“Hazırda ikinci dünya müharibəsindən sonra formalaşan dünya düzəninin çöküş prosesini izləyirik”

Əli Zülfüqaroğlu: “2020-ci ildə olduğu kimi gözlənilməz hadisələrin şahidi ola bilərik”

Amerikalı milyarder İlon Mask ABŞ-nin “Azadlıq Radiosu” və “Amerikanın səsi” radiostansiyalarını bağlamalı olduğunu deyib. Bu haqda “X” hesabında yazan Mask bu radiostansiyalara heç kim qulaq asmadığını və onların fəaliyyətinə ildə təxminən 1 milyard dollar xərcləndiyini deyib. O bildirib ki, boğucu bürokratiya xaric olmaqla Avropa indi azaddır. Artıq heç kim onlara qulaq asmır. Onun fikrincə, bu radiostansiyaları öz-özünə danışan, dəli radikal solçular idarə edir. Eyni zamanda, hər iki radiostansiyaya ABŞ vergi ödəyiciləri tərəfindən toplanan təxminən 1 milyard dollar xərclənir.

Qeyd edək ki, “Azadlıq radiosu” və “Amerikanın səsi” bir sıra digər media orqanları kimi ABŞ hökuməti tərəfindən maliyyələşdirilir və ABŞ Qlobal Media Agentliyi tərəfindən idarə olunur.

Ədalət, Hüquq, Demokratiya (ƏHD) Partiyasının İdarə Heyətinin üzvü, siyasi şərhçi Əli Zülfüqaroğlu “Sherg.az”a deyib ki, Donald Tramp hakimiyyətə gəldikdən sonra qlobal savaşın Amerika Birləşmiş Ştatlar daxilində start götürəcəyi gözlənilirdi: “Tramp birinci prezidentliyinin son ilində Birləşmiş Millətlər Təşkilatının kürsüsündə səsləndirdiyi fikirlərlə savaşın mahiyyətini açıqlamışdı. O, ikinci dəfə hakimiyyətə gəldikdən sonra savaşın daha geniç vüsət alacağı bəlli idi. Məhz buna görə də Trampın hakimiyyətə gəlməsinə qarşı əngəllər törədilirdi və sui-qəsd cəhdi verirdi. Bundan sonra da Trampa qarşı sui-qəsd cəhdlərinin olması mümkündür. ABŞ daxilində ciddi prosesin şahidi oluruq. USAİD və “Azadlıq radiosu”, “Amerikanın səsi” ilə bağlı görüləcək tədbirlər deməyə əsas verir ki, artıq savaş ciddi mərhələyə keçib. Bu isə dünyada bir sıra proseslərin başlamasına və davam etməsinə gətirib çıxaracaq. Eyni zamanda dünyada gərginliyin daha da artmasına şərait yaradacaq. Söhbət qlobalçılarla Donald Trampın təmsil etdiyi milli dövlətçilərin savaşından gedir. Bu isə dünya ictimaiyyətindən gizlədilən bir çox sirlərin açılacağından xəbər verir. Belə olan halda bütün sahələrdə paradiqma dəyişikliklərini müşahidə edə bilərik. Əlbəttə, buraya insan haqları, səhiyyə, qida, təhsil, siyasi və bütün sahələri özündə birləşdirən fəaliyyət istiqamətləri daxildir. Ümumiyyətlə ABŞ daxilində baş verən proseslərin getdikcə daha genişləcəyini görəcəyik. Çünki USAİD kimi bənzər təşkilatların sayı yüzlərlərlədir. Hətta elə təşkilatlar var ki, mediada adı açıqlanmasa belə, dünya ictimai rəyinin manipulyasında ciddi önəm daşıyır, eyni zamanda ciddi maliyyə imkanlarına sahibdir. Təkcə USAİD-in büdcəsi 50 milyard dollar idi. Bu isə bəzi dövlətlərin büdcəsindən 2-3 dəfə çoxdur. Amerikada müxtəlif əyləncələr və narkotik aludəçilərinin sayı o qədər çoxalıb ki, xalq köləlik və istehlakçı kütlə rolu oynadığından xəbərsizdir. Bu vəziyyət bilərəkdən yaradılıb”.

