Depressiya — çağımızın bəlası
Babək
Abuşov: «Depressiya hazırda qazanılmış immun
çatışmazlığı sindromu və ya xərçəng
xəstəliyi ilə müqayisədə daha geniş
yayılıb»
İnamsızlıq
— çağımızın ən böyük bəlasıdır.
İnsanın özünəinamsızlığı xəstəliyə
çevrilir, depressiyalarla müşaiyət olunur.
Araşdırmaçı Babək Abuşov depresiyalarla
bağlı maraqlı araşdırma aparıb. O, bildirir ki,
Ümumdünya Səhiyyə Təşkilatı (ÜST)
inkişaf etməkdə olan ölkələrdə və
inkişaf etmiş ölkələrin yoxsul təbəqələrində
depressiyanın əhatə dairəsinin durmadan genişlənməsindən
olduqca narahatdır: «Hazırda dünya əhalisinin 20%-i bu və
ya digər şəkildə depressiya ilə üzləşir.
ÜST-nin səlahiyyətli nümayəndəsinin
açıqlamasına görə, depressiya hazırda
qazanılmış immun çatışmazlığı
sindromu və ya xərçəng xəstəliyi ilə
müqayisədə daha geniş yayılıb və 2030-cu ilə
qədər insanların əlil olması və vaxtsız
ölməsilə nəticələnən səbəblər
sırasında birinci yerə çıxacaq. Hər il
dünya miqyasında depressiyadan əziyyət çəkdiyinə
görə əmək qabiliyyətini itirənlərə 100
milyardlarla ABŞ dolları xərclənir».
Elə isə
depressiya nədir? Depressiya psixi (ruhi) xəstəlikdir:
«Gündəlik qayğılar, ehtiyac həyatı bu xəstəliyə
düçar olmuş insanların gözündə
boz-bulanıq, maraqsız edir. Yeganə qazanc mənbəyi olan
iş yerinin əldən çıxması, ər-arvad,
valideyn-övlad münasibətlərinin gərginliyi, əziz
bir adamın vəfatı və s. insanın ahəngdar həyatını
tamam korlayır. Belə insanlarda əhvalın pisləşməsi,
yuxunun və iştahanın pozulması, nitqin ləngiməsi,
astagəllik, həyata marağın sönməsi, əsəbilik,
əmək qabiliyyətinin itirilməsi, özünü
günahkar bilmə, beyində özünə qarşı
sui-qəsd fikirlərinin dolaşması müşahidə
olunur. Depressiv vəziyyətdə olan şəxs
dünyanı boş, ədalətsiz və qəddar təsəvvür
edir. Depressiv vəziyyət bəzən də güclü həyəcanlanma,
səbəbsiz qorxuya düşmə,
hönkür-hönkür ağlama, pal-paltarını
cırma ilə müşayiət olunur. Depressiv vəziyyətin
geniş planda mənzərəsi belədir».
Depressiyanın
formalarına gəldikdə isə olduqca müxtəlifdir və
bu formalar rəngarəng simptomlar kompleksi ilə üzə
çıxır: «Depressiyanın ayrı-ayrı formaları
emosional sferada, davranış reaksiyalarında və idrak
proseslərində əmələ gətirdiyi pozuntularla
bir-birindən xeyli fərqlənir.
Çox
insanlar güman edirlər ki, depressiya xəstəlik deyil,
boş şeydir, guya bəzi adamların iş-gücü
qurtarıb, ağzına gələni danışır. Belə
düşünənlər səhv edirlər. Bu problemə
barmaqarası baxmaq olmaz. Depressiya həqiqətən ciddi psixi
xəstəlikdir. Xəstə fiziki deyil, mənəvi əzab
çəkir. Depressiya ekzogen və endogen olmaqla iki qrupa
ayrılır. Ekzogen depressiya xarici səbəblərdən (məsələn,
iş yerinin itirilməsi, əziz adamın vəfatı və
s.) irəli gəlir. Endogen depressiya isə çox zaman
anlaşılmaz qalan daxili səbəblər üzündən
meydana çıxır. Xarici depressiya ağır xroniki
pozuntuların başlanğıcı, daxili depressiya isə
yalnız depressiv epizod ola bilər. Depressiyanın xarici əlamətləri
vəziyyətin ağırlığını heç də
həmişə tam əks etdirmir. Buna görə də xəstə
vəziyyətini qiymətləndirə bilməz. Depressiv vəziyyətdə
olan şəxslərə hətta dostlar və qohumlar da
kömək edə bilməzlər. Mütləq mütəxəssisə
— psixiatra müraciət etmək lazımdır. Eləcə də
həkim məsləhəti olmadan özünə və
yaxınlarına antidepressantların (depressiya əleyhinə dərman
preparatlarının) təyin olunması son dərəcə təhlükəlidir.
Güclü təsir effektinə malik kimyəvi birləşmələr
olan antidepressantlar xəstələrə fərdi şəkildə
təyin edilməlidir, əsas məsələ gündəlik
dozanın seçilməsidir ki, bunun da həkim tərəfindən
həyata keçirilməsi olduqca vacibdir. Bir məsələni
də hər kəsin bilməsi və əməl etməsi gərəklidir.
