Türk mətbuatında Xocalı soyqırımı

"AKP hökumətinin Qarabağ məsələsində susqunluğu azərbaycanlıları çox üzür"

Dünən Xocalı soyqırımı ilə bağlı Türkiyədəki bir sıra media qurumlarında xəbərlər və yazılar yer alıb. Bu sırada "Cihan", "Anadolu" agentliklərini, "Star", "Yeni çağ", "Ayqazete", "Ortadoğu" və digər qəzetləri yad etmək olar. Məsələn, "Ayqazete" dünən "Azərbaycan Xocalı şəhidlərinə ağlayır" başlıqlı xəbər verib. Yazıda qeyd olunur ki, Qarabağın Xocalı şəhərində 17 il əvvəl qətliama məruz qalan yüzlərlə azərbaycanlı bütün ölkədə keçirilən müxtəlif səviyyəli tədbirlərdə anılıb.

"Dağlıq Qarabağda yerləşdirilən SSRİ-nin 366-cı motaatıcı alayının dəstəyi ilə 26 fevral 1992-ci ildə strateji önəmə malik Xocalıya hücum edən Ermənistan əsgərləri 106 qadın, 63 uşaq, içərilərində 70 yaşlılar da olmaqla, 613 kişini qətlə yetiriblər. 487 nəfər əlil olub, əsir alınan 1.275 nəfərdən 150-nin aqibəti hələ də bəlli deyil".

"Bu gün" qəzetinin köşə yazarı Huh Gönültaş isə yazısında Xocalı faciəsi və AKP hökumətinin Qarabağ məsələsində son dövrlər sərgilədiyi susqunluqdan bəhs edib. Məqalədə yazılır ki, Xocalı Azərbaycanın Dağlıq Qarabağ bölgəsində bir şəhərdir. Azərbaycan müstəqilliyini elan etdikdən sonra Rusiyanın 366-cı motaatıcı alayının dəstəyilə Ermənistan silahlı qüvvələri Xocalıya hücum edib. Qadın, uşaq, yaşlı demədən insanlar qətlə yetiriliblər. Bu gün Azərbaycan torpaqlarının 20 faizi Rusiyanın dəstəklədiyi Ermənistanın işğalı altındadır. Ermənilər işğalın sərhədlərini genişləndirmək üçün əllərindən gələn hər şeyi edirlər. Huh Könültaş yazır ki, sərhəddə yerləşən azərbaycan kəndləri, qəsəbələri təhdid altındadır. Snayperlərdən açılan atəş nəticəsində 150 azərbaycanlı öldürülüb: "Bizim burada olduğumuz son iki gün ərzində iki Azərbaycan əsgərini erməni snayperləri vurdu və onlar şəhid oldu. Ortada rəsmi bir atəşkəs var, amma faktiki çatışmalar davam edir". Daha sonra müəllif sadə azərbaycanlıların AKP hökumətinin yürütdüyü siyasətdən narahatlığını nəzərə çatdırır: "Azərbaycan rəhbərliyində və küçələrdəki vətəndaşda Türkiyənin Ermənistanla apardığı müzakirələr üzündən ciddi bir əndişə var. Qaba desək, "Əcabə Türkiyə bizi satarmı?" əndişəsi içindədirlər. Hər kəs Türkiyə Ermənistan sərhədlərini açarsa, Azərbaycanın Qarabağ bölgəsini əsla geri ala bilməyəcəyinə inanır. Çünki bu məsələdə Azərbaycanın arxasında sadəcə, Türkiyə var. Rusiya, Amerika və hətta Avropa ölkələri təəssüf ki, erməniləri dəstəkləyirlər. AKP hökumətinin Qarabağ məsələsində susqunluğu azərbaycanlıları çox üzür və burada da bəzi kəsimlər durumdan Türkiyə əleyhinə istifadə edirlər".

Huh Gönültaş azərbaycanlıların türk mətbuatından ciddi şikayətləndiklərini bildirir: "Türk mətbuatının Hrant Dinkin ölüm ildönümünə ayrılan yer və zamanı Qarabağa münasibətdə ayırmadığını, Xocalı soyqırımına yer vermədiyini söyləyirlər. Azərbaycanlı qardaşlarımız "Könül umduğundan küsər" deyirlər".

Jurnalist Azərbaycan Mətbuat Şurasının sədri Əflatun Amaşovun onunla görüşdə söylədiklərinə də yer ayırır: "Əflatun Amaşov Türkiyəyə çox böyük sevgiləri olduqlarını söylədi. Bizə bir xatirəsini də danışdı. Dedi ki, "Qalatasaray" Avropa çempionu olanda İranda olublar. Bunu eşidəndə küçəyə çıxdıqlarını və sevinclərini sərgilədiklərini bildirdi. İran polisi də nə baş verdiyini araşdırmaq üçün onları tutub. "Qalatasaray"a görə sevindiklərini eşidəndə polis "Sizə nə?" deyib. Cavabında Əflatun Amaşov "biz də türkük" söyləyib. İranlı polislər çaşıblar". Huh Görültaş yazır ki, azərbaycanlılar "bir millət, iki dövlət" sözlərini tez-tez dilə gətirirlər: "Bəxtiyar Vahabzadə də "Dil yoxsa, millət də yox" deyib". Jurnalist Azərbaycan muğamına vurğunluğunu etiraf edib.

Mikayıloğlu Ramiz

Xalq Cəbhəsi.-2009.-27 fevral.-S.6.