“Tamaşaçılar Azərbaycan tarixinin şanlı səhifələrindən biri ilə yaxından tanış olacaq”

Azərbaycan Dövlət Milli Gənc Tamaşaçılar Teatrında yazıçı-dramaturq İlqar Fəhminin “Şahnamə” pyesi əsasında eyniadlı tamaşa hazırlanır. Səhnə əsərinin məşqləri artıq başlayıb.

Tamaşa haqqında quruluşçu rejissor, Əməkdar artist Nicat Kazımov “Xalq Cəbhəsi”nə məlumat verib.

“Tamaşa Səfəvilər dövləti, Şah Abbas haqqındadır”

”Şahnamə” tamaşasının məqşləri artıq başlayıb. Hələlik oxunuş mərhələsindəyik. Səhnə əsəri yazıçı-dramaturq İlqar Fəhminin “Şahnamə” əsəri əsasında hazırlanır. Tamaşa Azərbaycan tarixinin ən şanlı səhifələrindən biri olan Səfəvilər dövləti, Şah Abbas haqqındadır. Səhnə əsəri 4 hissədən ibarətdir. Birinci hissə Şah Abbasın 16 yaşında taxta çıxdığı zaman haqqındadır. Bu hissənin adı “Şətrənc”dir, yəni şahmat. İkinci hissə “Qan qoxusu”dur. Bu artıq Şah Abbasın 25 yaşı olduğu zaman ona qarşı hazırlanan çevriliş planını darmadağın etməsi barədədir. Üçüncü hissə “Zindan” adlanır. Bu hissədə Şah Abbasın yaşı 40-ı keçdikdən sonra kamillik dövrü təsvir olunur. Dördüncü hissə isə onun ölümqabağı özünə vəliəhd seçməsi haqqındadır”.

Əməkdar artist qeyd edib ki, tamaşada 4 Şah Abbas var: “Birinci bölümdə Şah Abbas rolunda mənim oğlum Sənan Kazımovdur, ikincidə Niyaz Qasımov və Bəhram Əliheydər, üçüncü bölümdə dublyor olaraq Şah Abbas mən və Elnur Kərimov, sonuncu bölümdə isə Şah Abbas Xalq artisti Qurban İsmayılovdur. Bundan başqa tamaşada Milli Gənc Tamaşaçılar Teatrının sevilən, istedadlı, bacarıqlı aktyorları da rol alıb. Aktyor heyətinin sayı 30-dan çoxdur. Onların içində əməkdar artistlər Rasim Cəfər, Elnur Hüseynov, Nofəl Vəliyev, aktyorlardan Kərəm Hadızadə, Ramil Məmmədov, Anar Seyfullayev, Elşən Hacıbabayev, Elşən Şıxəliyev, Anar Səfiyev və bir çoxları iştirak edir. Kiminsə adını demədimsə məndən inciməsinlər. Gənc aktyorlarımız da iştirak edir. Düşünürəm ki, inşallah mart ayının sonuna tamaşaçıları maraqlı bir tamaşa gözləyir. Tamaşanın rəssamı Mustafa Mustafayevdir. Tamaşada dövrə uyğun musiqilərdən istifadə edəcəyik. Musiqi tərtibatı olacaq”.

N.Kazımov vurğulayıb ki, bu səhnə əsəri ilə tamaşaçılar Azərbaycan tarixinin şanlı səhifələrindən biri ilə yaxından tanış ola biləcək: “Düşünürəm ki, teatrımızın repertuarında heç olmasa 2 ildən bir Azərbaycan dövlətçiliyinin tarixini əks etdirən tamaşa olmalıdır. Biz də bu yolda Milli Gənc Tamaşaçılar Teatrı adını doğrultmaqdan ötrü əlimizdən gələni əsirgəməyəcəyik”.

Röya İsrafilova

Xalq Cəbhəsi .- 2025.- 23 yanvar(№3).- S.15.