Depressiyanın simptomlarının zəiflədiyini hiss edən
kimi bəzi xəstələr həkimin təyin etdiyi
müalicə kursunu yarımçıq dayandırırlar.
Bu, tamamilə səhv və yolverilməz addımdır. Belə
ki, həkimin təyinatını pozmaq onun apardığı
müalicənin effektinə olduqca mənfi təsir göstərir,
mütəxəssisin müalicə taktikasını zərbə
altında qoyur. Həkim adətən əvvəlcə
kiçik doza təyin edir, sonra dozanı tədricən
artırır, daha sonra — dərmanın qəbulunu
dayandırma ərəfəsində onu yenidən azaldır.
Müalicənin qızğın vaxtı xəstə dərmanların
qəbulundan özbaşına imtina edərsə, depressiya
daha da şiddətlənə bilər. Bu hal həm də onun
müalicəsinə sərf edilmiş vaxtın, çəkilmiş
zəhmətin və xərcin itirilməsi deməkdir».
Araşdırmaçı
bildirir ki, depressiv xəstələrin bir qrupu vəziyyətini
dumanlı şəkildə anlasa da, çoxu ağır psixi
xəstə olduğunu ağlına belə gətirmir: «Bu,
onunla əlaqədardır ki, depressiya çox zaman
özünü pərdələyir. Pərdələnmiş,
yaxud maskalanmış depressiya bədənin müxtəlif
nahiyələrinin (məsələn, ürək-damar
sisteminin, mədə-bağırsaq traktının və s.)
ağrıması, yuxunun və iştahanın pozulması
şəklində meydana çıxır. Statistik
araşdırmalara görə, bədənin müxtəlif
nahiyələrinin ağrıları şikayəti ilə həkimə
müraciət edən xəstələrin 30%-ə qədərində
məhz maskalanmış depressiya aşkar olunur. Diaqnostik
araşdırmalar nəticəsində patoloji əlamət
müəyyən olunmasa da, xəstə özünü pis
hiss etməsi və diskomfort barədə şikayətini davam
etdirir».
Depressiya necə yaranır? «İnsanın fiziki və psixoloji sağlamlığı üçün onun ətrafda baş verən hadisələr üzərində hakim olması və onları müstəqil şəkildə nəzarətdə saxlamaq imkanı olmalıdır. İnsan öz həyatını dəyişdirməyə qadir deyilsə və bütün baş verənlər onun iradəsindən asılı deyilsə, ilk növbədə həmin şəxsin varlığına köməksizlik hissi hakim kəsilir və o, vəziyyəti dəyişmək üçün heç bir fəaliyyət göstərmir. Bütün bunlar həmin şəxsdə depressiv vəziyyətin başlanması deməkdir. Davranış reaksiyalarının öyrənilməsi sahəsində məşhur alim — Martin Seliqman (ABŞ) təsdiq edir ki, hadisələr üzərində nəzarəti ələ alma imkanı hər kəsin həyat təcrübəsindən asılıdır. Əgər insanın hadisəyə nəzarəti ələ almaq cəhdləri dəfələrlə uğursuzluğa düçar olursa, sonda insan həmin sahədə istənilən cəhddən imtina edir, yəni depressiv vəziyyətə düşür. Depressiyanın bu növünü M.Seliqman «qazanılmış köməksizlik» adlandırır. Amerika alimləri aşkar ediblər ki, yeniyetmə dövründə televiziya, kompyuter, mobil telefonlar və digər elektron vasitələrinə aludəlik gənc yaşlarında depressiv vəziyyətin inkişaf etməsi təhlükəsini yüksəldir. Pitsburq Universitetinin (ABŞ) alimləri yeniyetmələrin sağlamlığının öyrənilməsinə həsr etdikləri çoxillik tədqiqatların nəticələrindən istifadə ediblər. Tədqiqatların başlanğıcında (1995-ci ildə) depressiyadan əziyyət çəkməyən 4142 yeniyetməyə onların televiziya və videokasetə, videooyunlara və radio dinləməyə (o zamanlar DVD və internet indiki qədər geniş yayılmamışdı) nə qədər vaxt sərf etmələri barədə suallara cavab alıblar. Məlum olub ki, sorğuda iştirak edənlər sutka ərzində orta hesabla 5,68 saat informasiyanın elektron vasitələrindən istifadə edirlər. 