Sənətinin vurğunu

Yazıya sərlövhə seçəndə çox düşündüm. Qiyabi tanıdığım tanışlarımın bəzilərindən eşitmişdim ki, Arifin hələ uşaqlıqdan idmana, bədən tərbiyəsinə heç kəsə bənzəməyən sevgisi olub. Elə bu sevgi də onu idmanın çətin pillələrində yorulmadan çalışmağa sövq edib və məqsədinə doğru inamla addımlayıb. Bu həvəs onun orta məktəb illərində də özünü büruzə vermiş, bədən tərbiyəsi dərslərində başqalarından cəldliyi ilə fərqlənmişdi.

O, Bakıda dünyaya göz açıb. Muxtar kişinin oğlu Arif haqqında böyük arzuları vardı. Orta məktəb illərində necə oxuması ilə tez-tez maraqlanar, müəllimlərinin söylədikləri onu sevindirərdi. 31 saylı orta məktəbdə oxuduğu illərdə idman sahəsində həmişə fərqlənər, akrobatika ilə yorulmadan çalışardı. Atasını çox erkən itirən gənc Arif onun tövsiyə etdiyi kimi məşqlərini inadla davam etdirirdi. 1966-cı ildə həmin məktəbi bitirən zaman Arif artıq öz yerini ancaq idmanda görürdü. Ali təhsil almaq haqqında bir daha götürqoy etdi.

1970-ci ildə SSRİ idman ustası adını alan, iki dəfə SSRİ çempionatının gümüş və bürünc medallarına layiq görülən Arif artıq 1968-ci ildə Bədən Tərbiyəsi İnstitutunun idman fakültəsində oxuyurdu. İnstitut illərində oxuduğu zaman yenə də sevdiyi sənətinin zirvəsinə doğru inamla irəliləyirdi. 1972-ci ildə institutu uğurla bitirən Arif Qafarov ordu sıralarına xidmət etməyə çağrılır. Buna qədər 1968-ci ildən Gimnastika məktəbində müəllim-məşqçi vəzifəsində işləməyi onu daha da tanıdır. Yetirmələrinin bir çoxu keçmiş SSRİ çempionatlarında mükafata layiq görülür.

Eldə bir deyim var: Millət biliyi, zəkası və elmilə, bir də fiziki qüvvəsilə formalaşır. Arif Muxtarov idman sahəsində uğurlar qazanır. 1992-1998-ci illərdə yetirmələrinin dünya və Avropa çempionatlarında gümüş və bürünc medal almaları onu daha da sevindirir.

Arif müəllim 1989-cu ildən Gimnastika məktəbində direktor vəzifəsinə təyin olunur. Özünün yüksək mədəniyyəti, təvazökarlığı ilə fərqlənən Arif müəllim bu gün daha şövqlə, məhəbbətlə sevdiyi sənətini gənclərə həvəslə öyrədir.

2000-ci ildən indiyə kimi akrobatika üzrə milli yığma komandasının baş məşqçisi, yüksək dərəcəli məşqçi adını alan Arif müəllimi anadan olmasının 65-ci ilini ürəkdən təbrik edirik.

1997-ci ildən Azərbaycanın əməkdar məşqçisi fəxri adını daşıyan Arif müəllim yenə də gənclik ehtirası ilə çalışır.

2006-cı ildə dövlət başçısının sərəncamı ilə ona Azərbaycan Respublikasının «Əməkdar bədən tərbiyəsi və idman xadimi» fəxri adı veriləndə özünəməxsus təvazökarlıqla demişdi: «Bu diqqət mənim millətə, Vətənə edəcəyim xidmət və borcumdur».

Rəhbərlik etdiyi Gimnastika məktəbində bədən tərbiyəsi və idmanın incəliklərini həvəslə öyrədir, idmana verilən yüksək dövlət qayğısı ilə ruhlanır və fəxri adı, ona göstərilən etimadı əməli işləri ilə yorulmadan doğruldur. İdman və bədən tərbiyəsi tarixində əbədi iz qoyan Rəşid Pəhləvan, Süleyman və başqalarının keçdiyi yolu xatırlayan Arif müəllim ürəkdən sevinir. Yetirdiyi dünya və Avropa çempionlarının alqışları, təbriklərini səmimi qəlbdən yaşayır, 65 yaşında bəzən kövrəkləşir, bəzən də sabaha daha yeni yetirmələri ilə gedəcəyinə inanır…

Hörmətli Arif müəllim, sizi bir daha 65 yaşınız münasibətilə təbrik edir, uzun ömür, idman və bədən tərbiyəsinin fədaisi kimi yeni uğurlar arzulayırıq. Siz təpədən-dırnağa kimi professional idmançısınız. Həyata, insanlara, yetirmələrinə münasibətiniz də bunu sübut edir. 70 yaşınızda görüşənədək!

Maarif Teymur

Xalq Cəbhəsi.- 2013.- 18 sentyabr.- S.15.