Deyilən söz
yadigardır…
Şeyx Məhəmməd Xiyabani:
- Ey ölməz Azərbaycan, başını uca tut, yaşa və əbədi var ol!
- Azərbaycanı azərbaycanlı azad etməlidir.
- Hər bir millətin ləyaqətinin ilkin şərti müstəqillikdir.
- Təbiət ümumi bir mübarizə meydanıdır ki, həyatı qaliblərə mükafat olaraq verir. Bu böyük mübarizədə zəiflər və gücsüzlər yaşaya bilməzlər.
***
Professor Məhəmmədtağı Zehtabi:
Azad doğulan insana
qandal nə gərəkdir?
Qandalları qırmışlara zindan nə gərəkdir?
Dünya, nələrin var?
Əfsanələrin var?
Biçarə bəşər, ölçüyə
gəlməz kədərin
var.
Qanlar tökərək qandalı
qırdın ayağından,
Qandalları yığdın və
qayırdın yekə
zindan!
Daim başın üstündə
gəzir qəm və fəlakət…
***
Sultanəli Mirzəzadə - S.C.Pişəvərinin
ən sədaqətli,
vətənpərvər fədailərindən
biri
Sultanəli Mirzəzadə Azərbaycan
Demokrat Firqəsinin ən yaşlı üzvlərindən idi. S.Mirzəzadə Firqə yaranandan bu günə qədər 75 illik bir müddətdə onun adi üzvü
və sıravi əsgəri olub. 1945-ci ilin dekabrından
əlinə silah götürüb Firqənin
göstəriş və
tapşırıqlarını bir fədai olaraq yerinə yetirib. S.Mirzəzadə
1945-1946-cı illərdə həm Cənubi Azərbaycandakı milli-demokratik
hərəkat zamanı
və həm də onun məğlubiyyətindən
sonrakı mühacirət
illərində Azərbaycan
Demokrat Firqəsinə,
onun amal və hədəflərinə,
Azərbaycan Milli Hökumətinə qəlbən,
ruhən, bütün
varlığı ilə
sadiq şəxslərdən
biri olub.
S.Mirzəzadə mühacirət dövründə
də Firqə sıralarında olub onun göstərişlərini
sədaqətlə yerinə
yetirib. Azərbaycan Demokrat Firqəsi
Mərkəzi Komitəsinin
göstəriş və
məsləhəti ilə
XX əsrin 60-70-ci illərində
Firqənin Mərkəzi
Komitəsinin təlimatçısı,
Firqənin Ağstafa
rayon komitəsinin rəhbəri
vəzifələrində çalışıb.
Hüquq üzrə fəlsəfə
doktoru olan Sultanəli müəllim uzun illər Azərbaycan Milli Elmlər Akademiyasının
akad. Z.Bünyadov adına
Şərqşünaslıq İnstitutunda elmi fəaliyyətlə məşğul
olub, 1945-ci ilin dekabr ayının 12-də
Təbrizdə təşkil
olunmuş Azərbaycan
Milli Məclisinin fəaliyyətini araşdırıb,
bu barədə çoxlu sayda dəyərli əsərləri
işıq üzü
görüb.
S.Mirzəzadə həm gənclik, həm yaşının ahıl çağlarında
da yorulmadan Vətəni və milləti qarşısında
layiqincə xidmət göstərib. 7 oktyabr 2020-ci il tarixində
95 yaşında Bakıda
vəfat edib.
***
Pişəvəri fədaisi Sultanəli
Mirzəzadənin Azərbaycan
Demokrat Firqəsinin II
qurultayındakı cıxışı
Əziz
və dəyərli dostlar, qonaqlar, hörmətli toplantı iştirakçıları!
Mən,
Sultanəli Mirzəzadə
Azərbaycan Demokrat Firqəsinin sağ qalmış üzvü kimi öz adımdan
və hazırda Firqənin mənim kimi ahıl yaşına çatmış
aqsaqqalları adından
bu əlamətdar gün münasibətilə
hamınızı və
bütün Firqə təəssübkeşlərini ürəkdən salamlayıb
toplantımıza uğurlar
arzulayıram.
Mən Firqə
yaranandan bu günə qədər onun üzvü, sıravi əsgəri olmuşam. 1945-ci ilin
dekabr ayında ələ silah götürüb Firqəmizin
göstəriş və
tapşırıqlarını bir fədai olaraq yerinə yetirmişəm.
Astara şəhəri
qəddar şah quldurlarından azad edilərkən yerli firqə fəalları sırasında olmuşam. Yaşadığım şəhərdə əmin-amanlıq
yaratmaq işində Milli Hökumətimizin bir polis işçisi kimi hüquq-mühafizə
orqanlarında çalışmışam.
Mənə verilən
tapşırıqları həmişə
can-başla yerinə yetirdiyim üçün Azərbaycan Milli Hökumətinin ali
mükafatı olan “21
Azər” medalı ilə təltif olunmuşam.
Əziz dostlar!
Bunları qeyd etməkdə məqsədim odur ki, mən Azərbaycan Demokrat Firqəsinə, Azərbaycan Milli Hökumətinə qəlbən, ruhən, bütün varlığımla bağlı şəxs olmuşam.
Mühacirət dövründə də Firqə sıralarında olub onun göstərişlərini can-başla yerinə yetirənlərdən biri olmuşam və bu gün də varam. Azərbaycan Demokrat Firqəsi Mərkəzi Komitəsinin göstəriş və məsləhəti ilə XX əsrin 60-70-ci illərində Firqənin Mərkəzi Komitəsinin təlimatçısı, Firqənin Ağstafa rayon komitəsinin məsulu vəzifələrində çalışmışam. Əməyim Firqə rəhbərliyi tərəfindən dəfələrlə Tərifnamə və Fəxri Fərmanlarla qiymətləndirilib.
Çox təəssüf edirəm ki, 1960-cı ildən sonra o vaxtkı Sovet rəhbərlərinin buyruğu ilə Firqə öz müstəqilliyini əldən verdi, amma biz firqəçilər Firqəyə olan bağlılığımızı və istəklərimizi bir an belə itirmədik. Qəti şəkildə inanırdıq ki, gün gələcək, uğrunda çoxsaylı qurbanlar verilmiş və bir illik hakimiyyəti illərində Vətənimiz Azərbaycan üçün böyük və tarixi əməllərin sahibi olan bu Firqə yenə müstəqil, xarici və daxili buyruq və təsirlərdən azad bir şəkildə müstəqil təşkilat kimi yenidən mübarizə meydanına qayıdacaq.
Mən bu gün Allahıma şükür edirəm ki, bu yaşda o günü – Azərbaycan Demokrat Firqəsinin 2-ci Konqresinin çağrılması gününü sizin toplantınızın timsalında görmək mənə qismət oldu. Bu münasibətlə sizi, Firqə təəssübkeşlərini, fədai övladlarını, bütün xalqımızı təbrik edirəm. Sonda arzu edirəm ki, Firqəmizin 3-cü Konqresi Təbrizdə təşkil edilsin. Mübarizə meydanına müstəqil, xoş məram və niyyətlərlə qədəm qoyan Firqə, sənə uğurlu, zəfərlərlə dolu sabah arzulayıram!
Soltanəli Mirzəzadə,
ADF-nin 94 yaşlı üzvü
Bakı, 9 noyabr 2019-cu il
Xalq Cəbhəsi.- 2020.- 26 dekabr.-
S.15.