«BAXCP sivil bir cəmiyyət arzusundadır»

Söhrab Abdullayev:»Konstruktivlik ideyasını ilk olaraq partiyanın sədri Qüdrət Həsənquliyev cəmiyyətə təqdim edib»

«Azərbaycanda fəaliyyət göstərən siyasi partiyalar ilkin olaraq həmin ideyanı qəbul etməsələr də, zaman keçdi əksəriyyət partiyalar ideyanın əhmiyyətini anlayıb işlərini

bu istiqamətdə qurdular»

Bütöv Azərbaycan Xalq Cəbhəsi Partiyasının baş katibi Söhrab Abdullayevin partiyanın mətbuat xidmətinə verdiyi müsahibəni təqdim edirik.

-Yola saldığımız 2013-cü il BAXCP-nin həyatında hansı əlamətdar hadisə ilə yadda qalıb?

-2013-cü il partiyanın həyatında əlamətdar hadisələrlə yadda qalacaq. Birincisi, BAXCP-nin üçüncü qurultayını keçirdik. 2012-ci ildən başlayan qurultaya ciddi hazırlıqlar, nəhayət, 2013-cü ilin iyununda uğurla başa çatdı. Gecikmənin də başlıca səbəbi Bakı Şəhər İcra Hakimiyyəti tərəfindən bəzi əngəllərin yaradılması, münasib yerin vaxtında ayrılmaması idi. Etiraf olunmalıdır ki, ən təmtaraqlı və sayca çox olan partiya üzvlərinin, eləcə də qonaqların qatıldığı qurultayda Qüdrət Həsənquliyev yekdilliklə yenidən partiyanın sədri seçildi. Eyni zamanda, qurultayda partiyanın sədrinin prezidentliyə namizədliyi irəli sürüldü. Qurultaydan dərhal sonra prezident seçkilərinə hazırlıqlara başladıq. Partiyanın üzvləri bir komanda olaraq fəaliyyət göstərdilər. Həm Qüdrət Həsənquliyevin səlahiyyətli nümayəndələri, həm də 50 nəfərdən ibarət vəkilləri BAXCP-nin namizədinin təbliğatı üçün əllərindən gələni əsirgəmədilər. Seçki marafonu zamanı maarifləndirmə və təbliğat-təşviqat işlərilə mümkün qədər məşğul olduq. Seçki Qərargahının rəhbəri kimi proseslərə nəzarət etməklə yanaşı, bütün tədbir-görüşlərdə iştirak etdim. Bakı Şəhər İcra Hakimiyyətinin «İnşaatçılar» metrosuna yaxın ayırdığı meydanda iki dəfə olmaqla və insanların çoxluq təşkil etdiyi mitinq keçirdik. Təşkil etdiyimiz bütün tədbirlərdə, İctimai Televiziya vasitəsilə canlı düzənlənən debatlarda BAXCP sədri, prezidentliyə namizəd Qüdrət Həsnquliyev partiyanın «Parlamentli respublika» şüarıyla seçkiyə qatıldığına aydınlıq gətirdi. Və əsas məqsədimizin Azərbaycanın parlament tipli respublikaya çevrilməsi olduğunu bildirdi. Bilirsiniz ki, hələ 2007-ci ildə BAXCP Konstitusiyaya əlavə və dəyişikliklərlə bağlı qanun layihəsi hazırlayaraq həm Milli Məclisin, həm də siyasi partiyaların müzakirəsinə təqdim etmişdi. Həmin qanun layihəsində qeyd olunurdu ki, proporsional seçki sisteminə keçilməli, hökuməti də seçkidə qalib gəlmiş partiya formalaşdırmalıdır. BAXCP-nin hazırladığı bu qanun layihəsini demək olar ki, ölkədə fəaliyyət göstərən bütün partiyalar dəstəklədilər. Prezident seçkilərində də bu məsələni bir daha gündəmə gətirdik və əhəmiyyətini seçicilərə izah etməyə çalışdıq. Əvvəldən də bilirdik ki, bizim bu seçkilərdə uğur qazanmaq və qalib gəlmək imkanlarımız yoxdur. Ancaq partiyanın ümumi uğuru o ola bilərdi ki, ölkənin siyasi həyatındakı proseslərdə aktiv iştirak edək və partiyanın mövcudluğunu cəmiyyətə göstərək. Eyni zamanda, öz ideyalarımızla seçicilərin qarşısına çıxaq və alternativ fikirlər söyləyək. Məncə bunu bacara bildik və gələcəyə yönəlik təcrübələr qazandıq ki, növbəti seçkilərdə nöqsanlarımızı aradan qaldıraraq seçki marafonlarına daha ciddi hazırlaşaq. Qarşıdan bələdiyyə və 2015-ci ildə isə parlament seçkiləri gəlir. Artıq partiya olaraq hazırlıqlara başlamışıq.

-Bu ilin əvvəlindən nəhayət ki, Milli Məclisdə təmsil olunan partiyalar Dövlət büdcəsindən maliyyələşdi. Sizin partiyaya ayrılan maliyyə nəzərdə tutulan işlərin həyata keçirilməsinə hansı həddə köməklik göstərir?

