi cəlb edir.
Zərdabinin irsi indiyə kimi az tədqiq olunmasa da, onun elmi fəaliyyətinin
müxtəlif aspektlərdən daha geniş səviyyədə
araşdırılması vacibdir. Həmçinin arxivimizdə
Zərdabiyə məxsus fondda 19-cu əsrin axırlarında
imzalanmış torpaq haqqında müqavilələr,
oğlanlarının fotoşəkilləri
saxlanılır".
H.Zərdabi
ilə bağlı müxtəlif soraqlara Azərbaycanın
tanınmış şəxsiyyətlərinin şəxsi
fondlarında da rast gəlmək olur: ""Əkinçi"
ilə bağlı soraqları hələ dünyaya istənilən
səviyyədə çatdıra bilməmişik. Zərdabi
yüksək erudisiyalı bir ziyalı idi. Məhz bu səbəbdən
onu Moskvada saxlamaq istəyirdilər. Ancaq o, millətinə xidməti
hər şeydən üstün tutdu". Arxivdə "Əkinçi"dən
sonrakı milli mətbuat nümunələri də
saxlanılır. Bu sırada "Kaspi" qəzetinin
adını çəkmək olar: "Birləşmiş
elmi məlumat kitabxanamızda "Kaspi" qəzetinin
sayları qorunur. Zərdabi uzun müddət bu qəzetlə əməkdaşlıq
edib. Zərdabi ilə Üzeyir Hacıbəylinin
qardaşı Ceyhun Hacıbəylinin dostluq münasibətləri
hələ araşdırılmayıb. C.Hacıbəyli onun hərtərəfli
istedada malik şəxsiyyət olmasından bəhs edib. 1911-ci
ildə o, Zərdabi haqqında əsər yazıb". Zərdabinin
şəxsi fondunda həmçinin Əlimərdan bəy
Topçubaşovun bir neçə məktubu
saxlanılır.
Qeyd
edək ki, Ə.Topçubaşov Zərdabinin böyük
qızı Pəri xanımın həyat yoldaşı olub.
O, 1919-cu Avropaya gedir və qayıtmır, Fransada vəfat edir.
20-ci yüzilin əvvəllərində çıxan milli mətbuat
nümunələrinin sayı xeyli artdı. "Molla Həsrəddin",
Füyuzat", "Kaspi", "Həyat" və
başqa qəzet-jurnallar bu qəbildəndir. Arxivdə Əlibəy
Hüseynzadənin adına açılmış fond da daim zənginləşdirilir.
Arxivdə
"Molla Həsrəddin"lə bağlı Əziz Şərifin
zəngin fondunda jurnalın 1906-1914-cü illərdə
işıq üzü görmüş nəşrləri diqqəti
xüsusi cəlb edir: "Mirzə Cəlil yazırdı, mən
nəşrləri Qurbanəli Şərifzadəyə təqdim
edirəm ki, bizlər həyatda olmayanda varaqlayıb
xatırlasınlar. Əziz Şərif böyük bir
qayğıyla və sayğıyla Mirzə Cəlilin bu hədiyyəsini
qoruyub saxlayıb, ömrünün sonunda çoxlu sayda zəngin
sənədlərlə birgə bu əmanəti də
arxivimizə təqdim etdi. Belə bir gündə Əziz
müəllimi xatırlamaq gərəkdir".
Müxtəlif
şəxsi fondlarda Firidun bəy Köçərli ilə
bağlı da məlumatlar var. Üzeyir Hacıbəylinin
jurnalistika fəaliyyəti onun yaradıcılığında
xüsusi bir səhifədir. Azərbaycan Demokratik Cümhuriyyəti
dövründə çıxan mətbuat nümunələrindən
soraqlarda o dövrün vəziyyətini çox gözəl
təsəvvür etmək olur. "Azərbaycan" qəzeti
rəsmi qəzet olmaqla dövrün güzgüsü rolunu
oynayırdı. Arxivdə bu qəzetin də nümunələri
saxlanılır. Milli mətbuat tariximizə dair arxivdə
qorunaraq saxlanılan çoxsaylı xatirələr,
yazılar Azərbaycan mətbuatının keçib gəldiyi
çətin, əzablı yol barədə hərtərəfli
təəssürat yaradır. Ziyalılarımız sovet
imperiyasının təqibləri səbəbindən Azərbaycanı
tərk etdikdən sonra dünyanın müxtəlif ölkələrinə
səpələndilər. Bu vətənpərvər
ziyalıların əksəriyyəti harada yaşasalar da, Azərbaycan
haqda soraqları o ölkələrdə yaydılar, özləri
də qəzetçiliklə məşğul oldular.
