Meksikada Xocalı soyqırımı anılıb

Latın Amerikasının ən böyük ali təhsil ocağı sayılan Meksika Milli Muxtar Universitetində Xocalı qırğınına həsr olunmuş "Onların yeganə günahı azərbaycanlı olmaq idi" mövzusunda konfrans kecirilib. Universitetin Siyasi və sosial elmlər fakültəsində təşkil edilən tədbirə professor və tələbə heyəti üzvləri, Meksika Xarici İşlər Nazirliyi və Senatının nümayəndələri qatılıblar. Tədbiri ali təhsil müəssisəsinin Beynəlxalq Münasibətlər Mərkəzinin elmi katibi Marko Lopategi açaraq, Azərbaycan xalqı və hökumətinə Xocalı faciəsinin ildönümüylə bağlı başsağlığı verib. O bildirib ki, bütün beynəlxalq ictimaiyyət kimi, Meksika da Dağlıq Qarabağ münaqişəsinin tezliklə həll edilməsini arzulayır. Geniş məruzə edən Azərbaycanın Meksikadakı diplomatik nümayəndəliyinin müvəqqəti işlər vəkili İlqar Muxtarov isə deyib ki, Azərbaycan xalqı 200 ildən bəri terror, məcburi köçürülmə və etnik təmizləmə kimi hadisələrlə üzləşir. 19-cu əsrin əvvəllərində çar Rusiyasının erməni mənşəli əhalini Türkiyə və İrandan Azərbaycana köçürdüyünü vurğulayan İlqar Muxtarov etnik təmizləmə siyasətini əsas götürən erməni terroçuların 20-ci əsrdə Azərbaycanın müxtəlif bölgələrində yerli əhalini qırdığını, azərbaycanlılar yaşayan kəndləri yerlə yeksan etdiyini söyləyib. İlqar Muxtarov 1992-ci il fevralın 25-26-da Xocalı şəhərində baş verən faciənin ermənilərin işğalçı və cinayətkar siyasətinin bir hissəsi olduğunu xatırladıb: "Xocalıda həyata kecirilənlər qəddarlıq erməni terrorunun əsas xüsusiyyətinə uyğun idi. Ermənilər adətən qurbanlarına həddindən-artıq əzab vermək məqsədilə onları müxtəlif işgəncələrlə öldürürlər. Erməni rəsmiləri Xocalı faciəsi də daxil olmaqla münaqişə zamanı etdiyi cinayətlərə görə məsuliyyəti danır və beynəxlaq ictimaiyyətə hadisələri öz yozumlarında çatdırmağa çalışırlar. Lakin heç bir uydurma təbliğat faktlar qarşısında dayana bilməz. Ermənilərin azərbaycanlılara qarşı törətdiyi vəhşiliklərin hər biri xalqımızın ürəyinə sancılan bir tikandır. Bu hadisələr heç zaman unudulmayacaq. Azərbaycan münaqişənin sülh yolu ilə həllini axtarsa da, Xocalıdakı dəhşətli cinayətləri həyata keçirənləri ədalət mühakiməsi qarşısına gətirməkdə qətiyyətlidir". Toplantı zamanı Xocalı faciəsi haqda Heydər Əliyev Fondunun hazırladığı sənədli film və Xocalı qurbanlarını əks etdirən fotosərgi nümayiş etdirilib.

Turqut

Xalq Cəbhəsi.- 2009.- 17 fevral.- S.8.