AKP-nin oyunbazlığı

Türkiyədə hakimiyyətdə olan AKP hökuməti Ermənistanla sərhədləri açmaq istəyini nə qədər gizli saxlasa da, baş nazir Rəcəb Tayyib Ərdoğan Azərbaycanı inandırmaq üçün nə qədər vədlər versə də, hər şey ortadadır. Yəni Türkiyə mediası-hakimiyyətə yaxın olan və olmayan-eyni zamanda hakimiyyətdə təmsil olunanlar belə ən geci bir il ərzində altı il bundan öncə AKP yetkililərinin başlatdıqları işi-Ermənistanla sərhədləri açmaq niyyətlərini rəsmiləşdirəcəklərini yazırlar və deyirlər. AKP-yə yaxınlığıyla seçilən "Zaman" qəzetinin yaydığı məlumata görə, Türkiyə hökuməti Ermənistanla sərhədlərin açılmasını Azərbaycanın sərt etirazları nəticəsində təxirə salsa da, bu məsələyə yaxın aylarda yenidən qayıdılacaq.

Qəzet yazır ki, Ermənistanla aparılan danışıqlar nəticəsində xeyli ölçüdə razılaşdırılmış sənəddə Dağlıq Qarabağ münaqişəsinin həllinə dair məsələ yer alacaq. Ancaq anlaşmada münaqişənin həll olunması üçün son müddət və ya möhlət göstərilməyəcək: "Ankaraya görə, Qarabağ münaqişəsinin həlli ən yaxşı halda 10-15 il çəkəcək. Bu baxımdan Ermənistanla anlaşmada müddət qoyulması Türkiyənin manevr imkanlarını daraldır. Ankara Ermənistanla sərhədlərin açılması halında təkrar qapadılması ehtimalını çox zəif sayır. Ancaq sərhəd bağlanmasa belə ermənilər Qarabağ münaqişəsinin həllini ləngidən fəaliyyətlər göstərsə o zaman sərt viza rejimi tətbiq oluna bilər. Belə ki, sərhədlər açıq olsa da, sərt qaydalar tətbiq etməklə onu faktiki bağlı duruma gətirmək mümkündür".

Qəzet daha sonra yazır ki, Ərdoğanın son bəyanatı Azərbaycanı bir qədər rahatladıb. Ancaq sözügedən qəzəet baş nazirin son bəyanatının diqqətlə oxunmasını məsləhət görür: "Baş nazir Dağlıq Qarabağda sülh əldə edilməyincə Ermənistanla Türkiyə arasında yekun anlaşma əldə olunmayacağını, amma ön çalışma və hazırlıq işləri aparıla biləcəyini deyib. Məlumatlara görə, sərhədlərin açılması məsələsi bu ilin sonunda və ya gələn il gündəmə gələ bilər".

Türkiyənin digər bir mətbu orqanında işıq üzü görən yazıya nəzər salaq. "Milliyet" qəzetinin köşə yazarı Semih İdiz yazır: "Rəsmi Bakının atdığı bu gözlənilməz addımları AKP liderlərinin asanlıqla unudacaqlarını düşünmürəm. Səbəb isə məlumdur. Türkiyənin Ermənistanla münasibətlərini zorla Dağlıq Qarabağ probleminə bağlamaq İrəvanla az qala bir əsirlik problemimizin həllini təxirə salmaqdır. Üstəlik Dağlıq Qarabağ münaqişəsinin nizamlanmasında hər hansı irəliləyiş də gözlənilmir. Ermənistanla münasibətlərin normallaşmasına yönəlmiş cəhdlərin indi Azərbaycan rəhbərliyinin istəyilə ləngidilməsi ABŞ və Avropa Birliyilə əlaqələr baxımından baş nazir Rəcəb Tayyib Ərdoğanla Türkiyənin başını xeyli ağrıda bilər. Bütün bunları nəzərə alaraq AKP rəhbərliyi, Türkiyə prezidenti və baş nazirinin Bakının son addımları ilə Azərbaycan rəhbərliyinin davranışlarından məmnun olduqlarını düşünmək sadəlövlükdür. Türkiyənin Azərbaycan uğrunda indiyədək etdiyi fədakarlıqların müqabilində Bakıdan da Qüzey Qıbrıs Türk Cümhuriyyətilə bağlı addımların istəniləcəyi də mümkündür".

