Nə üçün «Türk — islam» idealı?

Seyid Əhməd Arvasi 1932-ci ildə Ağrının Doğubeyazıt mahalında doğulub. Ailə tərəfindən Vanın Baxçasaray (Müküs) qəsəbəsinə bağlı Doğanyayla (Arvas) kəndindəndir. Mühitlərində bu kəndin adına görə «Arvasilər» kimi tanınıblar. Soyadı qanunu çıxdıqdan sonra kəndlərinin adı soyadları oldu. Atası Abdülhakim Arvasidir.

1952-ci ildə Ərzurum Müəllim məktəbindən məzun olub. Bir müddət ibtidai məktəb müəllimliyi etdi. 1958-ci ildə Qazi Təhsil İnstitutu Pedaqogika fakultəsindən məzun olub. Balıkesir və İstanbuldakı Təhsil İnstitutlarında müəllimlik edib. 1979-cu ildə təqaüdə çıxıb. Eyni il Milliyyətçi Hərəkət Partiyası (MHP) Ümumi İdarə heyətinə seçilərək, bu partiyadakı vəzifəsinə 12 Sentyabr 1980 — ci tarixində baş verən dövlət çevrilişinə kimi davam edib. MHP — dən İstanbul senatorluğuna namizəd olub.

«Hər gün» qəzetində, «Türk-İslam ülküsü» başlığı ilə gündəlik məqalələr yazıb. 12 sentyabr çevrilişindən sonra, MHP və ülkücü təşkilatlara görə mühakimə olunub. Mamak Həbsxanasında işgəncə görüb. Həbsdən azad olunduqdan sonra idealist qəzet və jurnallarda yazılar yazıb. Türkiyə qəzetində «Həsbihal» başlığı ilə məqalələri nəşr edilib.

56 illik ömürünün hər dövründə dayanmadan yazıb. 31 dekabr 1988 — ci il tarixində İstanbul Erenköydəki evində vəfat edib.

ƏSƏRLƏRİ:

Türk-İslam ülküsü (3 cild)

Özünü axtaran adam

İnsan və insandan sonra

Dialektikamız və Estetikamız

Şeirlərim

Təhsil sosiologiyası

Şərqi Anadolu gerçəyi

Qabaqcıl Türk milliyyətçiliyinin əsasları,

«Həsbihal» (6 cild) («Həsbihal» daha sonra mövzularına görə bu adlarda nəşr olunub: «İmperializmin oyunları», «Dövlətin dini varmı?», «Qadın və kişi», «İnsanın təkliyi».

