Elman Eldaroğlu faktoru: səmimiyyət, ədalət, dürüstlük

Elman Eldaroğlu ilə ilk tanışlığımız “Yardımlının səsi” qəzetinə görə, oldu. O zaman 2-3 il idi ki, mətbuatda fəaliyyətə başlamışdım. Təklif etdi ki, təsisçisi olduğu qəzetin baş redktoru olum və birlikdə fəaliyyət göstərək. Və uzun illər bu qəzet uğurlu fəaliyət göstərdi...

O zamandan, yəni 16 il öncədən indiyədək Elman Eldaroğlunu necə tanıdımsa, indi də elə tanıyıram.

“Yardımlı xeyriyyə cəmiyyəti”nin təsisçilərindən biri və uzun illər təşkilatın rəhbəri olduğu dönəmdə, onun rayon camaatı üçün xidmətləri əvəzsizdir. O, səmimi olaraq və bu işi sevərək fəaliyyət göstərdi. Ədalətli olmağa çalışdı və ona müraciət edən heç kimi darda qoymamaq üçün bütün imkanlarından istifadə etdi. “Yardımı xeyriyyə cəmiyyəti” yerli camaatın ümid qapısı oldu.

Bununla yanaşı həm də hər hansı bir məmur tərəfindən haqsızlığa uğrayan vətəndaşın problemlərinə dəstək verdi, yəni cəmiyyət təkcə xeyriyyə işləri ilə məhdudlaşmadı. Eyni zamanda öz hüquqlarını bilməyən vətəndaşlar üçün də ümid yeri oldu.

“Mənim üçün vətən yurddan başlanır. Yurdunu sevməyən, vətənini heç bir halda sevə bilməz...”,- deyən Elman Eldaroğlu orada doğulmasa da, orada doğulan və ya yaşayanların əksəriyyətindən əslən bağlı olduğu yurduna daha çox fayda verdi, xidmət göstərdi....

Bu gün Azərbaycanda və dünyanın müxtəlif ölkələrində yaşayan yardımlıların müəyyən hissəsinin bir-birini tanımasında, imkansız ailələrə dəstək olmaq üçün səfərbər olmasında, xeyriyyə cəmiyyətinin önəmli bir səviyyəyə gəlməsində Elman Eldaroğlunun misilsiz xidmtləri var. Bildiyim qədər ölkədə bu cür fəaliyyət göstərən təşkilatların sayı çox deyil və bu cür təşkilatlar həm də bir nümunədir. Yəni yerlərdə problemin həll olunmasında müəyyən rol oynayırlar və bununla da dövlətə dəstək vermiş olurlar.

Elman Eldaroğlu fəaliyyət göstədiyi dönəmdə heç bir zaman özünü düşünmədi, ayrı-seçkiliyə qətiyyən yol vermədi, ona müraciət edən kimsəni də “yola vermədi”. Əlindən gələni əsirgəmədi. İstər maddi, istər hüquqi, istərsə də mənəvi olaraq məzlumun, yaxud sıxıntı içində olan hər bir şəxsin yanında oldu.

Elman Elaroğlu bu işlərə könülsüz yanaşanları belə zor-xoş bu işə cəlb etdi. Yardımlıda kimsəsiz xəstələri əməliyyat etdirdi və bunun üçün Bakıda fəaliyyət göstərən savadlı həkiməri qrup-qrup rayona apardı.

Dəfələrlə imkansız sakinlər rayonda pulsuz müayinə və müalicə olundular, eyni zamanda cərrahi əməliyyat edildilər.

Valideynlərini itirmiş, yaxud imkansız tələbələrə, şagirdlərə dəstək xarakterli təqaüdlər təsis edildi. Onların oxumasına yardım göstərildi.

Rayonda hər hansı bir məmur Elman Eldaroğlu faktorunu yaddan çıxarmadı, haqsızlıq etməkdən, yaxud bəzən müşahidə etdiyimiz kimi yetimin danasını satdıracaq qədər alçalmaqdan çəkindi.

Elman Eldaroğlu cəmiyyətin büdcəsini dəqiqliklə və “Beytül-mal” prinsipinə sadiq qalaraq təyinati üzrə istifadə etdi və qəpiyinə qədər hesabatlı oldu.

Bəli, cəmiyyət böyüdükcə, inkişaf etdikcə, cəmiyyətin inkişafında heç bir rolu və əməyi olmayan kimlərsə korporativ maraqlarını bu təşkilat vasitəsilə təmin etməyə çalışdılar, yaxud ağsaqqallıq, hansısa perspektivə hesablanan tanınmaq eşqinə düşdülər və müxtəlif oyunlar başlandı...

Nə isə...

Elman Eldaroğlu həm də publisist kimi ölkədə öz üslubu ilə tanınır və azacıq da olsa xidmətləri olan heç kimi unutmur, onları yaddan çıxarmır və haqlarında portret yazılar yazır.

Bu günlərdə də hamını ad günündə yaddan çıxarmayan Elman Eldaroğlunun növbəti doğum günü idi.

Mən də öz növbəmdə Elman Eldaroğlunu təbrik edirəm, can sağlığı və fəaliyyətində uğurlar arzulayıram!

Əli Zülfüqaroğlu

Xalq Cəbhəsi .- 2024.-11 yanvar(№1).- S.15.