Gənc müğənninin uğuru

İslam Qasımov «Paris səması»nı fəth edib

Fransanın paytaxtındakı «Gimnaziya» teatrında «Paris səması» adlı beynəlxalq mahnı festivalı keçirilib. Rusiya, Belarus, Ukrayna, Qazaxıstan, Özbəkistan, Moldova, Fransa, İsveçrə və digər ölkələrdən müxtəlif yaş qrupunda 300-dən artıq ifaçının iştirak etdiyi mötəbər musiqi yarışmasında ölkəmizi Azərbaycan Dövlət Uşaq Filarmoniyasının solisti İslam Qasımov təmsil edib. Festivalda rəqs, teatr, estrada və akademik vokal, musiqi alətlərində ifa nominasiyaları üzrə qaliblər müəyyənləşib.

Akademik vokal nominasiyasında gənc azərbaycanlı vokalçı İslam Qasımov görkəmli bəstəkar Tofiq Quliyevin «Bakı haqqında mahnı» və italyan bəstəkarı E.Kurtisin «Sorenteya qayıt» əsərlərini ifa edib. Gənc azərbaycanlı vokalçının ifası münsiflər heyəti tərəfindən birinci yerə layiq görülüb, onun müəllimi Məryəm Babayevanın əməyi yüksək qiymətləndirilib.

Azərbaycan Milli Konservatoriyasının dosenti Məryəm Babayeva İslam Qasımovun eyni zamanda Milli Təhlükəsizlik Nazirliyinin nəzdindəki musiqi məktəbinin dördüncü sinfinin vokal şöbəsində təhsil aldığını bildirərək qeyd edib ki, beynəlxalq festivalda ilk dəfə gücünü sınayan gənc vokalçı Azərbaycanda dəfələrlə uğurlu çıxışları ilə seçilib: «Onun filarmoniyada dövlət kamera orkestrinin müşayiəti ilə çıxışı yaddaqalan olub. Gənc vokalçının 2010-cu ildə Heydər Əliyev Fondunun təşəbbüsü ilə keçirilən «Qala» festivalında və 2011-ci ildə Bakıda ölkəmizin qonağı olan məşhur italyan müğənnisi Roberino Loretti ilə birlikdə ifa etdiyi mahnılar musiqisevərlər tərəfindən rəğbətlə qarşılanıb. İnanıram ki, istedadlı şagirdim gələcəkdə yeni-yeni uğurlar qazanacaq və təmsil etdiyi ölkənin mədəniyyətinə şanlı səhifələr yazacaqdır».

Xatırladaq ki, 2011-ci ilin fevral ayında dünya şöhrətli italyan müğənnisi, əfsanəvi Robertino Loretti Azərbaycan tamaşaçıları ilə ilk dəfə Bakı səhnəsində solo konsertə gələndə əfsanəvi tenorun konsertini Azərbaycan Dövlət Uşaq Filarmoniyasının solistləri Emin Eminzadə «Jamayka» və İslam Qasımov «O Sole mio» mahnısı ilə açdılar. Həmin gənc vokalistlər ifalarından sonra tamaşaçıların marağına səbəb olublar. Həmin çıxışdan sonra italiyalı müğənni Emini və İslamı «Azərbaycanın Robertinosu» adlandırıb və onların istedadına heyran olduğunu bildirib.

Təcrübəli sənətkarın fikrincə, ümumiyyətlə, hər bir insanda istedad tapmaq olar. İslam və Emini isə başqa bir sahəni öyrənsə də, bacarığına görə irəliləyəcək. Sadəcə olaraq, gərək onların olduğu mühit, çevrə peşəkar olsun. «Onlar bacarıqlı və istedadlıdırlar. Müəllimələrinin üzərinə düşən isə həmin bacarığı, istedadı üzə çıxarmaq və düzgün yönləndirməkdir. Bu mənada, uşağın istedadının üzə çıxarılmasında əsas səbəbkar başının üstündə dayanan müəllimi olmalıdır.

Artıq dörd ildən artıq bir müddətdə İslam Qasımova vokalın sirrlərini öyrədən Məryəm xanım qəzetlərdən birinə verdiyi müsahibədə qeyd edib ki, məşhur sənətkarın sözlərindən sonra İslama ümidi artıb: «İslam hazırda Arif Hüseynzadə adına 20 saylı məktəbdə təhsil almaqla yanaşı eyni zamanda Azərbaycan Dövlət Uşaq Filarmoniyasının solistidir. 2009-cu ildə Azərbaycan Dövlət Uşaq və Gənclər Xalq Çalğı Alətləri Orkestrinin solisti kimi musiqi fəaliyyətinə başlayıb. İslam indi Milli Təhlükəsizlik Nazirliyinin nəzdindəki musiqi məktəbində vokal şöbəsində təhsil alır».

Gənc musiqiçi İslam Qasımovun müəllimi Məryəm Babayeva uşaqlıqdan musiqi duyumu ilə həmyaşıdlarından fərqlənib. İncəsənət sahəsinə olan meyli onu o vaxtkı Ü.Hacıbəyov adına Dövlət Konservatoriyasına gətirib çıxarıb. 1988-ci ildə bu təhsil ocağını bitirən müsahibimiz təhsil arxasınca Moskvaya gedib. Hazırda Bülbül adına orta ixtisas musiqi məktəbində, Bakı Musiqi Akademiyasında, Mədəniyyət və İncəsənət Universitetində dərs deyir. Bakı Musiqi Akademiyasının dissertantıdır. Professor Ramiz Zöhrabovun rəhbərliyi altında «Rəşid Behbudovun ifaçılıq üslubu» adlı elmi işini başa çatdırıb. Azərbaycan Milli Konservatoriyası, İncəsənət Universiteti və Bülbül adına orta ixtisas musiqi məktəbinin müəllimi, dosent Məryəm Babayeva həmin görüşdən dərhal sonra şəhərimizin qonağı olan SSRİ Xalq artisti Elena Obraztsovadan yaradıcılıq təklifi alıb. Xatırladaq ki, müğənni filarmoniyada verəcəyi konsertdən öncə ustad dərslərində iştirak edib. Burada o, Bakı Musiqi akademiyasının tələbələri, Bülbül adına orta ixtisas musiqi məktəbinin şagirdləri, Opera və Balet, eyni zamanda Xor kapellasının solistlərinin ifasını dinləmişdi. İki günlük dinləmələdən sonra növbəti gün filarmoniyada onun konsert proqramı təqdim olunub. Səhnə arxasında Məryəm Babayeva ilə görüşən E.Obraztsova ona qızıl güllər təqdim edib və təklifini diqqətinə çatdırıb.

Oktay

Xalq cəbhəsi.-2012.- 12 iyul.- S.11.