«Azərbaycan
Respublikası müstəqil olmalıdır!»
Nəriman
Nərimanov – milli düşüncə insanı kimi
XX əsrdə
milli mənlik şüurunun oyanmasında, milli ideologiyanın
– türkçülüyün formalaşmısında həkim,
dramaturq, publisist və dövlət xadimi N.Nərimanovun
böyük xidmətləri olmuşdur. Hələ XIX əsr
maarifçilərinin başladığı təmiz ana dili
ilə yazmaq məramı XX əsrin önlərində «ana
dili» problemi səviyyəsinə qədər yüksəldi,
ana dili uğrunda tarixi-ədəbi mübarizəyə
çevrildi. Burada iki mühüm cəhəti qeyd etməliyik:
birincisi, milli ideologiyanın türkçülüyün (məhz
ideologiya olaraq!) konsepsiya səviyyəsində
formalaşması milli mətbuatın yaranması ilə
bağlı idi. Beləliklə, 1875-ci ildən «Əkinçi»nin
nəşrindən 1920-ci ilə Azərbaycan Demokratik
Cümhuriyyətinin süqutuna qədərki təqribən
yarım əsr Azərbaycanda milli oyanışın və
onun nəzəri-təməli olan ideologiyaların
formalalaşma dövrü idi.
1920-ci
ilin aprelin 28-də Zəngəzurun böyük hissəsi erməni
qüvvələrinin faktiki nəzarəti altında idi. Eləcə
də Qarabağın dağlıq hissəsində erməni
qüvvələrinin hücumları davam edirdi.
Azərbaycan SSR-in Müvəqqəti İnqilab Komitəsi
1920-ci il 30 aprel tarixində Ermənistana nota verdi. Notada Ermənistandan Zəngəzur
və Qarabağı öz qoşunlarından təmizləməsi tələb
edilmişdi. Rusiya Ermənistanı
sovetləşdirmək üçün
Azərbaycan torpaqlarının
bir hissəsin onlara verməyi vəd etdi. Mikoyan Leninə məktubunda
yazırdı ki, Zəngəzurun ermənilərə
verilməsi erməni xalqının sovet hakimiyyətinə inamın
artıra bilər.
Zaqafqaziya üzrə fövqəladə
və səlahiyyətli
şəxs Orconikidze də bu işə
tam dəstək verirdi
(Sonradan ehtimallara görə Nərimanovu da Orconikidze zəhərləyərək öldürmüşdü).
Rusiyanın xarici işlər naziri Çiçerin 1920-ci il iyun ayında
Orconikidzeyə məktubunda
yazırdı ki, Ermənistan ilə kompromisə nail olmaq vacibdir.
1920-ci il 10 avqustda Rusiya K(b)P-nin Qafqaz Bürosu Azərbaycanın bolşevik
rəhbərliyinin razılığı
olmadan Naxçıvanın
Şərur-Dərələyəz bölgəsini Ermənistana
vermək bərədə
qərar çıxardı,
Qarabağ və Zəngəzur isə Azərbaycanla Ermənistan
arasında «mübahisəli
ərazilər» elan olundu. Azərbaycan Müvəqqəti İnqilab Komitəsinin sədri Nərimanov buna qarşı çıxaraq Leninə məktub yazdı.
Nərimanov yazırdı ki,
mərkəzin çıxardığı
qərarlar Azərbaycan
əhalisi arasında Rusiyaya və Sovet hökumətinə inamı sarsıda bilər: «Zəngəzurun
və Qarabağın
neytrallaşdırılması və yaxud daşnaklara
verilməsi xəyanət
sayılacaqdır. Müsəlman
kütlələr sovet
hakimiyyətinin Azərbaycanın
ərazi bütövlüyünü
qorumamasını satqınlıq,
ermənipərəstlik, yaxud
sovet hakimiyyətinin zəifliyi hesab edəcəklər…» Lakin bu etirazların faktiki nəticəsi olmadı.
Çünki Azərbaycanın sovet rəhbərliyində
də ermənilər
güclü qüvvəyə
malik idilər.
Zəngəzurun Ermənistana verilməsi
1920-ci il noyabrın
30-da keçirilən Azərbaycan
K(b)P MK Siyasi və Təşkilat bürolarının birgə
iclasının qəbul
etdiyi qərarla həll olundu.
AK(b)P MK Siyasi və Təşkilat bürolarının
bu birgə iclasının (30.11.1920) qəbul
etdiyi «tarixi» qərarlara aydınlıq
gətirmək məqsədilə
orada iştirak edənlərin tərkibinə
də mütləq diqqət yetirilməlidir: Q.Orconikidze, Sarkis Ter-Danielyan, Y.Stasova, Q.Kaminski, N.Nərimanov, Ə.Qarayev (AXC parlamentinin
son iclasında Qırmızı
Ordunun işğalına
«O olmasın, bu olsun» demişdi), M.D.Hüseynov (Mirzoyanın
yaxın dostu).
Nərimanovun narazılığının nəticəsiydi
ki, Zəngəzurun Ermənistana verilməsi rəsmən elan edilsə də, qəzanın onun idarəçiliyinə keçməsi
uzun müddət ləngimişdi. Nərimanovun böyük əməyi nəticəsində AK(b)P
MK siyasi və təşkilat bürolarının
1921-ci il 12 yanvar tarixli iclasında «Zəngəzurun müsəlman
hissəsinin inzibati cəhətdən təşkili»
haqqında qərar çıxarıldı. Qərara əsasən
Zəngəzur Qərbi
və Şərqi-Müsəlman
olmaqla iki yerə bölündü.