Əslində Türkiyənin "Zaman", eləcə də "Milliyet" qəzeti əldə etdiyi məlumatları yazmaqla, həm də Azərbaycanı dolayısıyla hədələdi. Digər tərəfdən isə AKP hakimiyyətinin və eləcə də baş nazir Ərdoğanın Azərbaycana qarşı qeyri-səmimiliyi təsdiqini tapdı. Yəni məlum oldu ki, Azərbaycan parlamentində təmsil olunan partiyaların Türkiyə-Azərbaycan münasibətlərilə bağlı keçirəcəyi dəyirmi masaya hakim Ədalət və İnkişaf Partiyasının təmsilçiləri qatılmaya bilər. Türkiyə Böyük Millət Məclisindəki Azərbaycan Dostluq Qrupunun AKP-çi rəhbəri Mustafa Kabakçı deyib ki, AKP-nin Azərbaycanda və ya başqa hər hansı ölkədə öz ölkəsinin müxalifətilə mübahisəyə girişmək kimi bir ənənəsi yoxdur və olmayacaq: "Bizim əvvəlcədən Bakıda keçiriləcək toplantıya qatılmaq fikrimiz vardı. Bu gün də gündəmimizdə Bakıya səfər var. Amma indi məlum olur ki, bizim müxalifətdən olan bəzi dostlarımız dostluq qrupunda müzakirə etmədən, mövqe müəyyənləşdirmədən Bakıya yola düşüblər. Açıq-aydın ortada bir qarışıqlıq yaratma havası var. Biz bu prosesdə iştirak etməyəcəyik. Mən bu gün bizim Xarici İşlər Nazirliyilə danışdım, bir daha danışacam, sonra partiyamızın qrup toplantısında bir daha müzakirə edəcəyik. Ondan sonra Bakıdakı tədbirə qatılıb-qatılmamaqla bağlı qərarımızı verəcəyik". AKP yetkilisi Azərbaycanı Türkiyəyə qardaş və dost ölkə bilirsə, o zaman bu sözləri dilinə gətirməməliydi. Türkiyənin hakim və müxalifət partiyalarından olan millət vəkilləri yabançı bir ölkəyə gedib orada mübahisə etsəydilər, bunu başa düşmək olardı. Yaddan çıxarmaq olmaz ki, onlar Azərbaycana gəlirlər. Bir də ki, əgər baş nazir Rəcəb Tayyib Ərdoğanın "Dağlıq Qarabağ problemi çözülməyincə Ermənistanla sərhədlər açılmayacaq" vədi həqiqəti əks etdirirsə, onda nədən Türkiyənin müxalifət və iqtidar partiyaları Bakıda dartışsınlar? Yəni Türkiyədən gələn millət vəkillərinin bu yöndə fikirləri yekdildirsə, Azərbaycanda sadəcə dostun dostla, qardaşın qardaşla dialoqundan bəhs olunacaq. Və Azərbaycan, eynilə də Türkiyə cəmiyyəti bir daha əmin olacaq ki, bu dostluğa və qardaşlığa kölgə salınacaq nələrəsə yol verilməyəcək. Ancaq çox təəssüf ki, AKP yetkililərinin sözlərilə əməlləri bir-birinə tamamilə ziddir. Onlar qardaş dedikləri Azərbaycan türklərinə qarşı siyasi oyunbazlıqla məşğuldurlar.

Bu yerdə Erməni Strateji Araşdırmalar Mərkəzinin prezidenti Riçard Kirakosyanın açıqlamasına diqqət yetirək. Türkiyə və Azərbaycan arasındakı münasibətlərdə yaranmış vəziyyətdən xeyli məmnun qalan Riçard Kirakosyan deyib: "Türkiyənin baş naziri Ərdoğan iqtidarı bizim indiyədək edə bilmədiyimizi reallaşdırdı və "bir millət, iki dövlət" şüarının aktuallığını azaltmağa başladı".

