«Bizim musiqiyə və idmana sevgimiz eyni dərəcədədir»

Sercio Arruda: «Biz braziliyalı idmançıların Azərbaycan milli komandasında çıxış etməsində qürur hissi keçiririk.

Braziliyanın Azərbaycanda səfiri Sercio Arrudanın APA-ya müsahibəsini diqqətinizə çatdırırıq.

- Cənab səfir, Azərbaycanla Braziliya arasında münasibətlərin səviyyəsini necə qiymətləndirirsiniz?

- Bildiyiniz kimi, ölkələrimiz arasında münasibətlər 1993-cü ildə qurulub, Bakıda Braziliya səfirliyi isə 2009-cu ildə fəaliyyətə başlayıb. Bu müddətdə biz əhəmiyyətli nəticələrə nail olmuş, ikitərəfli əməkdaşlığı bir neçə istiqamət üzrə inkişaf etdirmişik. Bu ilin mayında Azərbaycanın Braziliyadakı ilk səfiri Elnur Sultanov fəaliyyətə başlayacaq. Sözsüz ki, Braziliyada Azərbaycan səfirliyinin açılması ikitərəfli münasibətləri möhkəmləndirəcək. Ölkələrimiz arasında münasibətlərin inkişafı üçün böyük potensial mövcuddur, istər energetika sahəsi olsun, istər informasiya texnologiyaları, infrastruktur, turizm, mədəniyyət, idman və sair. Azərbaycanın gənclər və idman naziri Azad Rəhimov tezliklə Braziliyaya səfər edəcək və öz həmkarı ilə əməkdaşlıq haqqında saziş imzalayacaq.

- 2006-cı ildə iki ölkə arasında viza rejiminin sadələşdirilməsi haqqında saziş imzalanıb, bu istiqamətdə hansı işlər görülüb?

- Bu saziş hazırda qüvvədədir, bu sənəd diplomatik pasporta malik vətəndaşları viza almaq zərurətindən azad edir. Bu razılaşma qarşılıqlı səfərlərin təşkilini xeyli asanlaşdırıb. Azərbaycan prezidenti İlham Əliyevlə ilk görüşümüzdə dövlət başçısı biznes və turizmi ikitərəfli münasibətlərin inkişafı üçün əsas sahələr kimi qeyd etdi. O bildirdi ki, turizm və biznes sahəsində əməkdaşlığın inkişafı gələcəkdə viza rejiminin vətəndaşla üçün də asanlaşdırılmasına zəmin yarada bilər.

- Bildiyiniz kimi Azərbaycan ərazilərinin 20 faizi Ermənistan tərəfindən işğal olunub. Braziliyanın Dağlıq Qarabağ münaqişəsi ilə bağlı rəsmi mövqeyi necədir?

- Düşünürük ki, münaqişə yalnız sülh yolu ilə həll olunmalıdır. Bu mövqe ölkəmin Konstitusiyasının əsas müddəalarına əsaslanır və Braziliya xarici siyasətinin əsas prinsipidir. Biz ATƏT-in Minsk qrupunun səylərini, BMT-nin Dağlıq Qarabağ münaqişəsi ilə bağlı dörd qətnaməsini dəstəkləyir, həmçinin hər iki tərəfdən qaçqın və məcburi köçkünlərin hüquqlarının müdafiəsinə qarantiya verilməsini zəruri sayırıq.

- Braziliyalılar Azərbaycanı tanıyırmı?

- Sözsüz. Braziliyalıların bu marağı son illər artmağa başlayıb, çünki Azərbaycan mühüm beynəlxalq idman turnirlərinin və mədəni-kütləvi tədbirlərin keçirildiyi mərkəzə çevrilib. Məsələn, braziliyalılar «Eurovision» müsabiqəsinin Bakıda keçirilməsini bildikdən sonra ölkəniz barədə daha çox məlumat əldə ediblər. Bundan başqa bu ilin sentyabrında 17 yaşadək qadınlar arasında futbol üzr dünya çempionatı Azərbaycanda keçiriləcək. Azərbaycanlılar və braziliyalıların musiqiyə və idmana sevgisi eyni dərəcədədir.

- Bu gün Azərbaycanda nə qədər Braziliya vətəndaşı yaşayır və işləyir?

- Yerli icmamızın sayı o qədər də böyük deyil. Konsulluq şöbəmizin məlumatına görə, hazırda Azərbaycanda 40-a yaxın Braziliya vətəndaşı var, onların əksəriyyəti idmançılardır. Biz braziliyalı idmançıların Azərbaycan milli komandasında çıxış etməsində qürur hissi keçiririk.

- Ölkəmizdə fəaliyyət göstərən Braziliya şirkətləri barədə nə deyə bilərsiniz?

- Braziliyanın aparıcı biznes qrupları artıq ölkənizə səfər edib və Azərbaycanda mağazalar açmaqda maraqlıdırlar. Bundan əvvəl isə Braziliyanın Andrade Gutierrez şirkəti OCGP SOCAR forumunun dörd qızıl sponsorundan biridir. Qeyd etmək istəyirəm ki, Andrade Gutierrez Braziliyada infrastruktur, energetika, nəqliyyat, tikinti və dogər istiqamətlər üzrə əsas şirkətlərdən biridir və 40-dan artıq ölkədə 1000-dən çox layihə gerçəkləşdirir.

- Bildiyim qədər, bu, Azərbaycana ilk səfərinizdir, artıq iki həftədən artıqdır Bakıdasınız. Təəssüratlarınızı bölüşə bilərsiniz?

- Bakıya gəlməzdən əvvəl bir dostum mənə kiçik bir elektron məktub göndərdi. O mənə gözəl, inkişaf etməkdə olan Bakıdakı fəaliyyətimdə uğurlar diləyirdi. Azərbaycana gəldikdən sonra isə ona yazdım ki, Bakının yazı doğrudan da gözəldir, paytaxtın parklarındakı minlərlə zanbaq və digər çiçəklər Bakını təkcə gözəlləşdirmir, həm də çiçəklənən şəhərə çevirir.

Xalq Cəbhəsi.- 2012.- 25 aprel.- S.11.