Yunus Oğuzun romanı öz imzası ilə oxuculara təqdim olundu

Tarixi xronoloji ardıcılıqla, quru cümlələrlə öyrənmək həvəsində olmayanlar, gizli keçmişin qaranlıq sirlərini tarixi əsərlər-romanlar vasitəsilə də öyrənə bilərlər. Belə ki, maraqlı təsvirlərlə verilən tarixi romanlar hər zaman oxucu rəğbəti qazanır. Belə kitabları mütaliə edən oxucu həm tarixi bilgilərini zənginləşdirir, həm də ki, mütaliə etmiş olur. Ədəbiyyat tariximizdə maraqlı tarixi romanları ilə yaddaşlarda əbədi yaşayan, ədəbiyyat tarixində özünə əbədi yer tutan romanlarımız çoxdur.

Hansı ki, həmin əsərləri oxucular bu gün də sevə-sevə oxuyurlar.

Son zamanlar da tarixi romanlar yazılır. Bu kitabların arasında yaxın keçmişimizdə baş verən hadisələri işıqlandıranlarla yanaşı, tariximizin dərinliklərində olmasına baxmayaraq bu günə kimi doğru-düzgün işıqlandırılmayan mövzulara, tarixi şəxsiyyətlərə həsr olunmuş kitablar da var. Yazıçı-publisist, türkoloq-alim Yunus Oğuzun "Nadir şah" romanı da məhz bu cür əsərlərdəndir. Dünən Yazıçılar Birliyinin "Bayatı" kitab mağazasında "Nadir şah"ın imza gününə toplaşanlar da bir daha kitabla bağlı bu fikirləri səsləndirdilər. İmza mərasimində cəmiyyətin ziyalı təbəqəsinin nümayəndələri, tələbələr, millət vəkilləri, bir sıra mətbu orqanların baş redaktorları iştirak edib. Tədbirdə ilk sözü Azərbaycan Yazıçılar Birliyinin katibi, "525-ci qəzet"in baş redaktoru Rəşad Məcid dedi. Yunus Oğuzun "Nadir şah" romanını oxuduqdan sonra bəzi tənqidi məqamları müəllifə çatdırdığını da bildirdi: "Ümumilikdə kitab Azərbaycanın keçmişinə yeni baxış nöqteyi-nəzərindən dəyərli bir əsərdir. Yunus Oğuzun tarixi romanı oxumağa layiq əsərdir. İnanıram ki, müəllif bundan sonrakı əsərlərində də daha təkmil olacaq və bu əsərlər də oxucu məhəbbəti qazanacaq". Redaktor tədbirin keçirildiyi kitab mağazasında yeni nəşrlərin imza mərasiminin keçirilməsinin artıq bir ənənəyə çevrildiyini də dedi. Sözünü təkrar Yunus Oğuzun sonuncu kitabı - "Nadir şah"ın üzərinə gətirən Rəşad Məcid romanın çox məşhur olmasından söz açdı. Kitabın ikinci dəfə nəşr olunduğunu bildirən baş redaktor onun tariximizin yazılmamış səhifələrini işıqlandırması və eləcə də tariximizlə bağlı yeni bir baxış formalaşdırması baxımından oxuyanlar tərəfindən yüksək qiymətləndirildiyini bildirdi.

Tədbirdə millət vəkili Xanhüseyn Kazımlı dediki, kitab oxumaq insanı mənəvi cəhətdən silahlandırdığı üçün bu vacib məqama meyli gücləndirmək vacibdir: "Nadir şah" kimi tariximizi ortaya çıxaran kitabların yazılması, tarixi qəhrəmanlara ruh verilməsi çox vacibdir. Xarici ölkələrdə kitabxanaların qarşısında kitab almaq üçün hər zaman növbələr olur, amma təəssüf ki, bu ənənə bizdə yoxdur". Yazıçı, millət vəkili Aqil Abbas Yunus Oğuzun maraqlı tarixi romanlar yazdığını bildirdi. Yazıçıya uğurlarının davamlı olmasını arzulayan millət vəkili kitabların imza günlərinin kitab mağazalarında keçirilməsinin çox gözəl ənənə olduğunu vurğulamağı da yaddan çıxarmadı. Bir neçə romanın müəllifi, ssenarist Ənvər Seyidov isə öz çıxışında yazıçının "Nadir Şah"dan əvvəl yazdığı kitablardan söz açıb. "Attila"nın, eləcə də imza mərasimi keçirilən tarixi romanın qısa zamanda çox məşhurlaşdığını vurğulayan natiqin fikrincə, kitablar oxuculara təqdim olunmalıdır ki, hər bir insan gözəl əsərlərdən yararlana bilsin.