7 ildən sonra tədqiqat iştirakçılarının yaşı 21,8 ilə çatdıqda onların sağlamlığı yoxlanılıb. Bu cavanlardan 308 nəfərdə (7,4%-də) depressiyanın simptomları müəyyənləşdirilib. Özü də xəstəliyin inkişaf etmə təhlükəsi televiziya və digər informasiya vasitələrinə baxarkən proporsional şəkildə yüksəlir. Həm də müəyyən olunub ki, belə təsirlərə oğlanlar qızlara nisbətən daha həssasdırlar. Tədqiqatçıların mülahizələrinə görə, informasiya vasitələri depressiyanın inkişafına bir neçə yolla təsir edə bilər. Bundan əlavə verilişlərə və s. gecə baxmaq yuxunu pozur, əldə olunan informasiya aqressiya, qorxu və ya həyəcan əmələ gətirir ki, bu da depressiv pozuntulara səbəb olur. Depressiv vəziyyətin müddəti bir neçə gündən bir neçə aya qədər davam edə bilər. Depressiv vəziyyətin tezliyi də fərqlənir. Residivlər (təkrar baş vermələr) fəsli xarakter daşıyır. Belə ki, residivlər tez-tez payız və yaz fəsillərində baş verir». Depressiyanın ağır formaları stasionarlarda, yüngül formaları isə ambulatoriyalarda müalicə olunur: «Depressiv vəziyyətdə olan xəstələrin müxtəlif dərman preparatlarının köməkliyi ilə müalicə olunması böyük tarixə malikdir. Depressiyalı xəstələrin 83-99%-də yuxu prosesi pozulur. Depressiyalı xəstələrdə gecə yuxusunu poliqrafik üsulla tədqiq edərək onun dərinliyinin azalmasını və yuxu zamanı hərəki fəallığın artmasını müəyyən ediblər. Depressiyanın müalicəsində başqa formalarına nisbətən total yuxu deprivasiyası (TYD) daha yüksək effektə malikdir. Odur ki, depressiyalı xəstələr adətən TYD ilə müalicə olunurlar. Xəstələr bir qayda olaraq 36 saat yuxudan məhrum olunduqdan sonra iki gecə normal yatırlar (bəzən interval daha böyük olur). Daha sonra TYD təkrar olunur. Təkrar deprivasiyadan sonra xəstənin vəziyyəti yaxşılaşarsa, iki sutkalıq fasilədən sonra TYD yenə (üçüncü dəfə) təkrar olunur. TYD-nin təsiri müsbət effekt verdiyi təqdirdə hər ay iki seans deprivasiyanın keçirilməsi məsləhət görülür. TYD ilə müalicə zamanı depressiv xəstələrin əhvalı yaxşılaşır, lakin bunun mexanizmi bu yaxınlarda bizim tədqiqatlarımız sayəsində aydınlaşdırılıb. Tədqiqatlarımız göstərdi ki, 36 saat davam edən TYD zamanı siçovul beyninin somnogen strukturlarının (yuxunun neyrofizioloji mexanizmində iştirak edən beyin strukturlarının) neyronlarında müşahidə olunan submikroskopik dəyişikliklər distrofik (destruktiv) xarakter daşıyır, nəticədə heyvanların davranış reaksiyaları nəzərəçarpacaq dərəcədə pozulur. Odur ki, siçovullar üçün TYD-nin davametmə müddətini azaltmalı olduq. TYD-nin davametmə müddətini 24 saata endirdikdə siçovulların beyninin somnogen strukturlarında neyronlar əsasən dəyişikliklərə uğrayır. Belə heyvanlarda qida və su tələbatı, hərəki və cinsi fəallıq, beyin və bədən kütləsi ən yüksək səviyyəyə çatır. Sinir hüceyrələrində reparativ proseslər əsasən zülal sintezedici aparatın fəallaşması şəklində meydana çıxır. Belə dəyişikliklər TYD zamanı sintetik proseslərin yüksəlməsinə dəlalət edir. Deməli, TYD-nin baş-beyin neyronlarında biosintez proseslərini intensivləşdirərək xəstələri depressiv vəziyyətdən çıxardığını düşünməyə əsas var. Depressiyanın simptomlarından biri də yuxunun pozulması (yuxunun səmərəli müddətinin və dərinliyinin azalması) olduğundan düşünmək olar ki, depressiv vəziyyət mərkəzi sinir sistemində (MSS-də), ilk növbədə somnogen strukturlarda biosintez proseslərinin kəskin şəkildə enməsi ilə əlaqədardır. Qısa müddət davam edən TYD şəraitində MSS-də biosintez proseslərinin intensivləşməsi nəticəsində depressiv vəziyyətin aradan qalxması faktı bu ehtimalın doğruluğuna inamı xüsusilə artırır. Düşünürük ki, depressiv vəziyyətdə, eləcə də əksər xəstəliklər zamanı yuxu prosesinin pozulması qoruyucu-kompensator xarakterli prosesdir, potogen amillərin təsirinə orqanizmin universal cavab reaksiyasıdır. Bu fikrin formalaşması yuxu deprivasiyasının antidepressant effektə malik olması ilə bağlıdır. Yuxunun pozulması hesabına onun səmərəli müddətinin qısalması və dərinliyinin azalması da bir növ yuxu deprivasiyasıdır və xəstəlik zamanı orqanizmin hansısa qoruyucu mexanizmlərinin fəaliyyətə gəlməsi sayəsində həyata keçirilir».
Uğur
Xalq Cəbhəsi.- 2013.- 19 iyun.-
S.14.