Vaxtaşırı o dövrdə çıxmış belə
nümunələr arxivə təqdim edilir: "
Arxivdə
Ceyhun Hacıbəylinin həyat və
yaradıcılığını özündə müəyyən
mənada əks etdirən zəngin soraqlar da qorunub
saxlanılır. Maarif Teymur Ceyhun Hacıbəylinin
yaradıcılığının köklü bir təmələ
əsaslandığını bildirir: "Azərbaycan
tarixinin özünəməxsusluğunun qorunub
saxlanmasında heç şübhəsiz ki, fədakar, təmənnasız
insanların müstəsna rolu olub. Azərbaycan mədəniyyətinin,
incəsənətinin, musiqisinin inkişafında Hacıbəyovlar
nəslinin böyük xidmətləri var. Azərbaycan
tarixində nəsil, şəcərə məsələsi
yaradıcılıq baxımından hələ bundan sonra da
araşdırılmaya ehtiyac duyur". İllər keçəcək,
Hacıbəyovlar nəslinin mədəniyyətimizin
inkişafındakı müstəsna xidmətləriylə
bağlı daha yeni-yeni soraqlar üzə çıxacaq:
"Ceyhun Hacıbəyli ədəbiyyatşünas,
folklorşünas, politoloq, musiqi nəzəriyyəçisi,
istedadlı fəlsəfəçi kimi Azərbaycan mədəniyyətinin
inkişafında xidmətlər göstərib. Təəssüf
ki, zamanın gərdişindən, 70 illik Sovet
imperiyasının ideoloji mübarizəsi nəticəsində
Ceyhun Hacıbəyli kimi şəxsiyyətlərin əməlləri
barədə bilgilər almaq yasaq olunmuşdu. Təbiidir ki,
sovet dövründə hakim ideologiyaya qarşı
çıxanların ictimaiyyətə müsbət mənada
təqdimindən söhbət belə gedə bilməzdi.
Bunlar daim öz vətənlərində xain kimi təqdim
edilirdilər. Çünki bu şəxslər sovet
ideologiyasını qətiyyən qəbul etmir, gec-tez onun
süqut edəcəyinə inanırdılar".
Maarif
Teymur Ceyhun Hacıbəylinin jurnalistika fəaliyyətinin Abid
Tahir tərəfindən
araşdırıldığını diqqətə çəkir.
O dövrdə Azərbaycanın başına gələn fəlakətlərə
dünyanın münasibəti bütün
çalarlarıyla Ceyhun Hacıbəylinin
yaradıcılığında görünür. Ceyhun
Hacıbəylinin qardaşı Üzeyir Hacıbəyli ilə
məktublaşmasına yenidən diqqət çəkən
Maarif Teymur bildirir ki, o məktublarda Ceyhun bəyin
ömrünün müxtəlif məqamları ilə
bağlı soraqlar var: "Məlum olur ki, Ceyhun Hacıbəyli
Üzeyir bəyə məktublarında sətiraltı
eyhamlarla müxtəlif məsələlərə işarə
edir, münasibətini bildirir. O, Bakını tərk edərkən
28 yaşında idi. Ceyhun Hacıbəyli Azərbaycanda olarkən
ailə qurduğu həyat yoldaşı ilə
ömrünün axırına qədər yaşayıb.
Onun Timurçin adlı oğlu da olub". Ceyhun Hacıbəyli
mühacirətdə yaşadığı dövrdə Azərbaycanda,
həmçinin SSRİ-də çıxan mətbuat
nümunələrindən nə əldə edibsə,
onları saxlayıb. Hazırda o soraqlar arxivimizdə
saxlanılır. Mühacirət mətbuat tariximizin öyrənilməsində
Ceyhun Hacıbəylinin zəngin arxivi mühüm rol oynaya bilər.
Dəfələrlə bu barədə demişəm,
yazmışam. Hər halda mətbuat tariximizdə olan
bütün araşdırmaları bir yerə toplamalı,
ümumiləşdirməliyik. Bütün bu soraqlar sistemli
şəkildə internetdə yerləşdirilməlidir. Bu,
sabahımız üçün çox zəruridir. Ermənilər
olmayan işlərini yalandan "yaradır", var olan kimi
dünyaya təqdim edirlər. Bu məsələdə gecikməməliyik
ki, özümüz deyib özümüz də eşitməyək".
Ötən
illər ərzində arxivdə Cəmil Əlibəyovun,
Tofiq Həsənovun, Kazım Ələkbərlinin, Hurəddin
Babayevin və başqalarının jurnalistika fəaliyyətini
əks etdirən sənədlər toplanılıb, fondlar
yaradılıb. Bu sahədə işlər ardıcıl
davam etdiriləcək.
Uğur
Xalq Cəbhəsi.- 2011.- 22 iyul.- S.14.