Turizm sahəsində xarici əlaqələr genişlənir

Bu sahədə 57 dövlətlə saziş imzalanıb

Azərbaycan turizm sahəsində dünya ölkələri ilə 60-a yaxın saziş və saziş layihəsi imzalayıb. Azərbaycan Mədəniyyət və Turizm Nazirliyindən APA-ya verilən məlumata görə, turizm sahəsində Azərbaycan 57 ölkə ilə 31 saziş və 28 saziş layihəsi imzalayıb. Bu ölkələrin 27-si Avropa, 23-ü Asiya, 4-ü Afrika, 2-si Cənubi Amerika, 1-i isə Şimali Amerika ölkələri olub. Belə ki, Avropa regionunda Azərbaycan Andorra, Avstriya, Belarus, Bolqarıstan, Böyük Britaniya, İspaniya, İsveçrə, İtaliya, Yunanıstan, Latviya, Litva, Makedoniya, Malta, Macarıstan, Moldova, Monteneqro, Polşa, Rumıniya, Rusiya, San-Marino, Serbiya, Türkiyə, Ukrayna, Fransa, Xorvatiya, Gürcüstan və Çexiya ilə, Asiya regionunda Birləşmiş Ərəb Əmirlikləri, Bəhreyn, Bruney, Qazaxıstan, Qətər, Qırğızıstan, İndoneziya, İordaniya, İraq, İran, İsrail, Yaponiya, Koreya, Küveyt, Malayziya, Pakistan, Səudiyyə Ərəbistanı, Suriya, Tacikistan, Filippin, Oman, Özbəkistan və Çin, Afrika regionundan Mavritaniya, Mərakeş, Misir və Tunis, Cənubi Amerikadan Argentina və Kuba, Şimali Amerikadan isə Meksika ilə saziş və saziş layihələri imzalayıb. Siyahıda elə ölkələr mövcuddur ki, Azərbaycanla onun arasında turizm sahəsində iki sənəd imzalanıb.

Turizm sektorundakı rəqabət Azərbaycandakı turist şirkətlərinin sayının azalması ilə nəticələnir. Bir neçə il əvvəl Azərbaycanda turizm şirkətlərinin sayı 250-300-ə çatmışdı, indi isə bu rəqəm 200 ətrafındadır. Turizm şirkətlərinin normal fəaliyyət göstərməsi üçün onların maddi imkanları olmalıdır. Mədəniyyət və Turizm Nazirliyinin şöbə rəisi Aydın İsmiyevin sözlərinə görə, bütün dünyada turizm mübadiləsinin böyük hissəsi qonşu ölkələrin payına düşür. Belə ki, Azərbaycana gələn turistlərin 50-55%-i ətraf xarici ölkələrdən – Rusiya, Türkiyə, İran Gürcüstan və s.-dən gəlir. Bu baxımdan regional turizmin inkişaf etdirilməsi Azərbaycan üçün çox vacibdir. Bundan başqa, statistika göstərir ki, uzaq ölkələrdən gələn turistlər gəldikləri regionda bir yox, bir neçə ölkəni gəzməkdə maraqlı olurlar: «Məsələn, əvvəl Azərbaycana gəlirlər, sonra Gürcüstana, sonra isə Türkiyəyə gedib, oradan öz vətənlərinə yola düşürlər. Buna görə də region ölkələri xarici turistlərin daha da aktiv cəlb olunması üçün birgə layihələrin reallaşdırılmasında maraqlıdırlar. Bu baxımdan belə regional marşrutlar çox aktualdır».

Hər halda hökumət bu il turizm məsələsində daha çox «Eurovision 2012″ mahnı müsabiqəsinə ümid edir. Mədəniyyət və Turizm Nazirliyinin turizm şöbəsinin müdiri Aydın İsmiyev bildirib ki, bu il Azərbaycana gələn turistlərin sayının 2011-ci ildəkindən çox olacağı gözlənilir: «Ötən il Azərbaycana 2 mln. əcnəbi gəlib ki, onlardan da 1,8 mln. nəfəri turist olub. Bakıda keçiriləcək «Eurovision 2012″ mahnı müsabiqəsi ilə əlaqədar və ümumiyyətlə, son zamanlar Azərbaycana xarici vətəndaşların marağı artıb. Təkcə «Eurovision» mahnı müsabiqəsi ilə əlaqədar Azərbaycana 40 ölkədən çox təmsilçi gələcək. Ümid edirik ki, bu il ölkəmizə gələn turistlərin sayı ötən ildəkindən çox olacaq». Ölkədə fəaliyyət göstərən turizm şirkətləri lazım olan qədər turistə xidmət göstərməyə hazırdır. Hotel biznesi özəl sektor olsa da, mehmanxanalara qiymətlərin sabit saxlanılması tövsiyə olunub. Hazırda ölkədə 178 turizm şirkəti və 312 hotel fəaliyyət göstərir. Hotellərdə yerlərin sayı 11 mindən artıqdır.

