Milli dəyərlərimizi qoruyaq və yaşadaq

Könül Quliyeva: “Ailə və məktəb gənclərin formalaşmasında, vətənpərvər ruhda böyüməsində birbaşa iştirak edir”

Ulu öndər Heydər Əliyev: “Biz öz milli dəyərlərimizlə fəxr etməliyik. Bizim milli dəyərlərimiz əsrlər boyu xalqımızın həyatında, yaşayışında formalaşıbdır. Milli dəyərləri olmayan millət həqiqi millət, həqiqi xalq ola bilməz... Biz heç vaxt öz milli dəyərlərimizi unutmamalıyıq. Onu yaşatmaq, ondan bəhrələnmək, ruhlanmaq həyatımızın əsas istiqaməti, gələcək işlərimizin zəmanətidir”.

Azərbaycan Respublikasinin Prezidenti İlham Əliyev: “Bizim üstünlüyümüz ondan ibarətdir ki, gənc və güclü dövlətimiz möhkəm təməl üzərində qurulub. Çoxəsirlik tarix, mədəniyyət üzərində qurulub. Milli-mənəvi dəyərlər bizim üçün ən vacib məsələdir. Biz təbii ki, ümumbəşəri dəyərləri bölüşürük. Ancaq bizim üçün başlıca dəyərlər öz milli Azərbaycan dəyərlərimizdir.

Azərbaycan xalqı hər zaman milli dəyərlərə sadiqliyini göstərib, bu dəyərləri əsrlərlə yaşadaraq onu inkişaf etdirib. Tarixin hər bir dövründə ölkəmizdə milli dəyərlərimizin qorunması və onun gələcək nəsillərə çatdırılması aktual olub. Elə günümüzdə də bu müsbət tendensiya özünü qoruyub saxlayır. Çünki milli dəyərlərimizin Azərbaycan xalqının formalaşmasına təsiri böyük olduğu kimi, milli dövlətçiliyimizin möhkəmləndirilməsində də xüsusi rolu var.

Milli ideologiyamızın mühüm tərkib hissələrindən biri ümumbəşəri dəyərlərdir. Bu barədə Ümummilli lider Heydər Əliyev deyib: “Mən bu gün bir azərbaycanlı kimi, özündə həm milli-mənəvi dəyərləri, həm də ümumbəşəri dəyərləri cəm edən bir insan kimi deyirəm ki, bizim xalqımızın mənəvi-əxlaqi mentaliteti onun ən böyük sərvətidir, milli sərvətidir. Bizdə nə qədər gözəl əxlaqi qaydalar var, bunlar əsrlər boyu formalaşıb, məsələn, kiçiyin böyüyə hörməti, böyüyün kiçiyə qayğısı, övladın valideynlərinə hədsiz hörməti, valideynlərin də öz övladlarına olan qayğısı və məhəbbəti. Bu, bizim xalqımızın mentalitetidir. Ümumbəşəri dəyərlər konstitusiyamızda öz əksini tapıbdır. Biz hüquqi, demokratik, dünyəvi dövlət quruculuğu prosesi aparırıq. Bax bu bir cümlədə ümumbəşəri dəyərlərin ifadəsi öz yerini tapıbdır. Ümumbəşəri dəyərlərlə milli-mənəvi dəyərlərin vəhdəti, sintezi bizim milli ideologiyamızın bu günü və gələcəyidir”.

