15 May - Beynəlxalq Ailə Günüdür

Azərbaycan cəmiyyətində ailə hər zaman müqəddəs sayılıb. Bu gün ölkəmizdə ailə cəmiyyətin əsas özəyi kimi dövlətin xüsusi himayəsindədir. Bu mənada ailə Azərbaycan dövləti, Azərbaycan cəmiyyəti üçün həmişə müqəddəsdir.

“Zaman-Azərbaycan” qəzeti öz saylarında bu mövzuya xüsusi önəm verir. Bu dəfə sizə Mingəçevirin nüfuzlu ailələrindən biri barədə məlumat verəcəyik. Həmin ailənin başçısı uzun müddət müəllim kimi fəaliyyət göstərmiş, hazırda təqaüddə olan Sahib Hüseynovdur. “Yaxşı münasibətlər, saf niyyətlər üzərində qurulmuş ailə həm gənclər, həm də yaşlı nəsil üçün ən gözəl örnəkdir”, - sözləri ilə söhbətə başlayan Sahib müəllimin fikrincə, cəmiyyətin əsasını təşkil edən ailə müqəddəs bir ocaqdır. Bu ocağın qorunması isə onu quran tərəflərdən çox asılıdır. Daha sonra o, öz ailə tarixçəsindən söz açdı: “1969-cu ilin iyun ayında Gədəbəy rayonunun sayılıb seçilən ailələrindən birinin qızı ilə evlənmişəm. Onu da deyim ki, biz bir-birimizi sevərək, heç bir kənar müdaxilə olmadan ailə həyatı qurmuşuq. 3 övladımız, 5 nəvəmiz var. Övladlarımın üçü də ali təhsil alıb. Onların tərbiyəsi sarıdan da heç bir narahatçılığım yoxdur. Buna görə həyat yoldaşıma minnətdaram. Yəni o, onların təlim-tərbiyəsi ilə məndən çox məşğul olub. Yeri gəlmişkən, mənim fikrimcə, imkan daxilində kişinin həyat yoldaşının işləməməyi, evdə oturub uşaqlarına baxmağı daha yaxşıdır”. Dediyinə görə, elə bu səbəbdən həyat yoldaşını işləməyə qoymayıb: “Aza qane olub, övladlarımın tərbiyəsini hər şeydən vacib saymışam”. “Bəs ailədaxili problemləri necə həll edirsiniz?” sualına müsahibimiz: “Yalnız və yalnız aramızda olan mehribançılıqla”, - cavabını verdi və əlavə etdi: - Öz müşahidələrimə əsasən deyə bilərəm ki, mehriban ailədə hər dürlü problemi çözmək mümkündür.

“15 mayın Beynəlxalq Ailə Günü kimi qeyd olunmasını bilirsinizmi?” sualı isə Sahib müəllimin, deyəsən, xətrinə dəydi: “Ay bala, niyə bilmirəm, üstəlik, imkan daxilində hər il ailəmizdə bu günü də qeyd edirik. Mənim fikrimcə, ailə ilə bağlı keçirilən hər bir tədbir önəmlidir. Belə tədbirlər gənc ailələrin formalaşmasında mühüm rol oynayır”. Bir qədər fikrə gedəndən sonra dedi: “Son zamanlar yeni qurulan ailələrin bəzilərinin ömrü az olur. Bu isə həmin ailələrin sağlam təməl üzərində qurulmamasından irəli gəlir. Ona görə də mənə elə gəlir ki, ailələrlə, xüsusilə, yeni ailə həyatı quranlarla maarifləndirici tədbirlərin mütəmadi aparılması vacibdir. Bilirsinizmi, ailə özü mikrodövlətdir, yəni kiçik bir dövlətdir. Bu isə o deməkdir ki, dövlətdə nə qədər qanunlar varsa, onların hamısı da bu kiçik dövlətə şamil olunmalıdır. Ailədə dünyaya gələn uşaq da görəndə ki, onun boya-başa çatdığı mühit qanunlarla idarə olunur, o da buna riayət edəcək.

Bala, qayda-qanun olan yerdə xoşbəxtlik olan şeydir, yəni qayda-qanun hər bir ailənin xoşbəxtlik açarı olmalıdır. Yenə təkrar edirəm, bunun da mayasını sevgi, qarşılıqlı anlaşma təşkil etməlidir. Bir də, gənclərə məsləhətim budur ki, ailə quracaqları şəxsin zahirindən çox, onun daxili aləminə bələd olmağa çalışsınlar”.

Sahib müəllim daha sonra bildirdi: “Etiraf edim ki, bəzi qadınlar bir balaca maddi sıxıntı ilə qarşılaşanda ailədə müxtəlif söz-söhbət yaradırlar. Hətta bəzi qadınlar bu kimi sıxıntıları aləmə də bəyan etməyə can atırlar. Amma həmin qadınlar unudurlar ki, onlar bununla mənsub olduqları ailənin təməl daşlarını dağıdırlar. Qadın hər cür çətinliyə qatlaşmağı da bacarmalıdır. Yadıma düşmüşkən, son zamanlar telekanallarda ailə ilə bağlı verilişlər nümayiş etdirilir. Orada elə məsələlərdən danışırlar ki, adam lap xəcalət çəkir. Axı dədə-babalarımız da deyib ki, ailə söz-söhbətsiz olmaz, ailənin sirrini ancaq dörd divar bilər. Daha nəyə lazımdır ailədə yaşanan xırda problemi ekranlara daşımaq? Nə gizlədim, mən belə verilişlərin qəti əleyhinəyəm. Zənnimcə, bizim ziyalılar da bu məsələyə müdaxilə edib, belə verilişlərə son qoyulmasına çalışacaqlar. Demirəm ki, ekranlarda ailə ilə bağlı verilişlər olmasın. Olsun, amma maarifləndirici olsun. Qoy gənclərimiz həmin verilişlərə baxıb, özlərinə nəsə götürə bilsinlər”. Sahib müəllim söhbətini bu sözlərlə tamamladı: “Bala, bilirəm, indi ailələr barədə yazı yazmaq heç də asan deyil. Çünki ailə haqqında hərənin öz fikri var. Bunlar da mənim fikirlərim idi”.

Uğur

Xalq Cəbhəsi.- 2013.- 15 may.- S.14.