Almaniya-Azərbaycan münasibətlərinin böyük perspektivləri var

Dünən Azərbaycan Respublikasının Prezidenti İlham Əliyev və Almaniya Federativ Respublikasının Prezidenti Frank-Valter Ştaynmayer mətbuata bəyanatlarla çıxış edib, jurnalistlərin suallarını cavablandırıblar.

Yerli politoloqlar bu səfərin hər iki ölkə üçün böyük əhəmiyyət kəsb etdiyini söyləyiblər.

Milli Məclisin deputatı Hikmət Babaoğlu bildirib ki, Almaniya-Azərbaycan münasibətlərinin böyük perspektivləri var və bu perspektivlər tarixə söykənir:

"Lakin təəssüf ki, son dövrlərdə bu münasibətlərdə müəyyən bir soyuqluq yaranmışdı. Bu, Almaniyanın xarici siyasətdə Fransanın mövqeyindən çıxış etməsi ilə əlaqədar idi. Ancaq Almaniya Prezidenti Frank-Valter Ştaynmayerin Azərbaycana səfəri, yeni bir səhifənin açılmasına və Almaniyanın Azərbaycan münasibətlərini obyektiv şəkildə qiymətləndirməsinə imkan verə bilər. Bu da öz növbəsində, əlaqələrin daha da inkişafına yol açar".

Onun sözlərinə görə, əgər tarixə nəzər salsaq, görərik ki, ATƏT-in Minsk Qrupunun yaradılmasında, Türkiyənin Azərbaycan tərəfindən həmsədr təyin edilməsi təklifi qəbul edilmədikdə, ulu öndər Heydər Əliyev Almaniyanın həmsədr olmasını təklif etmişdi. Lakin buna da razılıq verilməmişdi. Buna baxmayaraq, tarixən Almaniya ilə Azərbaycan arasında müəyyən bir etimad mühiti mövcud olub. Bu səbəbdən, indiki mərhələdə, Almaniya-Azərbaycan münasibətlərini yeni bir səhifədən başlatmaq üçün yaxşı perspektivlər mövcuddur. Bu, həm iqtisadi, həm siyasi, həm də mədəni və humanitar sahələrdə geniş imkanlar yaradır.

O, qeyd edib ki, Azərbaycanın qərb bölgəsində almanların uzun müddət məskunlaşması və bu günə qədər bəzi ərazilərdə alman izlərinin qalması, iki ölkə arasında yeni bir münasibət qurmaq üçün yaxşı zəmin yaradır: "Almaniya bu istiqamətdə addımlar atmağa qərar verib, Azərbaycan isə hər zaman bu münasibətlərin inkişafında maraqlı olub. Son dövrlərdə ticarət mübadiləsinin artması, enerji daşıyıcıları ilə bağlı qarşılıqlı əlaqələrin dərinləşməsi, Almaniyanın Avropanın ən böyük iqtisadiyyatı olması və müasir texnologiyalarla zəngin iqtisadiyyatı, eləcə də maşınqayırma sənayesindəki potensial, Almaniya-Azərbaycan münasibətləri üçün əlverişli perspektivlər təqdim edir".

Deputat qeyd edib ki, bu səfərdən sonra Almaniya-Azərbaycan münasibətlərində yeni bir başlanğıc yaranacaq və iki ölkə arasında əməkdaşlıq daha da dərinləşəcək.

İqtisadçı Eldəniz Əmirovun fikrincə, son illərdə Almaniya ilə Azərbaycan arasında iqtisadi əlaqələr əhəmiyyətli dərəcədə inkişaf edib. Bu əlaqələr həm ticarət, həm də investisiya sahəsində müsbət tendensiyalar göstərir. Bir milyardın altında oaln ticarət dövriyyəsi 2013-cü ildə 2,1 milyard dollar, 2014-cü ildə isə özünün tarixi rekordunu yeniləyərək 2,6 milyard dollara çatdı. Lakin, 2017-ci il, pandemiya ilini istisna etmək şərti ilə, bu əlaqələrin ən aşağı səviyyəyə düşdüyü dövr oldu; həmin il ticarət dövriyyəsi yalnız 867 milyon dollar olub: “Son zamanlarda isə göstəricilər müsbət inkişaf etməyə başladı. 2025-cü ilin yanvar-fevral aylarında Azərbaycan ilə Almaniya arasında ticarət əməliyyatlarının həcmi 485 milyon dolları keçdi. Bu isə 180 faiz, yəni əvvəlki ilin eyni dövrü ilə müqayisədə 2,8 dəfə artım deməkdir. Əsasən Azərbaycan, Almaniyaya 284,9 milyon dollar dəyərində məhsul ixrac edib. Bu da 2024-cü ilin analoji dövrü ilə müqayisədə 5 dəfə çoxdur. Almaniya, Azərbaycanın ümumi ixracının 5,98%-ni təşkil edərək 5-ci ən böyük ticarət tərəfdaşı olub”.