Milli-mənəvi dəyərlərimizin qorunub saxlanmasında vətəndaş cəmiyyəti institutları da üzərinə düşən vəzifələri layiqincə yerinə yetirirlər. Belə ki QHT-lər milli mənəvi dəyərlərimizin qorunub saxlanması, gələcək nəsillərə çatdırılmas və inkişaf etdirilməsi, onların yad təsirlərdən qorunması ilə bağlı ictimiayyət arasında uğurla maarifləndirici tədbirlər həyata keçirirlər. QHT-lərə Dövlət Dəstəyi Agentliyinin bu il elan etdiyi qrant müsabiqəsində də bu mövzuya da geniş yer ayrılıb. Müsabiqədə qaliblərdən biri də “Uşaqların Gələcəyi Naminə” İctimai Birliyidir. Birliyin sdəri Könül Quliyeva qəzetimizə verdiyi açqlamada layihənin həyata keçirilməsindən bəhs edib. QHT sədri qeyd edib ki, milli-mənəvi dəyərlərimizin Azərbaycan xalqının formalaşmasına təsiri ilə yanaşı, milli dövlətçiliyimizin möhkəmləndirilməsində də xüsusi rolu vardır. Milli-mənəvi, o cümlədən dini dəyərlərimizin, adət-ənənələrimizin dərindən öyrənilməsi və araşdırılması müasir cəmiyyətimizin prioritet istiqamətlərindən biridir: “Bu il həyata keçirəcəyimiz layihənin əsas məqsədi uşaqlar, yeniyetmələr və gənclərimizin milli ruhda, bizim milli-mənəvi dəyərlərimiz əsasında tərbiyə olunmasında, müasir tərbiyədə məktəbli-müəllim-valideyn münasibətlərinin yeni prizmada tənzimlənməsi, tərbiyə işində ideal məqsədin məzmununun müasir tələblər baxımından dəyişməsinə dəstək olmaq. Bu sahədə yaranan boşluqları aradan qaldırmaq üçün məktəb-ailə arasında əməkdaşlığı inkişaf etdirməkdir. Tərtər və Bərdə rayonlarının hər birində ayrı-ayrılıqda 2 tədbir keçirməyi, daha sonra layihə mövzuzuyla bağlı yerli internet tv-də 3 maarifləndirici veriliş hazırlamağı planlaşdırmışıq.”.

O, qeyd edib ki, Azərbaycan hər zaman milli-mənəvi və bəşəri dəyərlərə ehtiram göstərən məkan olub. Bu məmləkətdə əsrlərdən bəri multikulturalizm və tolerantlıq ənənələri mövcud olub, formalaşıb. Son illər ölkəmizdə milli-mənəvi dəyərlərimizin təbliği və inkişafı istiqamətində uğurlu işlər həyata keçirilir. Mənəvi aləmimizi zənginləşdirən, milli vəhdətimizi təmin edən dəyərlərimiz sayəsində var olmuşuq və bu gün də varıq. Hər bir şəxsiyyətin yetişməsində mühitdən də əvvəl ailənin böyük rolu var. Əbəs yerə ailəni kiçik dövlətə bənzətmirlər. Əsas dəyərlər ailədə formalaşmağa başlayır. Ədalət, humanizm, vətənpərvərlik, xeyirxahlıq, mərhəmət, cəsarət, mərdlik, dürüstlük, halallıq, milli-mənəvi dəyərlərə, soy-kökünə bağlılıq, böyüklərə ehtiram və əməksevərlik ruhunda tərbiyənin əsası ailədə qoyulur. Sonradan bu tərbiyənin təkmilləşməsində təhsil ocaqları, cəmiyyət mühüm rol oynayır. Böyüklərə hörmət və ehtiram, uşaqlara diqqət, qayğı və sevginin aşılanan, xalqın milli-mənəvi dəyərlərinə, adət-ənənələrinə rəğbət öyrədilən ailə adlı müqəddəs ocaqda, böyüyüb boya-başa çatan, təhsil aldığı məktəblərdə elmi biliklərə yiyələnməklə bərabər, həm də vətəndaşlıq ruhunda formalaşan gənclər ölkəsinin, xalqının adını daha da yüksəklərə qaldırırlar. Prezident İlham Əliyev Xankəndidə Qarabağ Universitetinin açılışında deyib: "Gənc nəsl milli ruhda böyüməlidir. Ona görə biz - bütün cəmiyyət daim diqqətli olmalıyıq. Tərbiyənin əsas mənbəyi ailə və məktəbdir. Bu, əsasdır. Təbii ki, cəmiyyət, cəmiyyətdə hökm sürən ümumi ab-hava, necə deyərlər, iqlim - bütün bunlar gənc nəslin şüuruna, gələcəyinə ciddi təsir göstərir. Ona görə bu məsələ daim diqqət mərkəzində olmalıdır. Əminəm ki, belə də olacaq". Biz heç vaxt öz milli dəyərlərimizi unutmamalıyıq. Onu yaşatmaq, ondan bəhrələnmək, ruhlanmaq həyatımızın əsas istiqaməti, gələcək işlərimizin zəmanətidir. "Gələcək nəsillərə maddi sərvətlər və iqtisadi mirasla yanaşı, həm də daha çox milli irs, milli mentalitet ərməğan edilməlidir" - prinsipi əsas götürülməlidir: “Cənab Prezident İlham Əliyev ötən il məlum andiçmə mərasimindəki çıxışında ailə və məktəbin rolu barədə bir sıra məqamlara toxunub. Ölkə başçısının fikrincə, biz elə bir gənc nəsil yetişdirməliyik ki, onlar da daim bizim kimi milli ənənələrə, milli-mənəvi dəyərlərə sadiq olsunlar, beyinləri saf olsun: “Heç kim onların beyinlərini zəhərləmək istəyəndə uğura nail olmasın və burada, əlbəttə ki, ilk növbədə, ailə tərbiyəsi ön plana çıxır. Xoşbəxtlikdən, Azərbaycan ailəsi sağlam ailədir, ənənələr, milli dəyərlər üzərində qurulan ailədir. Ailə tərbiyəsi hər bir gənc üçün, hər bir uşaq üçün əsas tərbiyədir. İkinci yerdə məktəb tərbiyəsidir və belə müzəffər gənclərimizin yetişdirilməsində də Azərbaycan məktəbinin çox böyük rolu vardır. Gənclərimizin milli ruhda tərbiyə edilməsi, ənənəvi dəyərlər əsasında tərbiyə edilməsi, dırnaqarası mütərəqqi və yad dəyərlərin tamamilə cəmiyyətimizdən silinməsi - bu vəzifə bizim hamımızın qarşısında durur, hər bir ailə qarşısında durur və dövlət qarşısında durur”.

