Vətənpərvərlik hisslərinin təzahürü

Müharibə... dəhşət saçan anlar, intiqam, məğlubiyyət və yaxud qalibiyyət. Biz xalq olaraq Birinci Qarabağ müharibəsində məğlubiyyəti yaşadıq, nə az-nə çox, düz 28 il məğlubiyyət duyğusu altında əzildik. Amma 44 günlük Vətən Müharibəsi isə bu duyğularımızı yox etdi. Qalibiyyət yaşadıq, müzəffər Azərbaycan ordusu tarix yazdı, doğma yurd-yuvalarımız erməni tapdağından azad edildi.

İndi “qalib Azərbaycan xalqı” sözünü qürurla, fəxrlə deyirik. Bu qalibiyyətdə imzası olan hər bir vətən oğlu dəyərlidir bizim üçün. Bu qələbvə məhz şəhidlərimizin və qazilərimizin sayəsində əldə olunub. Qazi tanrının diqqətində olur həmişə. Amma onu yaşamaq, şərəflə daşımaq sözün həqiqi mənasında şərəfdir. Qazilik Azərbaycan bayrağında qırmızı rəngin simvoludur. Mübarizliyin simvoludrur. Qazilik atributdur, ləyaqət və şərəf simvolumuzdur. Qazilərimiz həm dövlət, həm də cəmiyyətimiz tərəfindən yüksək etimada layiq olan insanlardır. Qazilərə diqqət və qayğı hamımızın borcudur. Bu gün qazilərimizdən birinin – Məmmədli Ülvi Məmməd oğlunun doğum günüdür.

Məmmədli Ülvi Məmməd oğlu 24 may 1991-ci ildə Yardımlı rayonunun Anzov kəndində müəllim ailəsində anadan olub. 2007-ci ildə Şəhid Arzu Fətullayev adına Anzov kənd tam orta məktəbini bitirərək Azərbaycan Müəllimlər İnstititinun Filologiya fakultəsinə daxil olub. 2011-ci ildə ail təhsili bitirərək zabit heyətində həqiqi hərbi xidmət keçib.

Ülvi Məmmədli ali təhsilli filoloqd olaraq bir müddət jurnalistika ilə məşğul olmuşdur. Həqiqi hərbi xidmətini başa vurduqdan sonra zabit kimi cəbhə bölgəsində ən qaynar nöqtələrdə xidmətini davam etdirib. 2020-ci ilin sentyabrında könüllü olaraq Vətən müharibəsinə qoşulub, cəbhənin ən qaynar nöqtələrində hərbi əməliyyatlarda nümunəvi iştirak edib. Ağır döyüşlərdə yaralanmasına baxmayaraq xidməti davam etdirib. Azərbaycan Respublikası Konstitusiyasının 109-cu maddəsinin 23-cü bəndinə uyğun olaraq Azərbaycan Respublikasının Qubadlı rayonunun işğaldan azad edilməsi uğrunda aparılmış döyüş əməliyyatlarında iştirak edərək şəxsi igidlik və şücaət nümayiş etdirdiyinə görə Azərbaycan Respublikası Prezidenti, Silahlı Qüvvələrin Ali Baş Komandanı cənab İlham Əliyevin 29 dekabr 2020-ci il tarixli Sərəncamıyla “Qubadlının azad olunmasına görə” medalı ilə, eləcə də Cənab Prezidentin müvafiq Sərəncamıyla “Cəsur döyüşçü” medalı ilə təltif edilib.

Bir azərbaycanlı, bir zabit olaraq Ülvidə vətənpərvərlik bütün hisslərdən ən yüksəkdə durur. Bunu o, öz əməli işi ilə, Vətənə, elə, obaya verdiyi töhfələrlə biruzə verir. Bu əməlləri onun duyğu, vicdan, sədaqət tərəzisinin mizanıdır.

Məlum olduğu kimi, vətənpərvərlik hisslərinin təzahürü hər kəsin daxili aləminin təzahürüdür.Vətənə sevgi və bağlılıq ruhumuza, mənəvi dünyamıza hakim kəsilməlidir. Bu, hazırkı durumda biz azərbaycanlılara xüsusilə vacibdir. Bu gün vətən və vətənpərvərlik anlayışlarının mənəvi aspektlərdə təlqini bizə hava, su kimi gərəkdir. Bu xüsusda Ülvi və Ülvi kimi yüzlərlə, minlərlə Vətən oğlunun şəxsi nümunəsi gənc nəslə böyük bir örnəkdir. Bir xalq, bir millət olaraq vətənpərvərlik bütövlükdə insanlarımızın, vətəndaşlarımızın ruhunda, canında, qanındadır.Vətən müqəddəsdir, onu qorumaq imandandır deyiblər. İmanınız kamil olsun, vətən övladları!

Cəsur döyüşçümüzə, Qazimizə möhkəm can sağlığı və uğurlar arzulayırıq.

Malk Balaşov

Xalq Cəbhəsi.- 2024.- 6 iyun,№19.- S.15.