O, qeyd edib ki, hesabat dövründə Almaniyadan Azərbaycana olan idxal 200,4 milyon dollar olub ki, bu da illik müqayisədə 76,3% artım deməkdir. Bu statistika ölkələr arasında iqtisadi əlaqələrin güclənməsinin göstəricisidir.

İnvestisiya sahəsində də nəzərəçarpan irəliləyişlər müşahidə olunub. Almaniyanın Azərbaycana qoyduğu birbaşa xarici investisiyalar 2024-cü ildə 75,3 milyon dollar olub və bu, əvvəlki illə müqayisədə 2,83 dəfə artıb. 2024-cü ildə Azərbaycanın ümumi xarici sərmayələri isə 7,05 milyard dollar təşkil edib, bu da 5,83% artım deməkdir: “Almaniya prezidenti Frank-Valter Steynmaterin Azərbaycana səfəri hər iki ölkəni iqtisadiyyatına, xüsusilə də ticarət və investisiya sahəsinə, eləcə bu əlaqələrin gələcək inkişafına təsir göstərə bilər. Çünki, bu cür səfərlər ölkələr arasında ticarət mübadiləsinin artmasına, yeni investisiya layihələrinin həyata keçirilməsinə və biznes mühitinin daha da yaxşılaşdırılmasına təkan verir”.

Politoloq Elşən Manafovun fikrincə, Almaniya Avropada Azərbaycanın ən vacib siyasi və iqtisadi tərəfdaşlarından biridir. Hazırda Almaniya Azərbaycanın xarici ticarət tərəfdaşları arasında 8-ci yerdə qərar tutub. Dövlətlər arasında ümumi ticarət dövriyyəsinin həcmi keçən il 1 milyard 249 milyon dollardan yuxarı olmuşdur. Almaniyanın Azərbaycanda qeydiyyatdan keçmiş 249 şirkəti var ki, onlardan 166-sı hazırda aktiv fəaliyyət göstərir. Bunların arasında “Siemens”, “Mercedes-Benz” kimi məşhur şirkətlər də mövcuddur.

“Almaniya ilə ticari-iqtisadi sahədə münasibətlərimiz xüsusilə enerji təhlükəsizliyi sahəsində daha önəmlidir. Cənubi Qafqaz dövlətləri sırasında ticari dövriyyənin həcminə görə Almaniya ilə münasibətlərdə Azərbaycan ilk yerdədir.

Almaniya ilə diplomatik münasibətlərimiz 1992-ci ildə qurulsa da, münasibətlərdə mahiyyət etibarı ilə yeni mərhələnin əsası ümummilli lider H.Əliyevin 1996-cı ildə Almaniyaya rəsmi səfəri zamanı qoyulmuşdur. Prezident İ.Əliyevin 2004–2023-cü illər arasında bu ölkəyə etdiyi iki rəsmi və on bir işgüzar səfər münasibətləri yüksək səviyyəyə çatdırmış, qarşılıqlı faydalı əməkdaşlıq xarakteri kəsb edib.

Almaniya Avropa Birliyinin iqtisadi baxımdan iki ən güclü dövlətindən biridir və Avropa ölkələri ilə iqtisadi əməkdaşlığın genişləndirilməsi üçün Azərbaycana böyük imkanlar vəd edir”.

Xalq Cəbhəsi .- 2025. -3 aprel(№12).- S.5.