Yazdığım mövzuyla bir o qədər bağlılığı olmasa da, bir nüansı qeyd etmək istəyirəm. Xəbər verildiyi kimi Türkiyədə terror təşkilatı olduğu iddia edilən "Ergenekon"la bağlı qondarma istintaq çərçivəsində 12-ci həbs dalğası başlanıb. Prokurorlar 50 nəfərin həbsi və onların evlərində, iş yerlərində axtarış aparılmasına dair sanksiya veriblər. Bu sanksiya əsasında 18 bölgədə eyni anda əməliyyat başlayıb. Hədəfdə yenə əvvəlki əməliyyatlarda olduğu kimi, Türkiyənin dünyəvi dövlət sisteminin fəal tərəfdarları və mövcud AKP hökumətinin fəal əleyhdarlarıdır. Belə ki, polis Çağdaş Yaşamı Dəstəkləmə Dərnəyinin mərkəzi ofisində, bölgə ofislərində və dərnəyin sədri, professor Türkan Saylanın evində, Başkənd Universitetinin və "Kanal B" televiziyasının sahibi, professor Mehmet Haberalın evində, televiziyanın ofisində və universitetin xəstəxanalarında, İnönü Universitetinin keçmiş rektoru, professor Fateh Hilmioğlunun evində, Atatürkçü Düşüncə Dərnəyinin sədr əvəzi, Uludağ Universitetinin sabiq rektoru, professor Mustafa Yurdquranın evində, 19 may Universitetinin keçmiş rektoru, professor Fərid Bernayın evində axtarış aparır. Adı çəkilən şəxslərin həbs ediləcəyi gözlənilir. Müxalifət hökuməti bu əməliyyatla diqqəti AKP-nin son seçkilərdəki uğursuzluğundan və Ermənistanla sərhədlərin açılması yönündə atılan addımlardan yayındırmaq cəhdində ittiham edir.

Türkiyənin müxalifət partiyalarından olan CHP və MHP də "Ergenekon"la bağlı həbs dalğasına etirazlarını bildirib.

MHP parlament fraksiyasının həmsədri Mehmet Şandır məhkəmə-hüquq sisteminin müstəqilliyinə hörmət etdiklərini, ancaq bu həbs dalğalarının insanları çaş-baş saldığını deyib. Həbs olunan şəxslərdən Ankaradakı Başkənd Universitetinin rektoru və "Kanal B" televiziyasının sahibi, professor Mehmet Haberalın günahsız olduğuna inandıqlarını söyləyən Mehmet Şandır baş verənləri narahatlıqla izlədiklərini bildirib: "Sanki milləti ələ salırlar. Hörmətli Haberalın demokratiyaya, cümhuriyyətə qarşı hər hansı əməl törədə biləcəyinə inanmıram. Haberal millətə xidmət göstərən bir şəxsiyyətdir. Onun uğurlarının qiymətləndirilməsi yerinə bu cür olayın baş verməsi bizdə narahatlıq yaradır".

Ölkə gündəmində çox ciddi məsələlər olduğuna diqqət çəkən Mehmet Şandır hökuməti gündəmi dəyişdirmək cəhdində ittiham edib: "Maraqlıdır ki, hökumət nə zaman çətin vəziyyətə düşürsə, gündəmi dəyişdirmək üçün həbs dalğasına başlayır. Hazırda gündəmdə Azərbaycan məsələsi, Türkiyə üçün tarixi xəta olacaq Ermənistanla sərhəd qapısının açılması məsələsi var. AKP hökumətinin bağlı qapılar arxasında verdiyi sözlər və atdığı addımlar cəmiyyətdə müzakirə olunarkən yeni bir həbs dalğasının başlamasını təsadüf kimi qiymətləndirmək mümkün deyil". Mehmet Şandır bu yolun Türkiyəyə və türk millətinə xeyir gətirməyəcəyini vurğulayıb.

Doğrudan da nə vaxt Ermənistanla sərhədlərin açılması məsələsinə Azərbaycan tərəfdən sərt təpki göstərilir, o zaman Türkiyədə milləti sevənlər, Azərbaycana sonsuz sevgisi olanlar həbslərə atılır. Bəlkə də gizli planın tərkib hissələrindən biri də budur- milli düşüncə sahibləri həbs edilsin və AKP hakimiyyəti ABŞ-ın sifarişlərini Türkiyədə bircə-bircə həyata keçirsin. Ancaq AKP hakimiyyətinin nələr planlaşdırmağından asılı olmayaraq Türkiyə müxalifəti, ümumilikdə Türkiyə cəmiyyəti, siyasi dairələri, Türkiyə Türkləri Azərbaycanın yanındadır.

Arzu Şirinova

Xalq Cəbhəsi.- 2009.- 15 aprel.- S.8.