Seyid Əhməd Arvasinin məqaləsi

Niyə bu və ya başqa ad altında toplanmağı yox, məhz «Türk-İslam ülküsü»nə bağlanmağı müdafiə edirik? Biz iddia edirik ki, «İmperializm», Türk və İslam dünyasını udmaq üçün ən az iki əsrdən bəri qorxunc bir planlar hazırlayır. Bir tərəfdən mədəniyyət imperializmi ilə bu vətənin övladlarını din və millətinə yadlaşdıraraq öz əməllərinə xidmət edəcək heyətlər hazırlamaqda, digər tərəfdən isə din və milliyyət duyğularını bütün səylərə baxmayaraq tərk etməyən övladlarımızı da bir-birinə qarşı qoymağı planlamaqdadır. Həqiqətən də yer üzündə əzilən və sömürülən bir də «üçüncü dünya» var. Bu dünya, daha çox asiyalı, afrikalı irili — xırdalı dövlətlərə və dövlətciklərə, bəyliklərə, əmrliklərə, federasiyalara bölünmüş millətlərdən ibarətdir. Təəssüflər olsun ki, bu insanların sayı bir milyard yarımdan daha çoxdur. İşin kədərli olan digər bir tərəfi də, bu əhalinin əksəriyyətini müsəlmanlardan ibarət olmasıdır. Bundan başqa çox ağrılı bir gerçəyi də ifadə edək ki, bu əzilən və istismar edilən müsəlmanlar arasında Türk millətinin çox əhəmiyyətli bir hissəsi də var. İmperialist qüvvələr, fürsət tapdıqları zaman zorla, tapa bilmədikləri zaman isə min bir hiylə ilə islam və Türk dünyasını ələ keçirmiş, zənginliklərini yağmalamış, din və millət duyğularını və dəyərlərini məhv etmiş, müqavimət göstərənləri ləkələmək və məhv etmək yolu ilə susdurmuş, öz düşüncəsinə uyğun heyətlər yetişdirmiş, bu millətlərin oyanış, diriliş istəklərini, milli təhsil və inkişaf planlarını baltalamış və bu ölkələri, «əbədi müstəmləkə» statusuna məhkum etmək üçün əlindən gələni əsirgəməmişdir. İmperialist qüvvələr dəhşətli dərəcədə qorxunc bir «mədəniyyət imperializmi» proqramı ilə millətin övladlarını milli tarixlərinə, milli və müqəddəs mədəni dəyərlərinə, milli ideallarına, milli mənfəətlərinə, hətta totem və simvollarına düşmən etməklə kifayətlənmir, öz dəyərlərini bir sivilizasiya və müasirlik ünsürü kimi onların başlarına və vicdanlarına yeridirlər. Beləcə milli və müqəddəs dəyərlərə bağlı millətçilərin qarşısına, bu dəyərlərə əks fikirdə olan yadlaşmış heyətlər çıxarırlar. Bir ölkədə, dəyərlər haçalananda qruplaşmaların da haçalanması və qarşıdurması qaçınılmaz olur. Məhz düşmən, bu nöqtədə fəaliyyətini artırır. Ölkənin və millətin qruplaşmalara bölünməsi üçün beynəlmiləl qüvvələri hərəkətə keçirir. Ölkə artıq bir-birinin boğazından yapışmağa hazır qruplaşmalara bölünübsə, düşmən rahatlıqla at oynada biləcək məqamı tapa bilib deməkdir. Düşmən qarşısındakı qüvvələri parçalayıb, onları bir-birinə düşmən edib, onları bir — biri ilə üz — üzə qoyub, rahat həzm olunan loxma vəziyyətinə gətirmək istəyir. Məsələn, beyinlərdə sanki bir insan, həm «dindar», həm «milliyyətçi», həm də «müasir» ola bilməzmiş kimi bir fikir formalaşdırıb bu dəyərləri bir-birinə zidd proqramlar hökmündə təlqin edib heç nədən üz — üzə dayanan qüvvələr meydana gətirir. Bu oyunlarını, o qədər ustalıqla planlayır ki, tərtiblərini anlamaq üçün bəzən hadisələrin üstündən bəzən əlli və ya yüz il keçməli olur. Məsələn, Osmanlı Türk Dövlətinin parçalanması və Orta şərqin müstəmləkə halına gətirilməsi üçün dinimizin və millətimizin düşmənləri, dinlə millətçilik arasında ziddiyyət və düşmənlik toxumlarını səpdiklərini indi etiraf edirlər. Serg Hatin adlı bir fransız masonunun yazdığı «Les Francs-Maçons» kitabının 127 — ci səhifəsində oxuduğumuza baxsaq İslam dünyasında masonlar Cəmaləddin Əfqanı və Məhəmməd Əbduh kimi «dindar siyasətçiləri» lojalarına üzv edib onların əli ilə dini, milli strukturlarda islahatlar aparıb bütün dünyaya şamil olunan İslam dinini pozmaq, digər tərəfdən «Müsəlman Qardaşlar» (Freres Musulmans) hərəkatı ilə də «İslamda milliyyətçilik yoxdur» təbliğatı ilə millətləri çökdürmək və bununla da çox namərd bir planla bir-birinə zidd islamçı və millətçi kimi süni düşmən düşərgələr yaratmaq istəyiblər. İmperializm bizim dünyamızda bu ziddiyyətdən çox istifadə etdiyini ayrıca yazırlar. Dinimizin və millətimizin düşmənləri din və millət kimi iki müqəddəs varlığımızı, bir-birinə düşmən göstərmək oyunundan asan — asan imtina edəcəyə oxşamır. O halda türk millətçisinin boynuna düşən vəzifə bütün varlığı ilə bu oyunu, hər şeydən əvvəl öz yurdunda pozulmalıdır. Bu ölkədə, süni olaraq bir-birinə düşmən güya türkçü və güya islamçı cəbhələr meydana gətirmək istəyən xain və namərd oyunların qarşısına, bir müsəlman-türk kimi və tarixinə yaraşır bir şəkildə çıxmalıdır. Buna görə türk-İslam mədəniyyətinə, türk-İslam dəyərlərinə, türk-İslam idealına bağlı, Türklük şüur və təmkininə, İslam iman, eşq, əxlaq və əməlinə sahib, Türklüyü bədəni, İslamiyyəti ruhu bilən, millətini texnoloji nailiyyətlərlə dünyanın bir nömrəli dövləti etmək həsrəti ilə çırpınan, Dünya Türklüyünün, İslam dünyasının və bütün məzlum millətlərin ümid yeri olmağa namizəd bir gənclik yetişdirməkdən başqa çarəmiz yoxdur. Din və millət bir — birinə zidd olan dəyərlər deyil. Bu səbəbdən, sintez tezis ilə anti-tezis arasında gedə biləcək bir ifadə olduğuna görə, illərdən bəridir istifadə etdiyimiz «Türk-İslam sintezi» yerinə, «Türk-İslam İdealı» ifadəsini seçdik. Bu ifadədən də israrla istifadə edəcəyik.

Çevirdi: Oktay Hacımusalı

Xalq Cəbhəsi.- 2013.- 11 aprel.- S.11.