AKP-nin erməni siyasəti düşmənləri sevindirir

Türk xalqı isə Ermənistanla sərhədlərin açılmasının əleyhinədir

"İlımlı islam" adı ilə hakimiyyətə gələn AKP-nin Ermənistanla sərhədləri açmaq siyasəti Türkiyədə, Azərbaycan Respublikasında, Güney Azərbaycanda, diaspor qurumlarımızda ruh düşkünlüyü yaradıb. Milyonlarla türkün heysiyyatının üstüdən keçib üç milyon erməniyə görə sərhədləri açmaq yalançı dinçilərin nəyinə lazımdır? Son bələdiyyə seçkiləri göstərdi ki, "iılımlı" adı ilə qardaş Türkiyəni çıxılmaza sürükləyən, ölkənin dünyəvi quruluşunu dəyişməyə çalışan AKP-nin hakimiyyətinin sonu yaxınlaşır. Ən azı növbəti seçkilərdə AKP siyasi gündəmdə qalsa da təkbaşına, ağlına gələn qərarı vermək iqtidarında olmayacaq.

Elə bələdiyyə seçkiləri göstərdi ki, türk seçicisi AKP-nin özbaşınalığının qarşısını almaqdadır. Məncə, AKP-nin Barak Obamanın qarşısında əldən-ayaqdan getməsinin mühüm bir səbəbi də var. Məhz bu məqamı da nəzərə alaraq Ermənistanla sərhədlərinin açılması ehtimalının daha çox olduğunu söyləmək mümkündür. Artıq AKP-nin "ılımlı islamçı" adıyla şişirdilib hakimiyyətə gəlməsində, Böyük Orta Şərq Planının müəllifi olan Corc Buş hakimiyyətdən gedib. Onu xüsusi vurğulamaq lazımdır ki, məhz Buşun vaxtında onun dövlət katibi Kolin Pauel ilk dəfə açıq şəkildə Türkiyə haqqında "ılımlı islam" terminini işlədib. Bununla da faktiki olaraq, demokratik, laik (dünyəvi) Türkiyə haqqında yanlış beynəlxalq ictimai rəy yaradılmağa başladılıb. Birbaşa olaraq dinçi AKP-nin hakimiyyətdə olmasına haqq qazandırılıb, sanki türk seçicisinin seçməyə başqa bir partiyası yoxmuş. Corc Buşun hakimiyyətdən getməsilə dar siyasi görüşlü, tarixi bilməyən AKP rəhbərlərinin siyasi çöküşü başlayıb. İmam Xətib mədrəsələrindən gələn AKP kadrlarından başqa bir şey gözləmək də mümkün deyil. Siyasətə Hikmətyarın ayağının altında otura-otura gələn AKP rəhbərlərindən nə gözləyəsən? Bəzən Türkiyədə də bir sıra siyasətçilərin cəmiyyətə baxışı onların təriqət dünyagörüşündən kənara çıxmır, nəticədə də Ermənistanla sərhədlərin açılması kimi yanlış siyasi xətt ortaya çıxıb. Çox təəssüf ki, AKP hakimiyyətə gələndən bəri Ermənistanla gizli diplomatik danışıqları da Azərbaycanın yaxşı tanıdığı, Azərbaycanın yaxşı tanıdığı diplamatlar həyata keçirib. Gör, siyasi irədə nə qədər güclü imiş ki, ermənilərin qondarma iddialarından, Ermənistanın Azərbaycan torpaqlarını işğal etməsində kifayət qədər məlumatlı olan diplomatlar belə 1993-cü ildən bəri yürüdülən dövlət siyasətinin yanlış istiqamətə yönləndirilməsinin qarşısını ala bilməyiblər.

