«Tarixini bilməyən xalq məhvə məhkumdur»

«Azərbaycan» qəzeti «Azərbaycanlıların soyqırımı: tarixin qanlı salnaməsi» adlı yeni ikicildli kitabın təqdimat mərasimini keçirdi

Dünən Beynəlxalq Mətbuat Mərkəzində «Azərbaycan» qəzetinin təşkilatçılığı ilə «Azərbaycanlıların soyqırımı: tarixin qanlı salnaməsi» ikicildli kitabın təqdimat mərasimi keçirilib.

Tədbiri giriş sözü ilə açan «Azərtac» Dövlət Agentliyinin baş direktoru Aslan Aslanov bildirib ki, təqdimatı keçirilən kitabın ideya müəllifi Azərbaycan Respublikasının Prezident Administrasiyasının rəhbəri, akademik Ramiz Mehdiyev, kitabın redaktoru Prezident Administrasiyasının ictimai-siyasi məsələlər şöbəsinin müdiri, tarix elmləri doktoru Əli Həsənov, buraxılışa məsul olan şəxs isə «Azərbaycan» qəzetinin baş redaktoru, millət vəkili Bəxtiyar Sadıqovdur. Kitab Azərbaycan xalqının ümummilli lideri Heydər Əliyevin xatirəsinə ithaf olunub: «Bu kitabı vərəqləyən hər bir şəxs mənfur qonşuların Azərbaycan xalqı qarşısına gətirdiyi faciələrin tarixi köklərinə bir daha nəzər salacaq. Erməni faşizminin xislətinə və erməniliyin dərinliyini bir daha dərindən dərk edəcəklər. Kitabda toplanan məsələlərin əhatə dairəsini göstərmək üçün birinci cildin bəzi başlıqlarını misal gətirmək kifayət edər. Son illərdə erməni vəhşiliyinin səbəb və nəticələri, Azərbaycanın əzəli torpaqlarında Ermənistan dövlətinin yaradılması, xalqın milli-mədəniyyət nümunələrini, toponimlərin özününküləşdirilməsi barədə tarixi faktlara əsaslanan çox dəyərli əsərlər yazılıb. Bu gün təqdimatı keçirilən kitab isə yeni yazılan kitablar arasında xüsusi yer tutacaq».

«Azərbaycan» qəzetinin baş redaktoru, millət vəkili Bəxtiyar Sadıqov isə bildirib ki, 20 il müstəqillik tarixinə malik olan Azərbaycanda iqtisadi, siyasi və hüquqi islahatlar həyata keçirilib: «20 il ərzində Azərbaycanın həll edə bilmədiyi ən mühüm problem Dağlıq Qarabağ münaqişəsidir. Azərbaycan xalqının tarix boyu başına gətirilən faciələrin dünya ictimaiyyətinə çatdırılmasına hər bir ziyalı öz töhfəsini verməlidir. Təqdimatı keçirilən kitab da bütün bu faktların birgə toplusudur və yeni nəşr jurnalistlər, siyasətçilər üçün nəzərdə tutulub. Gələcəkdə bu kitab ingilis və rus dillərinə tərcümə olunaraq dünya ictimaiyyətinə çatırılacaq».

AMEA Tarix İnstitutunun direktoru, millət vəkili Yaqub Mahmudov isə qeyd edib ki, tarixini bilməyən xalq məhvə məhkumdur. Onun sözlərinə görə, hər bir xalq öz tarixini bilməli, ona yiyələnməlidir: «Belə olduqda həmin xalq məğlubedilməz olur. Bu baxımdan bizim ən böyük qüsurumuz öz millətimiz, xalqımızın tarixi, qanlı səhifələrini bilməməsidir. Bu gün hadisələr, soyqırımlar barədə Avropa və ya digər ölkələrin xəbərsiz olduğunu demək olmaz. Hazırda Ermənistan bir çox ölkələr tərəfindən müdafiə olunur. Ona görə də ölkə tarixində bu cür tədqiqatların aparılmasının çox böyük əhəmiyyəti var. Bu əsərin, ikicildliyin müasir dövrdə soyqırımların, faciələrin öyrənilməsi baxımından çox böyük əhəmiyyəti olacaq».

Tədbirin davamında çıxış edən millət vəkilləri Aydın Mirzəzadə, Fəzail İbrahimli və başqaları yeni nəşrin əhəmiyyəti barədə fikirlərini bölüşüblər.

Prezident Administrasiyasının (PA) ictimai-siyasi məsələlər şöbəsinin müdiri Əli Həsənov isə çıxışında yeni kitab nəşrlərilə bağlı bir sıra məsələlərə aydınlıq gətirib: «Bəzən yanıma gəlib deyirlər ki, Heydər Əliyev, yaxud İlham Əliyev haqqında kitab yazmışam, amma icazə vermirsiniz ki, çap etdirək». APA-nın xəbərinə görə, bunu Prezident Administrasiyasının (PA) ictimai-siyasi şöbəsinin müdiri Əli Həsənov «Azərbaycanlıların soyqırımı: tarixin qanlı salnaməsi» kitabının təqdimat mərasimində çıxışında bildirib.

«Azərbaycanlıların soyqırımı: tarixin qanlı salnaməsi» kitabını nümunə göstərən PA rəsmisi bildirib ki, əslində Heydər Əliyev, İlham Əliyev haqqında belə samballı əsərlər yazılmalıdır: «Bizim istəyimiz budur ki, Heydər Əliyev haqqında məhz belə kitablar yazılsın. Heydər Əliyev haqqında kitab yazıb, sonra da bunu spekulyasiyaya çevirənlər var. Bəzən bu işə çox hörmətli adamlarımız da qoşulur. Cildlərlə kitablar yazırlar və həmin kitablar yalnız onu yazanın kitabxanasında özünə yer tapır. Əslində heç bir ictimai yükü olmayan kitablar yazmaqdansa, Qarabağın, Naxçıvanın tarixi ilə əlaqədar, ermənilərin azərbaycanlılara qarşı törətdiyi soyqırımı barədə salnamələr yazmaq lazımdır. Mən məmnuniyyətlə bir gəncin adını çəkmək istəyirəm, Avropa Azərbaycanlıları Cəmiyyətinin sədri Tale Heydərovun dəstəyi ilə salnamələrin Rusiyanın, dünyanın müxtəlif ölkələrinin arxivlərindən toplanıb Azərbaycanda dərc olunması əslində Azərbaycanın ümummilli lideri haqqında əsl kitabdır».

Xalq Cəbhəsi.- 2012.- 30 mart.- S.3.