Azərbaycan kinosunun dünyəvilik qayğıları
Aydın Kazımzadə: «Dünyəvilik
mövzusuna kinematoqrafiyamızda meyl artmaqdadır»
Sivil vətəndaş cəmiyyəti
ideyası filmlərdə öz ifadəsini tapmalıdır
İnsanların
biri-birinə münasibətinin sənətdə ifadəsini
vermək olduqca çətindir. Kino sənəti bu
baxımdan maraqlı olduğu dərəcədə də hər
zaman orijinallıq tələb edir. Azərbaycanda hüquqi
dövlət quruculuğu prosesinin, tarixinin, habelə ayrıca
olaraq Azərbaycan Xalq Cümhuriyyətinin tarixinin, o dövrdə
müstəqil dövlətimizin qurulması istiqamətində
görülən işlərin kinoya gətirilməsi olduqca gərəklidir.
Kino hadisələrin, ideyanın insana, kütləyə
çatdırılmasında əvəzsiz rol oynayır.
İndiyə kimi ayrı-ayrı sənədli filmlər
çəkilib və indi də çəkilir. Ümumiyyətlə,
bu gün sənədli-bədii filmlərin gərəkliyi
daha da artır. Sabahımızda şübhəsiz, bu yöndə
ideyalar, bu ideyaların gerçəkləşdirilməsi cəhdləri
artacaq.
Tanınmış
kinoşünas Aydın Kazımzadə bildirir ki, sovet
dövründə illər uzunu Azərbaycan Xalq Cümhuriyyətinin
guya xalqa, insan hüquqlarına qarşı olduğuna dair
filmlər çəkilir, yaxud da filmlərdə bu mövzuya
toxununulurdu: «Sovet hakimiyyəti çalışırdı ki,
Müsavat hakimiyyətini mümkün qədər vursun və
buna nail olmuşdu da. Ancaq indi artıq 20 ildir ki, Azərbaycan
müstəqil dövlətdir və sovet ideologiyasının
diktəsindən kinomuz da qurtulub.
Cümhuriyyət
dövrü dövlətçiliyimizin gördüyü
işlər çəkilən sənədli filmlərdə
ifadəsini tapıb. Şübhəsiz, yeni-yeni sənədli
filmlər çəkiləcək. Bu mövzuda bədii
filmimiz hələ ki, yoxdur. «Əli və Hino»nun
ekranlaşdırılması təəssüf ki, Azərbaycanda
gerçəkliyini tapmadı. Ancaq artıq amerikanlar bu
mövzuya girişiblər. Bu gün Azərbaycan kinosuna
cavanlar gəliblər. Bu filmlərdə tarixi
keçmişimiz öz əksini tapmaqdadır. Mehriban Ələkbərzadənin
filmləri bu sarıdan diqqətçəkəndir».
Kinoda
vətəndaş cəmiyyəti ideyası Azərbaycan filmlərində
necə ifadəsini tapıb? Məlumdur ki, Azərbaycan
insanının mental cəhətləri milli olduğu dərəcədə
bəşəriliyi ifadə edib. Tarixən
yaşamımızda, ictimai münasibətlərdə
müşahidə edilən keyfiyyətlərimiz bir millət
olaraq özümüzə, başqa millətlərə olan
münasibətimiz bu və ya digər dərəcədə
kinofilmlərimizdə də əksini tapıb. Doğruluq, səmimilik,
halalıq, doğmalıq, həyanlıq bu kimi keyfiyətlərimizdəndir.
20 Yanvar hadisələri zamanı «Salnamə»
studiyasının çəkdiyi canlı sənədli filmlərdə
insanların milli həmrəyliyi vətəndaşlıq
duyğusunun öndə olduğunu, xalqımızın bu
duyğunu ruhən yaşadığını deməyə əsas
verir.
Aydın
Kazımzadə daha sonra deyir: «90-cı illərin hadisələri
öz təsirini sənətin müxtəlif sahələrində
göstərdi. Bir müddət Azərbaycan kinosu texniki
imkanlar sarıdan olduqca çətin bir vəziyyətdə
idi. Düzdür, müəyyən şəxsi kanallar vasitəsilə
rejissorlarımız filmlər çəkə bildilər.
Ancaq az sonra gördülər ki, çəkilən filmlər
maddi xeyir gətirmədi. Şübhəsiz, bu tipli filmlərdə
ideoloji məqamlar yox idi. Sonradan dövlət yenidən filmlərlə
bağlı məsələni nəzarətinə
götürdü. Kinoya dövlət himayəsi məsələsi
təbii şəkildə gündəmə gəldi. Bu da o
zaman baş tutdu ki, Azərbaycanın dövlət müstəqilliyi
oturuşdu, iqtisadi inkişaf sarıdan irəlilədik.