Barak Obama Mustafa Kamal Atatürkün Anıt Qəbrini ziyarət etməsi zamanı Türkiyənin laik, dünyəvi dövlət olmasını xüsusi vurğuladı. Türk müşahidəçiləri Birləşmiş Ştatların yeni prezidenti Barak Obama Corc Buşun "ılımlı islam" planından danışmadı. Belə olduğu təqdirdə isə AKP-nin "ılımlı islam" bazarı ölür. Bu hakim partiyanın rəhbərliyi isə Birləşmiş Ştatların yeni rəhbərliyinin rəğbətini qazanmaq üçün Ermənistanla sərhədlərin açılması məsələsində güzəştli mövqe tutur. Sanki Türkiyənin, eləcə də Azərbaycanın həyati əhəmiyyətli məsələsində geri çəkilmək AKP-nin hakimiyyətdə qalmasına şərait yaradacaq. Onu da xüsusi vurğulamaq lazımdır ki, məhz "ılımlı" AKP hakimiyyətə gəldikdən sonra Türkiyənin Avropa Birliyinə üzvlüyü prosesi tıxanıb.

Danimarkanın baş naziri Rosmussenin NATO baş katibi seçilməsi prosesi isə AKP hakimiyyətinin mahiyyətini ortaya çıxardı. NATO baş katibi seçkisindən iki gün əvvəl Rosmussenin namizədliyilə bağlı şou yapan Rəcəb Tayyib Ərdoğan guya Barak Obamanın vədiylə iddiasından geri çəkildi. Belə çıxır ki, Obama vəd versə, AKP Ermənistanla sərhədləri açacaq. Uca peyğəmbərimizin təhqir olunmasını ifadə azadlığı sayan, terrorçu PKK-ya məxsus "Roj" televiziyası ilə bağlı nala-mıxa vuran Rosmussenin NATO baş katibi seçilməsinə mane ola bilməyən AKP rəhbərliyinin dindarlığı harada qaldı? Bəs, AKP başbilənləri 6 ay əvvəldən NATO-ya yeni baş katib seçiləcəyini bilmirdilər? Onun seçilməsinin qarşısını almaq üçün əvvəlcədən diplomatik iş görmək mümkün deyildi? Gərək seçkiyə iki gün qalıanda şou yapıb sonra iddialarndan geri çəkilərdin? Baş verənlər belə nəticəyə imkan verir ki, Ərdoğanın Davos forumunda İsrailin prezidenti Şimon Pereslə mübahisəsi də öz siyasi fiqurunu xilas etməyə, bələdiyyə seçkilərində səs qazanmağa yönəlmişdi. Amma zaman keçdikdə AKP iqtidarının şübhəli mahiyyəti üzə çıxır. Çox təəssüf ki, "ılımlı islam"çıların atdıqların addımlar, terrorçu "Həmas"la əlaqələri, Ermənistan siyasəti dünyada, eləcə də Azərbaycandaki türk, Türkiyə düşmənlərinin baş qaldırmağa, Türkiyə, türkçülük əleyhinə kampaniya aparmağa həvəsləndirir.

Ümumiyyətlə, Ermənistanla sərhədlərin açılması məsələsinə münasibətlə Azərbaycanda bir sıra istiqamətlər ortaya çıxıb. Rəsmi strukturlarla yanaşı, bir çox partiyalar, QHT-lər, ictimaiyyətin əksəriyyəti bu siyasətdə məhz AKP hökumətini günahlandırır, Ermənistanla sərhədlərin açılmasının Türkiyənin, Azərbaycanın dövlət və milli maraqlarına uyğun olmadığını vurğulayırlar. Bu mövqeni Türkiyənin müxalifət partiyaları, ictimaiyyət nümayəndələri, tanınmış ziyalıları, KİV-ləri dəstəkləyirlər. Türk xalqı qardaş Azərbaycanın maraqlarının əleyhinə işğalçı Ermənistanla sərhədlərin açılmasının yolverilməz olduğunu bildirir, bunu AKP hakimiyyətinin ən ciddi və bağışlanmaz səhvi olduğunu qeyd edirlər. Eyni zamanda o da vurğulanır ki, AKP hökumətinin milli və dövlət maraqlarını kənara qoyaraq, ABŞ-ın təzyiqi ilə işğalçı Ermənistanla sərhədləri açması yalnız bu partiyanın hakimiyyət ömrünün uzadılmasına xidmət göstərir.

İkinci bir qrup isə guya özlərini Türkiyəyə yaxın göstərirlər, AKP-nin tənqidini "Türkiyənin tənqidi" kimi qələmə verməyə çalışırlar. Bu həmin qüvvələrdir ki, prezident seçkilərindən sonra Türkiyənin üzərinə səlib hücumuna keçmişdilər.

