“Vyana görüşündən dərhal sonra Prezident Azərbaycan Ordusunun xüsusi təyinatlılarıyla görüşdü”

Hikmət Babaoğlu: “Bununla da danışıqlar masasında öz xalqına və onun güclü ordusuna arxalandığını nümayiş etdirdi”

Azərbaycan Prezidenti, Silahlı Qüvvələrin Ali Baş Komandanı İlham Əliyev Müdafiə Nazirliyinin Xüsusi Təyinatlı Qüvvələrinin N saylı hərbi hissəsində hərbçilərlə görüşündə mühüm mesajlar verib.

Dövlət başçısı bildirib ki, son Vyana görüşü Dağlıq Qarabağ münaqişəsinin nizamlanması üzrə mövcud danışıqlar formatını bir daha təsdiqlədi. Dövlət başçısı bildirib ki, Dağlıq Qarabağ münaqişəsi yalnız ölkəmizin ərazi bütövlüyü çərçivəsində öz həllini tapmalıdır: “Dağlıq Qarabağ bizim əzəli, tarixi torpağımızdır. Əsrlər boyu xalqımız bu torpaqlarda yaşayıb, qurub, yaradıb. Bu gün bütün dünya Dağlıq Qarabağı Azərbaycanın ayrılmaz hissəsi kimi tanıyır. Bütün mötəbər beynəlxalq təşkilatlar müvafiq qərar və qətnamələr qəbul etmişlər. Bu, tarixi və hüquqi əsasdır. Heç bir ölkə qondarma “Dağlıq Qarabağ respublikası”nı tanımayıb, əminəm ki, tanımayacaqdır. Ona görə danışıqların davam etdirilməsinin məqsədi işğal edilmiş torpaqların azad olunmasıdır. Siz bilirsiniz ki, Ermənistanın yeni rəhbərliyi danışıqların formatını dəyişdirmək istəmişdir. Verilən bəzi bəyanatlar da ictimaiyyət üçün bəllidir. Ancaq Azərbaycanın birmənalı mövqeyi bunu mümkün etməmişdir. Münaqişə Ermənistan ilə Azərbaycan arasındadır. Bizim torpaqlarımızı Ermənistan işğal edibdir. İşğal edilmiş torpaqlarda qarşı tərəfdə hərbçilərin 80 faizi Ermənistan vətəndaşlarıdır. Ona görə danışıqlar prosesi də iki ölkə arasında aparılmalıdır və aparılır. Son Vyana görüşü, o cümlədən ona görə önəmli idi ki, bu mövcud formatı bir daha təsdiqlədi. Həm xarici işlər nazirləri arasında aparılan danışıqlar, həm də rəhbərlik arasında keçirilmiş görüş bir daha onu göstərir ki, bu, Ermənistan-Azərbaycan münaqişəsidir. Biz hər dəfə bu münaqişə ilə bağlı sözümüzü deyəndə bu münaqişəni belə də adlandırırıq: Ermənistan-Azərbaycan Dağlıq Qarabağ münaqişəsi".

Dövlət başçısı vurğulayıb ki, ordumuz üçün nə lazımdırsa, onu edirik və edəcəyik: “Bu gün ordu quruculuğu baxımından Azərbaycan dünyanın güclü ölkələrindəndir. Ordumuz üçün ən müasir silahlar, texnikalar alınır, ordumuzun döyüş qabiliyyəti artır. Aprel döyüşləri bunun bariz nümunəsidir. Ordumuz üçün nə lazımdırsa, biz onu edirik və edəcəyik...”.