"Xalq Cəbhəsi" qəzetinin baş redaktoru, şair Elçin Mirəzəbəyli müəllifin tarixi romanında Nadir şahın əvvəllər bizə təqdim olunduğundan fərqli olmasından söhbət açıb. Kitabın Azərbaycan tarixini dərindən araşdırmağa imkan verdiyini vurğulayıb.

Filologiya elmləri doktoru, millət vəkili Nizami Xudiyev isə öz çıxışında əsərlərin yaddaşlarda yaşamasının səbəbini izah edib. Dilçi alimin fikrincə, hər hansı bir əsər xalqa, onun düşüncə tərzinə xidmət edəcəksə, əbədi yaşaya bilər. Yunus Oğuzun yazdığı tarixi romanların məhz bu qəbildən olduğunu deyən alim müəllifin türkün varlığını çox yüksək qiymətləndirdiyini bildirib. Natiqin sözlərinə görə, müəllif öz əsərlərində, tarixi romanlarında türkün tarixi-keçmişi, gələcəyi haqqında çox orijinal fikirlər irəli sürür. Millət vəkili daha vacib bir məqamı da önə çəkib. Belə ki, tarixi romanlar müəllifi olan Yunus Oğuz türkün tarixi ilə bağlı ədəbiyyatları çox dərindən öyrənib. Mütəmadi mütaliələr nəticəsində isə öz xalqına dəyərli romanlar, əsərlər bəxş edir.

Türk Hərəkatı İctimai Birliyinin rəhbəri Həbib Ələkbərov da "Nadir şah"la bağlı öz fikirlərini bölüşdü. Romanın ilk oxucularından biri olduğunu deyən Həbib Ələkbərov: "Kitab haqqında çox sözlər demək olar. Birincisi çox alqışlanası haldır ki, kitabda Azərbaycanın bir folklor toplusu cəmlənib. Bu da Yunus Oğuzun Azərbaycan folklorunu çox gözəl bilməsindən xəbər verir". Həbib Ələkbərovun fikrincə, kitab gələcəkdə həm də bir folklor nümunəsi kimi də istifadə olunacaq: "Əsər tarixi roman olması ilə bərabər həmçinin yazıçının keyfiyyətlərini də üzə çıxarır. Burda yazıçının böyük xaqanı - Nadir şahı duyma intuisiyası var. Müəllif əsərdə həmçinin bu məqamı da ortaya qoyub. Tutaq ki, tarixçilər tarixi şəxsiyyətlərin müsbət və mənfi tərəflərini qələmə alırlar. Yunus Oğuz isə göstərir ki, bu adam birincidirsə, onun müsbət tərəfləri daha çoxdur. Bizim bəzi yazıçılarımız bu məqamı qəbul etmək istəmirlər. Yunus Oğuz isə böyük bir sərkərdənin nə qədər böyük bir mənəviyyata və bilgilərə malik olmasını duyub". Natiqin fikrincə, Yunus Oğuz bu əsər vasitəsilə Azərbaycan xalqına qiymətli hədiyyə verib.

Çıxışçılardan sonra müəllif də öz fikirlərini iştirakçılara çatdırdı. Yunus Oğuz tarixi roman sevənlərə xoş xəbər çatdırdı. Belə ki, müəllif hazırda daha iki kitab üzərində işlədiyini və yaxın vaxtlarda onları da oxucularının ixtiyarına verəcəyini bildirdi: "Bəxtiyar Tuncayla birlikdə yazdığımız "Türkün gizli tarixi" adlı kitabımız yaxın zamanda hazır olacaq. Bundan başqa hazırda Təhmasib haqqında olan tarixi əsərin üzərində işləyirəm ki, o da yaxın zamanda hazır olacaq".
Daha sonra tədbirdə imza mərasimi baş tutdu. Məkan baxımından balaca olmasına baxmayaraq, mənəvi dəyəri böyük olan "Bayatı" "Nadir şah" romanıyla daha yaxından tanış olmaq istəyən oxucularla doldu. Tələbələr, eləcədə digər kitab həvəskarları haqqında bu qədər söz açılan kitabı əldə etmək üçün sıraya düzüldülər.

Xalq Cəbhəsi.- 2009.- 23 aprel.- S.7.