Rejissorlarımız dövrlə bağlı hadisələri
ekrana gətirməyə başladılar. Qarabağ mövzusu
təbii şəkildə filmlərimizə gəldi. «Vətəndaş
cəmiyyəti» deyəndə insanların biri-birinə olan
qarşılıqlı, doğma münasibətləri nəzərdə
tutulur ki, bu da filmlərimizdə əksini tapıb. Məsələn,
bu mənada «Nə gözəldir bu dünya» filmində
ümumi məzmun bundan ibarətdir ki, maddi problemlər səbəbindən
psixiatriya xəstəxanasının xəstələrini evə
buraxmağa məcbur olurlar. Baş həkim xəstələrini
yoluxmağa gedir, onların evlərində yaxşı
münasibətlə qarşılaşmadıqlarını
görür. Filmin sonunda xəstələr yenidən xəstəxanaya
qayıdırlar. Bunlar şübəsiz, axtarışlar idi və
bu mənada belə bir qənaət hasil olur ki, insanların
biri-birinə doğma münasibətindən böyük sərvət
yoxdur. Sovet dövründən fərqli olaraq
rejissorlarımız bu filmlərdə həyatı olduğu
kimi göstərməyə başladılar. Yəni cəmiyyətin
içərisində pisi də var, yaxşısı da. Bu
gün artıq Azərbaycan kinosuna dövlət
qayğısı daha da artmaqdadır. MDB ölkələrində
dövlətlər kinoya demək olar, pul buraxmırlar. Ancaq
bizdə kino dövlətin himayəsindədir».
Kinolarımızda
milli xarakterimiz, insana, həyata, dünyaya münasibətimiz
yaşayır. Müstəqillik dönəmində dünyəvilik
məsələsinin kinoda ifadəsinə gəlincə,
Aydın Kazımzadə deyir: «Son illərdə dünyəvilik
mövzusuna kinematoqrafiyamızda meyl artmaqdadır. Təbii ki,
burada millilik məsələsi gözardı edilməməlidir.
«Sahə» filmi millilikdən daha çox dünyəvi filmdir.
Bu film müxtəlif dünya ölkələrində uğur
qazanıb. Bu filmlə Azərbaycan kinosunun yeni bir mərhələ
təşkil etdiyini demək olar. Vaxtilə «Bir cənub şəhərində»
filmi Azərbaycan miqyasından çıxıb SSRİ
miqyasında tanınan bir film olmuşdu.
Ancaq
bu filmi imperiyadan qırağa çıxmağa qoymadılar.
Habelə Vaqif Mustafayevin «Yaramaz» filmi ilə Azərbaycan
kinosunun yeni bir xətti başlandı. Dünyada baş verən
proseslər bu və ya digər dərəcədə təsirini
Azərbaycanda da göstərir. Ancaq mümkün qədər
hər bir xalq öz varlığını, keyfiyyətini
qoruyub saxlamağı bacarmalıdır. Başqa tərəfdən
də xalqımızın ruhundan gələn keyfiyyətləri
istər-istəməz bəşəri ölçünü
təsdiq edir. Hər millətin öz xarakteri var. Son zamanlar
«Qala» filmi də dünyada diqqət çəkməkdədir.
Şübhəsiz, sənədli filmlər xalqın ruhunu,
dövlətin dünyəviliyini ifadə etməkdə daha
gözəl rol oynaya bilər və bu,
çağımızda çox gərəklidir». Sənədli
filmin özündə bir bədiilik var. Canlı sənədlərin
vasitəsilə hər hansı bir hadisəni, xüsusən də
dövlətçiliyin təsdiqi ilə bağlı
ideyaları sənədli-bədii filmlərdə təqdim etmək
daha da ciddi nəticələr verəcək.
Aydın
Kazımzadə deyir: «Sənədli filmləri «həyatın
güzgüsü» adlandırırlar. Bədii filmə baxmaqla
sənədli-bədii filmə baxmaq arasında fərq
çoxdur. Qısametrajli filmlərimiz belə dünyada
yaxşı qarşılanmaqdadır. «Vahimə» filmi bu
sıradandır».
Millilik
dövlətin varlığını qoruduğu dərəcədə
hədsiz gərəklidir. Dünyəvilik dövlətin xalq
ruhunun ifadəsi olduğunu təsdiq etməlidir. Millilikdən
ayrı götürülmüş dünyəvilik yoxdur.