Millət vəkili, politoloq Hikmət Babaoğlu “Xalq Cəbhəsi”nə bildirdi ki, Azərbaycan Respublikasının Prezidenti, Silahlı Qüvvələrin Ali Baş Komandanı İlham Əliyevin aprelin 2-də Müdafiə Nazirliyinin Xüsusi Təyinatlı Qüvvələrinin N saylı hərbi hissəsindəki çıxışışında diqqəti cəlb edən xeyli mühüm məsələlər var: “Bunlardan birincisi ondan ibarətdir ki, Vyana görüşündən dərhal sonra Prezident Azərbaycan Ordusunun xüsusi təyinatlılarıyla görüşdü. Bununla da danışıqlar masasında öz xalqına və onun güclü ordusuna arxalandığını nümayiş etdirdi. Ancaq Vyana görüşündən sonra Ermənistanın baş nazirinin haraya telefon açdığına diqqət etsək görəcəyik ki, bu şəxs xalqına və ordusuna deyil, elə zəng etdiyi mərkəzlərə arxalanır. Yəni Ermənistan müstəqil dövlət deyil, forpostdur, kiminsə hərbi bazası statusunda olan bir subyektdir elə danışıqlara da sahibindən aldığı təlimatlar əsasında gedir. İkinci mühüm məsələ isə, Ali Baş Komandanımız bir daha bildirdi ki, müharibə hələ bitməyib, müharibənin birinci mərhələsi başa çatıb. Bu gün Azərbaycan Ordusu dünya miqyasında güclü ordular sırasındadır. Bu fikir əslində işğalçı Ermənistana verilən ciddi ismarıc kimi qiymətləndirilə bilər. Yəni danışıqlar prosesini imitasiya yaxud manipuliyasiya etmək cəhdlərinizə Azərbaycan sona qədər dözmək fikrində deyil və Azərbaycan öz torpaqlarını müharibə yolu ilə azad etmək hüququnu özündə saxlayır. Üçüncü mühüm ismarıc, Ermənistan Azərbaycan Dağlıq Qarabağ münaqişəsi tarixində digər bütün faktorlarla bərabər Aprel döyüşlərindən sonra hərbi- psixoloji əhval ruhiyyənin də Azərbaycanın lehinə dəyişməsilə əlaqədar idi. Prezident İlham Əliyev bildirdi ki, əlverişsiz mövqelərdən bizim hərbçilərimiz çox önəmli strateji yüksəklikləri işğalçılardan azad ediblər. Eyni zamanda, bu döyüşlərin mənəvi-psixoloji baxımdan da böyük əhəmiyyəti vardır. Çünki uzun illər ərzində Ermənistan təbliğatı belə bir mif yaradırdı ki, onlar hərbi cəhətdən bizdən üstündür”.

Millət vəkilinin fikrincə, aprel döyüşləri bütün dünyaya göstərdi ki, Azərbaycan Ordusu bu gün ən yüksək keyfiyyətlərə malikdir və istənilən anda istənilən vəzifəni icra edə bilər: “Bu mühüm əhəmiyyətli fikir həm də o deməkdir ki , baxmayaraq bu gün xeyli sayda strateji yüksəkliklər və rayonlar işğal altındadır, ancaq Azərbaycan ordusu bir həmlə ilə mövcud reallığı dəyişmək gücündədir. Buna Ali Baş Komandanın siyasi iradəsi və güclü ordumuzun hərbi gücü çatar. Və nəhayət, Prezident İlham Əliyev bir daha bəyan etdi ki, münaqişə yalnız ölkəmizin ərazi bütövlüyü çərçivəsində öz həllini tapmalıdır. Bütün bunlar isə belə bir ümumiləşdirmə aparmağa məntiqi əsas yaradır ki, Azərbaycan bütün üstünlüklərə shib olan ölkə kimi öz ərazi bütövlüyünü bərpa etməyə hazırdır , qadirdir və geostrateji şərtlər uyğun olan kimi bu istiqamətdə qəti addımlar atacaq”.

Millət vəkili Elman Məmmədov diqqətə çatdırıb ki, Azərbaycan Prezidenti, Silahlı Qüvvələrin Ali Baş Komandanı İlham Əliyevin Müdafiə Nazirliyinin Xüsusi Təyinatlı Qüvvələrinin N saylı hərbi hissəsində etdiyi çıxışında da qeyd etdiyi kimi Dağlıq Qarabağ münaqişəsi ilə bağlı danışıqlar yalnız Azərbaycan və Ermənistan arasında aparılır: “Bu isə o deməkdir ki, danışıqların formatı dəyişməzdir”. Vyanada Azərbaycan Prezidenti İlham Əliyevlə Ermənistanın baş naziri Nikol Paşinyan arasında keçirilən görüşün Dağlıq Qarabağ münaqişəsinin nizamlanması istiqamətində danışıqların aparılması üçün yeni imkanlar açdığını deyən deputat söyləyib ki, bu görüş erməni tərəfinin danışıqların formatının dəyişdirilməsi cəhdlərini bir daha iflasa uğratdı. E. Məmmədovun sözlərinə görə, Vyana görüşünün nəticələri ilə bağlı sülh prosesinin irəli aparılması üçün mühitin yaradılması, danışıqlar prosesində konkret və nəticəyönümlü addımların atılması vacibliyi bildirilir: "Atəşkəsin davam etdirilməsi, danışıqların intensiv, substantiv əsaslarla bir-birini tamamlaması vacib şərtlərdəndir, bunlar paralel və davamlı aparılmalıdır. Ötən gün Prezident İlham Əliyev bir daha bildirdi ki, münaqişənin həlli ilə bağlı Azərbaycan dövlətinin mövqeyi bəllidir və birmənalı xarakter daşıyır. Bu münaqişə yalnız ölkəmizin ərazi bütövlüyü çərçivəsində öz həllini tapmalıdır”.