Üçüncü qrup isə, AKP hökumətinin Ermənistan siyasətini sevinclə qarşılayanlardır. Mahiyyətcə türk düşmənləri olan bu azsaylı qrup guya sərhədlərin açılmasına etiraz olaraq türk mahnılarının efirdə verilməsini dayandırırlar, hətta "TRT Avaz"ın alternativi olaraq rus kanallarının Azərbaycanda yayımlanmasını "təklif" edirlər. Bu qüvvələrin Türkiyə əleyhinə düşmənçilikləri AKP-nin erməni siyasətindən fərqlənmir. Azərbaycan müstəqilliyini bərpa edəndən sonra Türkiyə, eləcə də digər türk dövltləriylə müxtəlif sahələrdə əməkdaşlığın genişlənməsi, ortaq türk mədəniyyəti, ortaq türk dilinin, bütövlükdə Türk Birliyinin yaradılması istiqşamətində addımlar ruspərəst, farspərəst avromərkəzçilərin ciddi narahatçılığına səbəb olur. Latın qrafikalı əlifbaya keçidi, həmin vaxt rusbaşlıların, farsbaşlıların qaldırdıqları hay-küyü xatırlayın. Həmin qüvvələr indi də yalançı dinçi AKP-nin bu səhvindən yararlanmağa çalışırlar. Əslində üzünü ərəblərə çevirən AKP rəhbərliyi Ermənistan siyasəti nəticəsində Türk Dünyasının parçalanması, ziddiyyətlərin artmasından narahat deyil. Bəlkə də bunda maraqlıdırlar. Çünki Türk Dünyasının önə çıxması istər-istəməz Türkiyədə də öz təsiri göstərir, demokratik, dünyəvi quruluş tərəfdarlarının, milliyyətçi qüvvələrin möhkəmlənməsinə yardım göstərir.

Çox təəssüf ki,Azərbaycanda hələ də rusbaşlılar (rusdillilər yox) gündəmdən itməyiblər. Həmin qüvvələr zaman-zaman özlərini göstərirlər. Türk mahnılarını efirə verməyənlərə sual vermək lazımdır. Azərbaycan torpaqlarını Ermənistanın adıyla Rusiyanın işğal etməsi təkzib olunmaz faktdır. 20 Yanvar faciəsi, Xocalı soyqırımını rusların törətməsi, Şuşanını, Laçının və başqa rayonlarımızın işğalında Rusiyanın əli olması gün kimi aydındır. Onda niyə rus dilində mahnıları, kinoları efirə verirsiniz? Əgər dövlət dilinə hörmət edirdinizsə, elə türk dilindəki seriallar efirə titrlərlə verilərdi də. Türk seriallarının yayımını həddən artıq qərəzli şəkildə dayandırmaq, ictimaiyyəti qəzəbləndirmək türk düşmənçiliyi deyil, bəs nədir? Türk mahnılarının, türk seriallarının yayımını dayandıranlar kimdən acıq çıxırlar? AKP bu gün var, sabah yoxdur. Amma Türkiyə və Azərbaycan qardaşlığı, birgəliyi daimidir. Bunun qarşısını türkün düşməni olan ən qəddar imperiyalar belə ala bilməyiblər. Yəqin ki bu ağrılı günlər də arxada qalacaq. Amma bu gün Qərbdə, Şərqdə olan türk düşmənlərinin səyi nəticəsində təxribatlar törədilir. Bu təxribatların nə qədər davam edəcəyi, hansı formalarda üzə çıxacağını bilmək çətindir. Həddən artıq ehtiyatlı olmaz lazımdır.

... Çox təəssüf ki, AKP-nin yanlışlarla dolu siyasəti nəticəsində Qərb ölkələrinin Türkiyəyə təzyiq etmək imkanları artıb. Nə yazıq ki, məhz bu siyasət nəticəsində türk düşmənləri dirilib, qardaşlar arasında zidiyyət toxumu salmağa çalışırlar. Nə yazıq, nə yazıq, nə yazıq...

Göytürk

Xalq Cəbhəsi.- 2009.- 10 aprel.- S.6.