Ekspert söyləyib ki, Tramp Amerikanın idarəçilik sisteminin milli dövlət ideologiyası üzərində qurulacağının mesajını verir:

“Belə olan halda qlobal oliqarxiya və federal ehtiyat sisteminin Amerikanı silahlı güc kimi istifadə etmək dönəmi sona çatacaq. Burada söhbət dünya hakimiyyəti uğrunda gedən savaşdan gedir. Savaşı aparan dünya liderləri arasında öndə gedənlərdən biri Donald Trampdır. Paradoks görünsə də, Trampın Rusiya və Türkiyəyə ehtiyacı var. Biz qarşıdurma formatının dəyişəcəyinin və fərqli formatların şahidi olacağıq. Məsələn, ABŞ-nin Rusiya, İranla gərgin münasibətləri yumşaltmağa çalışacaq və ideoloji savaşı əsas götürəcək Tramp və təmsil etdiyi gücə qarşı ciddi təzyiqlər olacaq. Eyni zamanda Tramp Administrasiyası da köhnə administraiya dönəmində ABŞ-nin müttəfiqləri olan Avropa İttifaqı ölkələrinə qarşı ciddi təzyiqlər edəcək.

Məsələn Fransa və Almaniya hökümətini misal göstərə bilərik. Həmin ölkələr Avropa İttifaqının siyasi və iqtisadi liderləridir. Ona görə də yaxın müddətdə Avropa İttifaqı lider ölkələrinin hökümətlərinə qarşı çox ciddi şəkildə Amerikanın təzyiqlərinin artacağını görəcəyik. Bunun ilk işartıları artıq müşahidə olunur. Tramp həmçinin bildirmişdi ki, Ona qarşı atılan addımlara adekvat siyasət yürüdəcək. Avropa İttifaqının xüsusilə lider ölkələrinin başçıları Trampın seçilməməsi üçün əllərindən gələni etdilər. Bu isə o deməkdir ki, həmin hökumətlər problemlərə hazır olmalıdır”.

Ə.Zülfüaroğlu vurğulayıb ki, Donald Tramp Amerika Birləşmiş Ştatları sadəcə iki cinsiyyət üzərindən siyasət yürüdəcək deməklə LGBT və digər xəstə ideoloji xətlərin sıradan çıxarılacağı mesajını verdi: “Avropa Komissiyasının Prezidenti Ursula fon der Leyen isə söylədi ki, “biz Trampla əməkdaşlıq etməyə hazırıq, lakin Avropa dəyərlərinə qarşı mövqeyimizi qoruyacağıq”. Yəni LGBT və ona bənzər pozğun meyillərin Avropa dəyərləri adı altında inkişafında maraqlı olacaqlar. Bu ideoloji toqquşma deməyə əsas verir ki, ABŞ-nin yeni höküməti ilə Avropa İttifaqının lider ölkələri arasında gərginlik ciddi səviyyəyə yüksələk. Belə olan halda ABŞ-nin yeni höküməti tərəfindən Avropa İttifaqı ölkələrində sağçı liderlərə dəstək veriləcək. Bu isə Avropa ölkələrində ixtişaşlara, eyni zamanda qlobal maliyyə sisteminin kuklası rolunda istifadə olunan Emmanuel Makron kimi marionetlərin sıradan çıxarılmasına hesablanan proseslərin şahidi olacağıq. Bu da eyni zamanda Avropa İttifaqının dağılma prosesini sürətləndirəcək. USAİD kimi bənzər təşkilatlar Avropa İttifaqında da fəaliyyət göstərir. Onlara qarşı da müəyyən tədbirlərin görüləcəyini zaman-zaman müşahidə edəcəyik. Eyni zamanda “Azadlıq radiosu” və “Amerikanın səsi” kimi müxtəlif məqsədlərə xidmət göstərən, xüsusilə dünya ictimai rəyinin manipulyasiyası üçün alət rolunda istifadə olunan bu cür media qurumlarına qarşı sərt tədbirlərin görüləcəyinin şahidi olacağıq”.

Ə.Zülfüqaroğlu bildirib ki, dövlətlərarası müharibə arxa plana keçir və ideoloji savaşlar önə çıxır: “Nəticə etibari ilə tərəfdaş olan ölkələr düşmənə, qarşıdurma vəziyyətində olan dövlətlər isə müttəfiqə çevriləcəklər. Bundan sonra bir sıra təşkilatlar və media quruşlarının sıradan çıxarılma prosesi daha geniş vüsət alacaq. Xüsulə də, Amerika Birləşmiş Ştatlatı daxilində, eyni zamanda Avropa İttifaqı və başqa bölgələrdə də həmin prosesi izləyəcəyik. Həmin təşkilatlar prosesin sadəcə bir elementi qismində çıxış edir. Baş verənlər həmçinin dünyanı daha çətin vəziyyətlə üz-üzə qoyacaq. Hazırda ikinci dünya müharibəsindən sonra formalaşan dünya düzəninin çöküş prosesini izləyirik. 2020-ci ildə olduğu kimi gözlənilməz hadisələrin şahidi ola bilərik”.

Xalq Cəbhəsi .- 2025.- 13 fevral(№6).- S.6.