Deputat əlavə edib ki, Azərbaycanın münaqişənin həlli istiqamətində mövqeyinin əsasını Helsinki Yekun Aktı və BMT Təhlükəsizlik Şurasının müvafiq qətnamələri təşkil edir: “BMT Təhlükəsizlik Şurasının qətnamələrinin tələblərinə uyğun olaraq Ermənistan qoşunları Azərbaycanın işğal olunmuş ərazilərindən çıxarılmalı və Azərbaycanın ərazi bütövlüyü və suverenliyi təmin olunmalıdır. Azərbaycan bu mövqeyindən bir addım da olsun geri çəkilməyəcək”.

İsrailli ekspert Arye Qut isə vurğulayıb ki, Azərbaycan Ordusu cəbhə xəttində hadisələrin istənilən şəkildə inkişafına hazırdır: “İndi Azərbaycan ordusu ən güclü, ən müasir texnika və silahlar, ən yüksək döyüş hazırlığı, nizam-intizam və şəxsi heyətin mübariz ruhu deməkdir. Azərbaycanın və Ermənistanın maliyyə imkanlarındakı fərqlər onların müdafiə və hücum potensialındakı fərqlərdə əks olunur. Globalpower.org rəsmi hərbi statistika saytının hesablamalarına görə, həm hərbi, həm də siyasi və iqtisadi amillər, o cümlədən rəsmi Bakının daimi dövlət gəlirləri mənbələrinin olması, Ermənistanın isə bu cür mənbələrinin olmaması nəzərə alınmaqla Azərbaycanın hərbi qüdrəti Ermənistanın müdafiə qabiliyyətindən 1,5 dəfə yüksəkdir. Bu gün müstəqil Azərbaycan ölkənin müdafiə sektoruna Ermənistanın bütün dövlət büdcəsinə uyğun məbləğdə sərmayə qoymağı özünə rəva görə bilər. Təcrübə göstərir ki, müasir müharibədə döyüş əməliyyatları aparılması üçün kimin daha çox inkişaf etmiş, yüksək texnoloji vəsaitləri varsa, həmin tərəf qalib gəlir. 2016-cı ilin aprel döyüşləri zamanı erməni işğalçılarına qarşı İsrailin pilotsuz zərbə aparatlarının səmərəli şəkildə tətbiq edilməsini xatırlamaq kifayətdir və bu barədə çox danışmaq olar.

Heç kəs unutmayıb ki, 2016-cı il aprelin əvvəlində Azərbaycan Silahlı Qüvvələri Ermənistanın hərbi təxribatlarına cavab olaraq və öz vətəndaşlarının təhlükəsizliyini təmin etmək məqsədilə Ermənistan ordusuna sarsıdıcı hərbi zərbə endirdi. Heç kəs üçün sirr deyil ki, bu gün Azərbaycan Cənubi Qafqazda ən güclü və qüdrətli ordusu olan ölkədir. Ermənistanın baş naziri və müdafiə naziri çox gözəl bilirlər ki, Azərbaycanla birbaşa hərbi toqquşma Ermənistanın qəti iflasına və fiaskosuna gətirib çıxaracaq. Mən Azərbaycanın hərbi potensialını Ermənistanla heç müqayisə etmək istəmirəm, çünki bunlar tamamilə müqayisəolunmaz şeylərdir. Zənnimcə, Paşinyan çalışacaq ki, vəziyyət son həddə çatmasın, çünki bundan sonra onun üçün və Ermənistan üçün qarşısıalınmaz nəticələr baş verə bilər”.

Əli

Xalq cəbhəsi 2019.- 4 aprel.- S.6.