Türkiyə bu il Azərbaycandan 600 mindən çox turist gözləyir. Türkiyəyə hər il Almaniyadan 4 milyon, Rusiyadan da həmin sayda turist gəlir. 2011-ci ildə Azərbaycandan Türkiyəyə 580 min turist gəlib. Bu il isə bu say 600 mindən çox ola bilər. Maraqlıdır ki, son illər ölkəmizdən Türkiyəyə turist axını artır. Əslində Azərbaycanda turizm xidmətləri hədsiz dərəcədə baha olduğundan azərbaycanlılar ölkə daxilində istirahətdən daha çox qonşu ölkələrə – Türkiyə, Rusiya və Gürcüstana getməyə üstünlük verirlər. Türkiyədə turizm sənayesi son 30 ildə çox böyük sürətlə inkişaf edib. Azərbaycan hökuməti arzulayır ki, 15-20 ilə Türkiyənin səviyyəsinə çatsın. Ancaq çətin ki, biz bu gedişlə Türkiyəyə çata bilək. Əslində bizi heç onlarla müqayisə etmək mümkün deyil. Çünki Türkiyədə dövlət büdcəsinin gəlirlərinin üçdə biri turizmin hesabına formalaşır. Doğrudan da son illər Azərbaycanda infrastrukturun yenidən qurulması, müasirləşdirilməsi turizmin inkişafına təkan verir. Lakin başlıca problem – turizm xidmətlərinin rəngarəngliyinin, səviyyəsinin yüksək olmaması və qiymətlərin çox bahalığı həll olunmamış qalır.

Ölkədaxili qiymətlər fantastikdir. Azərbaycanın səfalı güşələrində – Qəbələ, Quba, Qusar, Şamaxı, Qax və s. bir günlük orta səviyyəli istirahət 100 manata başa gəlir. Bu hesabla ölkəmizdə bir həftəlik istirahət 800-1000 dollardır. Hətta Azərbaycan vətəndaşları üçün ölkə daxilində istirahətdən xarici turlar daha əlverişlidir. Təsadüfü deyil ki, Azərbaycan özü müalicəvi turizm məkanları (mineral sularla bol) ilə zəngin olsa da, insanlar Rusiya kurortlarına üz tuturlar. 500 dollara yol pulu da daxil Rusiyada iki-üç həftə həm istirahət etmək, həm də müalicə almaq mümkündür. Bütün bunları nəzərə alsaq, hətta hökumət yerli turistləri əlverişli qiymətlər və yüksək xidmət hesabına ölkə daxilində saxlaya bilmir.

Hətta Ukrayna da Azərbaycandan turist gözləyir. Bakıda Ukraynanın Krım Muxtar Respublikasının turizm imkanlarına həsr olunmuş tədbirdə Krım Muxtar Respublikası kurortlar və turizm nazirinin müavini Nikolay Marinov bildirib ki, Krım ərazisində 3,5 min hotel, pansionat və sanatoriya fəaliyyət göstərir, hər il 100-ə yaxın tibbi-kurortoloji texnologiya tətbiq olunur, yolların təkmilləşdirilməsi üzrə aktiv işlər aparılır: «Krımın Kurortlar və Turizm Nazirliyi Bakını prioritet tərəfdaş regionlardan sayır. Ona görə də Bakıdan olan turistlərin tələbatına uyğun olaraq xüsusi tibbi proqramlar və turist ekskursiyaları təşkil etməyə hazırıq». Ukraynanın Azərbaycandakı səfiri Aleksandr Mişenko qeyd edib ki, «Azərbaycan Hava Yolları»nın (AZAL) hesablamasına əsasən, 2015-ci ildə Bakı-Krım ikitərəfli turist axınının həcmi 60 min nəfər təşkil edəcək. Qeyd edək ki, Krım nümayəndə heyətinin Bakıya səfəri Krım Muxtar Respublikasının baş naziri Anatoli Mogilyovun göstərişi ilə baş tutub. Səfər Krımın Kurortlar və Turizm Nazirliyi və Ukraynanın Azərbaycandakı səfirliyi tərəfindən təşkil olunub.

Tərlan

Xalq Cəbhəsi.- 2012.- 2 may.- S.12.