Danimarkalı "Əsmərim" mahnısını oxuyurdu

Kəmalə Hüseynova: "Hətta bir qrup təqaüdçü danimarkalı xor təşkil edərək onlara Azərbaycan mahnılarını öyrətməyi məndən xahiş ediblər"

"Hillerod və Fredensborq şəhər bələdiyyələrinin əsas dövlət və mədəniyyət tədbirlərində hər zaman Azərbaycan musiqisi səslənir"

Azərbaycan musiqisini Danimarkada yaşadan və onu sevərək təbliğ edən Danimarka-Azərbaycan Dostluq Cəmiyyəti Mədəniyyət Mərkəzinin rəhbəri Kəmalə Hüseynova 1965-ci ildə Bakıda anadan olub. Dzerjinski adına 11 illik orta ixtisas musiqi məktəbi, eyni zamanda Bakı şəhəri 12 saylı orta məktəbi fərqlənməylə bitirib. 1986-cı ildə Azərbaycan Pedaqoji Universitetini qırmızı diplomla bitirib. Adil Bəbirov, Eldar Mansurov, Kamilə Qarabağlı, Gülarə Axundova, Dilarə Əliyeva kimi istedadlı bəstəkar və musiqiçilərin tələbəsi olub. Bundan əlavə, Bədii Gimnastika Federasiyasında musiqi tərtibatçısı və pianoçu kimi fəaliyyət göstərib. 2003-cü ildən Danimarkanın Fredensborq şəhərində yaşayır. O deyir ki, Danimarkanın özəl məktəbində, ixtisas musiqi məktəbində və özəl türk liseyində musiqi, xor və fortepiano dərsləri verir. Bundan əlavə, danimarkalı vətəndaşlardan ibarət "Hafla" instrumental ansamblında və Danimarkanın qədim Renessans xorunda fəaliyyət göstərir. Soydaşımızın sözlərinə görə, bir çox avropalılar kimi, danimarkalılar da əsasən müasir estrada musiqisinə, yaşlı nəsil isə dini musiqiyə üstünlük verir: "Ümumiyyətlə, danimarkalılar təvazökar, işgüzar və xoşməramlı xalqdır. Hər yeniliyə böyük maraq göstərirlər. Azərbaycan musiqisinə maraqları gündən-günə artır. Çıxışlar və konsertlerdən sonra mənə tez-tez yaxınlaşıb ifa etdiyim musiqi və mahnıların qaynaqları ilə maraqlanırlar. Azərbaycan bəstəkarlarının CD satışı və ya internet ünvanını istəyirlər. Hesab edirəm ki, Azərbaycanımızı geniş tanıtmaq üçün musiqimizin və ümumiyyətlə, zəngin mədəniyyətimizin təbliği birinci yerdə olmalıdır. Çünki bu protokol tədbirlərdən daha təsirlidir". Kəmalə Hüseynova bildirir ki, Qərb musiqisi ilə Şərq musiqisi arasında olduqca böyük fərq var: "Mən fəxrlə qeyd etmək istərdim ki, bizim musiqimiz Qərb musiqisindən qat-qat zəngin və maraqlıdır, bununla danimarkalıların özləri də razılaşır. Nəinki Qərb musiqisi, Şərqdə Azərbaycan musiqisindən zəngin ve gözəl musiqi yoxdur. Bunu dəfələrlə mənimlə söhbətlərində Turkiyənin, Misirin, İraqın, Özbəkistanın, İranın peşəkar musiqişünasları təsdiq ediblər. Təkrarolunmazlığı və rəngarəngliyi ilə seçilən Azərbaycan musiqisinə bir dəfə qulaq asan ömürlük onun heyranı olur". O vurğulayır ki, daha çox özəl türk liseyində və Danimarka "Kompas" gənclər mərkəzində geniş fəaliyyət göstərir: "Hər il keçirilən Beynəlxalq Türkcə Olimpiadalarının Danimarka üzrə musiqi tərtibatçısı və münsiflər heyətinin üzvüyəm. Ümumiyyətlə, musiqi özü-özlüyündə ictimai işdir, insanların ortaq nöqtəsidir". Kəmalə Hüseynova deyir ki, Danimarkaya yeni gələndə ətrafındakı çox insanlar Azərbaycanın harada yerləşdiyini belə bilmirdilər: "Hətta bu mənim xətrimə dəyirdi. Amma gündən-günə vəziyyət dəyişir. Azərbaycanın güclü dövlətə çevrilməsi, dünyada artan nüfuzu bizləri çox sevindirir. Artıq bu gün Azərbaycanı geniş Danimarka kütləsinə tanıtmağa nail olmuşuq. Yaxınlarda küçədə bir danimarkalının "Əsmərim" mahnısını özü-özünə zümzümə etdiyini eşitdim və bunu gördüyüm işlərin ən böyük bəhrəsi kimi qəbul edirəm. Musiqimiz o qədər gözəldir ki, hətta bir qrup təqaüdçü danimarkalı xor təşkil edərək onlara Azərbaycan mahnılarını öyrətməyi məndən xahiş ediblər. Çox gözəldə oxuyurlar, bizim mülayim xalq mahnılarını çox bəyənirlər. Bu gün demək olar Hillerod və Fredensborq şəhər bələdiyyələrinin əsas dövlət və mədəniyyət tədbirlərində hər zaman Azərbaycan musiqisi və mahnıları səslənir və hər dəfə böyük coşquyla qarşılanır". Soydaşımız bildirir ki, Danimarkada azərbaycanlı çox azdır: "Yəqin ki böyüklü-kiçikli 60-70 insan var və onlar bütün Danimarkaya yayılıblar. Demək istərdim ki, azərbaycanlılar oxuyur, çalışır və nailiyyətlər əldə edirlər. Aramızda gözəl mütəxəssislər, həkimlər, iş adamlari var və əldə etdikləri nailiyyətlər Azərbaycanımızı bir çox sahələrdə tanıdır. Amma hesab edirəm ki, Azərbaycanımızı tanıtmaq üçün geniş danimarkalı auditoriyası vacibdir. Həyat yoldaşım Fredensborq şəhər Bələdiyyəsinin mədəniyyət ve ictimaiyyət bölməsində fəaliyyət göstərir və Danimarka-Azərbaycan Dostluq Cəmiyyətinin sədridir. Cəmiyyətimiz Danimarka dövləti tərəfindən dəstəklənir, fəaliyyətimiz gərəkli və əhəmiyyətli qəbul olunur. Azərbaycanla bağlı bir çox layihələr həyata keçirmişik və bu gün də bu işlər davam edir. Mənə gəldikdə ən böyük arzum yaratdığımız danimarkalılardan ibarət "Hafla" ansamblı ilə Azərbaycanda konsert proqramıyla çıxış etmək, ansambl üzvlərinə qədim və gözəl Azərbaycanımızı göstərməkdir".

Turqut

Xalq Cəbhəsi.- 2011.- 9 iyun.- S.4.