-Partiyaların Dövlət büdcəsindən maliyələşməsi çox düzgün qərar oldu. Ancaq parlamentdə təmsil olunan partiyalara ayrılan vəsait çox cüzi olduğundan, təşkilatın xərclərinin bir qismini qarşılaya bilirik. Biz bu vəsaiti əsasən texniki məsələlərə və partiya rəhbərliyinin rayonlara ezamiyyətinə xərcləyirik. Ayrılan vəsait partiyaların təlabatını ödəyən həddə olarsa, o zaman güclü partiya formalaşar. Bizim hakimiyyətə bu məsələ ilə bağlı müraciətimiz olub. Ümid edirik ki, növbəti ildə Dövlət büdcəsi qəbul olunan zaman partiyalara fəaliyyətlərini yüksək səviyyədə quracaq miqdarda maliyyə ayrılacaq.

-Prezident seçkilərindən sonra keçirilən BAXCP Ali Məclisinin iclasında çıxış edən partiyanın sədri Qüdrət Həsənquliyev bildirdi ki, parlament seçkilərinin ilk məşqi gələn il keçiriləcək bələdiyyə seçkiləri olacaq. Bu seçkilərdə uğur qazanmaq üçün hansı işləri görməyi planlaşdırırsınız?

-Partiyamızın sədri Qüdrət Həsənquliyevin BAXCP Ali Məclisinin sessiyasındakı çıxışı partiyanın üzvləri üçün bir çağırış oldu. 2014-cü ildə bələdiyyə və 2015-ci ildə keçiriləcək parlament seçkilərində görüləcək işlərin tezislərini çatdırdı. Hövbəti İdarə Heyətinin iclaslarında bu məsələlər müzakirə olunacaq və müvafiq qərarlar veriləcək. BAXCP yaranandan bu yana seçkilərlə bağlı təcrübəmiz onu deməyə əsas verir ki, gələn il keçiriləcək bələdiyyə seçkilərində də yüksək səviyyədə iştirak edəcəyik və uğurlar qazanacağıq.

-BAXCP yarandığı gündən bu yana konstruktiv yol tutub. Siyasətini bu istiqamətdə quraraq dövlətin maraqlarını hər zaman qoruyub, hakimiyyəti qərəzli deyil, haqlı olaraq tənqid edib, eyni zamanda, təkliflərini verib və bu təkliflər əksəriyyət partiyalar tərəfindən qəbul olunub. Bir zamanlar BAXCP-ni tənqid edənlərin böyük əksəriyyəti artıq bu yola üstünlük veriblər. Ancaq məsələ bundadır ki, müxalifət kimi yenə də radikallar qəbul olunur. Halbuki, radikal müxalifətin bugünə kimi apardığı siyasət həm özlərinə, həm də onlara az-çox inananlara ziyandan başqa heç nə gətirməyib.

-Tamamilə haqlısınız. BAXCP fəaliyyətə konstruktiv müxalifət olaraq başlayıb. Ağa ağ, qaraya qara deməyə üstünlük verib. Bizim partiya cəmiyyətdəki reallıqları görməyə çalışır, müxalifət olmaq üçün müxalifətçilik etmir. Hakimiyyət doğru bir iş görəndə təqdir, yanlış iş görəndə tənqid edirik. BAXCP sivil, qanunların işlək və hörmət olunduğu bir cəmiyyət arzusundadır. İşlərimizi də bu istiqamətdə qurub fəaliyyət göstəririk. Konstruktivlik ideyasını ilk olaraq partiyanın sədri Qüdrət Həsənquliyev cəmiyyətə təqdim edib. Azərbaycanda fəaliyyət göstərən siyasi partiyalar ilkin olaraq həmin ideyanı qəbul etməsələr də, zaman keçdi əksəriyyət partiyalar ideyanın əhmiyyətini anlayıb işlərini

bu istiqamətdə qurdular. Hətta bəzi siyasi partiyalar özlərinin kostruktiv müxalifət olduqlarını dilə gətirərək bu ideyanı özününküləşdirməyə çalışdılar. Ancaq biz bu proseslərdən rahatsız olmadıq, əksinə, partiyamızın sədri Qüdrət Həsənquliyevin bu yöndə ideyalarının qəbul olunmasına sevindik.

O ki qaldı müxalifət kimi radikalların qəbul olunmasına, «radikal» sözünün bu anlamda işlədilmədiyi qənaətindəyəm. Radikallıq köklü yenilik deməkdir ki, radikal müxalifət illərdir eyni taktika ilə siyasətini qurur və har zaman da yanlış siyasətlərinin nəticəsində tərəfdarlarını itirirlər. Əslində radikal müxalifətin adı «ənənəvi müxalifət» kimi cəmiyyətə təqdim olunur ki, bu da onların özləri üçün mənfi rəy yaradır. Yəni, həmin siyasi partiyalar öz üzvlərindən başqa kimsəylə əlaqə qurmaqda çətinlik çəkirlər ki, bu da kütləviliyin qarşısını alır.

Xalq Cəbhəsi.- 2013.- 18 dekabr.- S.8.