Dövlət ilk sırada milli olduğu dərəcədə
dünyəvidir. Bu mənada bundan sonrakı dönəmlərdə
dünyəvilik məsələlərinin sənətdə nə
dərəcədə təəssübkeşliklə
anlaşılmasının mühüm əhəmiyyəti
var. Dövlət milliliyi qoruduğu dərəcədə vətəndaş
cəmiyyətinin bünövrəsini də möhkəmlətmiş
olur. Hüquqi dövlətçilik belədə təsdiq
olunur. Bunların canlı, yaradıcı şəkildə
çağımızda kinoda ifadəsini tapması çox
vacibdir. Bu mənada rejissorlarımız olduqca yaradıcı
olmalıdırlar. Əgər kinoda millilik yoxdursa, bəşərilik
də yoxdur. Çağdaş dövrdə kino sənətində
ümumi şəkildə sənət prinsiplərindən
danışılır. Əgər sənətdə, konkret
kinoda halımızı qoruya bilməsək, o zaman bu,
sabahımız üçün daha da böyük çətinliklər
yaradacaq. Dünyanın halı qlobalçılıq
yönüdür. Qlobalçılıq milliliyə
qarşıdır.
Kinoçularımız
o dərəcədə milliliyə, dövlətçiliyə
bağlı olmalıdırlar ki, belə məsələlərdə
yanlışa yol verməməlidirlər. Millilik, dövlətçilik
xəttinin kinoda yaşaması, təsdiqi son dərəcə
gərəklidir. O ideyalar ki, kitablarda, canlı sənədlərdədir,
həmin ideyalar kino sənətində yenidən
canlandırılmalı, ona nəfəs verilməlidir.
Azərbaycan
tarixinin xüsusən ötən yüzildə elə məqamları
var ki, onları kinoya gətirmək olar. Azərbaycan
insanının milli mücadiləsi, Azərbaycan
yazarlarının milli mücadilə çabaları, Azərbaycan
Xalq Cümhuriyyəti qurucularının çox zaman faciəviliklə
bitən taleləri, mübarizələri, vətəndaş
cəmiyyəti, hüquqi dövlətçiliklə
bağlı hələ də tam gerçəkləşməyən
ideyaları kinomuza gəlməli, bu, yöndə filmlər
çəkilməlidir.
Göründüyü
kimi, kinoçularımızın öz həyatımızdan
götürməyə və dünyaya orijinal mövzu olaraq təqdim
etməyə imkanları çoxdur. Ola bilər, bizim
«özümüzdən deməyimiz» dünyanın xoşuna gəlməsin.
Çünki Azərbaycan kimi ölkələrin dünyada hər
mənada sevilməsi olduqca çətindir. Dünya Azərbaycanın
daxili-mənəvi potensialından gözəl xəbərdardır.
Bizi sevməyən ölkələr bizi bizdən yaxşı
tanıyırlar. Bu gün Amerika Hollivud vasitəsilə özünün
«demokratik humanizmini» yeridir. Fransa da həmçinin.
Başqa
inkişaf etmiş ölkələrin də kino sənətində bunu aydınca müşahidə edə bilərik. Bu yöndə qayğılarımız
kino sənətində
gerçəkləşməlidir. Bu işdə Azərbaycan
kino sənəti daim öz töhfəsini
verməlidir.
A.Kazımzadə bildirir ki, kinonun imkanları tükənməzdir: «Gürcülərin,
qırğızların, özbəklərin
kinosu çox inkişaf edib. Gürcü filminə baxan kimi bilirsən ki, bu, gürcü
filmidir. Müəyyən bir dövr gəlir
ki, kinoda geriləmələr olur.
Müəyyən bir dövr də gəlir ki, kino təsəvvürəgəlməz
dərəcədə inkişaf
edir. Bir dəfə Həsən
Seyidbəyli «O qızı
tapın» filmindən bir xeyli hissəni
kəsib atdı.
Ona sual verəndə ki, niyə etdiniz?
Dedi ki, onsuz da Moskva
kəsib atacaqdı. 37-ci ilin xofu
uzun müddət sənətkarlarımızın ağlından çıxmadı.
Bunlar bilirdilər ki, nə olar, nə
olmaz. Ancaq indi rejissorlarımız
ideya sarıdan sərbəstdirlər».
Yazı Azərbaycan Respublikası
Prezidenti Yanında
KİV-in İnkişafına Dövlət Dəstəyi
Fondunun maliyyələşdirdiyi
«Vətəndaş cəmiyyəti,
hüquqi dövlət
quruculuğu prosesi və dünyəvi dövlətçilik prisnsiplərinin
təbliği» layihəsi
çərçivəsində təqdim olunur.
Uğur
Xalq Cəbhəsi.- 2012.- 27 yanvar.-
S.11.