Nəticədə Zəngəzurun təxminən
47%-i ermənilərin
əlindən alınaraq
geri qaytarıldı.
Qırmızı Ordunu Azərbaycana
AK(b)P Əliheydər Qarayev və Çingiz İldırım
dəvət etmişdi.
Nəriman Nərimanov
isə o vaxt Həştərxanda idi və Nərimanov yalnız 1920-ci ilin mayın 16-da Bakıya gəlir. Bakıya gəlişinin ilk günündə Qırmızı
Ordunun burdakı özbaşınalığını görəndən sonra «Qırmızı Ordunun Xüsusi Şöbəsinin
səlahiyyətlərinin azaldılması
haqqında» direktiv imzalayır. Həmin direktivə
əsasən Nərimanovun
icazəsi olmadan Qırmızı Ordunun Xüsusi Şöbəsi
heç kimi güllələyə bilməzdi.
SSRİ yaradılanda Moskva Azərbaycanı «Muxtar Vilayət» olaraq tərkibinə daxil etmək istəyirdi. Nərimanovun böyük səyi nəticəsində Azərbaycan
Respublika olaraq
SSRİ-yə birləşdirildi.
1920-ci ilin yayında Orconikidze Mərkəzi Komitədə belə bir məsələ qaldırır: «Azərbaycan
Respublikası müstəqilmi
yaşamalı, yaxud tərkib kimi Sovet Rusiyasına daxil olmalıdır?»
MK üzvləri – Əliheydər
Qarayev və Mirzə Davud Hüseynov belə bir fikir irəli
sürürlər ki,
bizə heç bir müstəqillik lazım deyil, biz Azərbaycanı Sovet Rusiyasına birləşdirməliyik…
Nərimanovun fikri isə qəti və dəyişilməz idi: «Azərbaycan Respublikası
müstəqil olmalıdır!»
Bu gün Qarabağ
işğal altında
olsa belə, Azərbaycanın ərazisi
sayılırsa, bunu
biz buna görə Nəriman Nərimanova borcluyuq. Belə ki,
1921-ci il iyunun 19-da Ermənistan SSR
XKS-nin bəyanatı ilə «Dağlıq Qarabağ Ermənistanın
ayrılmaz tərkib hissəsi» elan edildi. 1921-ci il iyunun 27-də AK(b)P MK özünün siyasi və təşkilati bürolarının birgə
iclasında Ermənistanın
Qarabağın yuxarı
hissəsinə iddialarını
rədd etdi. RK(b)P-nin Qafqaz
bürosu 1921-ci il 4 iyul tarixli plenumunda
Dağlıq Qarabağın
Ermənistan SSR-in tərkibinə
daxil edilməsi haqqında qərar çıxardı. N.Nərimanov bu qərara qəti etiraz etdi və Moskvanı
istefa ilə hədələdi. Moskva sosialist
inqilablarını Şərqə
doğru genişləndirməyə
çalışırdı və belə bir vaxtda Şərq
ölkəsi – Azərbaycanda
istefa Moskvanın siyasətin puç edə bilərdi. Nərimanovun etirazı nəzərə alınaraq
1921-ci il iyulun 5-də plenum Dağlıq
Qarabağa geniş «Vilayət Muxtariyyəti» statusu vermək şərti ilə Azərbaycan SSR-in tərkibində
saxlamaq haqqında yeni qərar qəbul etdi. Nərimanov bu statusa da
qarşı çıxdı
və bu qərara qarşı bütün gücü ilə mübarizə apardı. Buna görə
də qərarın icrası 2 il
gecikdi. Nəhayət, Moskva Nərimanovu
Moskvada vəzifəyə
gətirdi və Azərbaycandan uzaqlaşdırdı.
Nəticə etibarilə
1923-cü ilin 7 Dekabrında
Azərbaycan MİK-si
«Dağlıq Qarabağ
haqqında» dekret verdi və
mərkəzi Şuşa
olan Dağlıq Qarabağ Muxtar Vilayəti yaradıldı.
Nərimanov Leninə yazdığı
məktubunda 1918-ci il Mart hadisələrinə
ilk dəfə «Milli qırğın» (o vaxt soyqırım ifadəsi yox idi) deyərək
31 Mart Soyqırımına siyasi və hüquqi qiymət verib. Eyni zamanda Şaumyanı
daşnak adlandıraraq
sərt dillə tənqid edib və milli qırğının
təşkilatçısı olaraq ittiham edib.
Millətçi dedikdə, təkcə
«sağçı»lar nəzərdə tutulmur. Millətçi dedikdə,
sağçı, solçu,
ateist, müsəlman,
xristian və s. asılı olmayaraq milləti və dövləti üçün
çalışan şəxs
başa düşülür.
Elə şəxslər
var ki, adın
«millətçi» qoyub,
amma «söz millətçisi»dir. Nərimanov
isə xalqının,
millətinin gələcəyin
sosializmdə görsə
də, xalqı üçün əlindən
nə gəlirdisə
etdi. Elə əsl millətçilik də bax budur!
Oktay
Xalq Cəbhəsi.-
2012.- 14 aprel.- S.13.