Bu iki məsələnin vəhdəti çox vacibdir. Çünki ailə və məktəb gənclərin formalaşmasında, vətənpərvər ruhda böyüməsində birbaşa iştirak edir. Ailə və məktəb tərbiyəsi arasında dinamik əlaqənin təmin olunması, bu məsələdə fasilənin yaranmasına imkan verilməməsi və bir-birini tamamlaması çox vacibdir. Hər iki sahə ilə bağlı olan müvafiq icra, hökumət orqanlarının fəaliyyəti və s. amillər vacibdir. Təbii ki, ailə tərbiyəsi güclü olarsa, məktəbdə təhsilin səviyyəsi üstün olarsa, bunlar bir-birini tamamlayarsa bütün bunlar baş verməyəcək. Ancaq təssüflər olsun ki, yeniyetmə və gənclər arasında narkomaniyaya aludəçilik danılmazdır, məktəblərdə şagirdlər siqaret çəkir, tez-tez məktəblilər arasında bıçaqlanma hadisələri ilə üzləşirik, bir sıra ailələr uşağın təlim-tərbiyəsi ilə maraqlanmır və s. Boşluqları aradan qaldırmaq üçün məktəb ilə ailə, müəllim ilə valideyn arasında körpü yaratmaq, əməkdaşlıq vacibdir. Bizim layihəmiz buna istiqamətlənib. Hər il olduğu kimi bu il də donor təşkilatın dəstəyi ilə layihəmizi müvəffəqiyyətlə başa vuracağıq”.

K.Quliyevanın sözlərinə görə, milli-mənəvi dəyərlər cəmiyyəti ayaqda saxlayan, ictimai həmrəyliyi təmin edən əsas sütunlardır. Bu sütunlar nə qədər güclü olsa, cəmiyyət də bir o qədər mənfi yad təsirlərdən sığortalanmış olar. Prezident İlham Əliyev də andiçmə mərasimində məhz bu məqamı önə çəkir: “Bütövlükdə milli-mənəvi dəyərlərə gəldikdə, bu, bizim cəmiyyətimizin əsasıdır və bu, sarsılmaz varlıqdır, sarsılmaz dəyərdir və bunu sarsılmaz etmək bizim əlimizdədir”.

Cavid

Xalq Cəbhəsi .- 2025.- 10 aprel(№13).- S.9.