Bulanıq suda balıq tutmaq sevdası

Və ya Dağlıq Qarabağ münaqişəsilə bağlı "qrant layihəsi"

Novruz bayramından sonra yazacağım ilk mövzu yenə də Dağlıq Qarabağ münaqişəsilə bağlıdır. Bu dəfə ATƏT-in Minsk qrupu həmsədrlərinin ikibaşlı oyunlarından deyil, Azərbaycanın bir qrup QHT rəhbərlərinin və mətbuat işçilərinin xarici ölkə səfərlərindən sonra guya ki, münaqişənin xeyrimizə həll olunacağı, bu istiqamətdə atılan addımlardan məmnunluq duyduqlarından yazmaq istəyirəm. İndi isə həm QHT rəhbərlərinin, həm də jurnalistlərin son səfərlərindən qısa xəbərləri və açıqlamaları diqqətinizə çatdırım.

Martın 27-29-da Gürcüstanın paytaxtı Tiflisdə Avropa Əməkdaşlıq Fondunun layihəsi əsasında Dağlıq Qarabağ münaqişəsini işıqlandıran Azərbaycan və Ermənistan jurnalistləri üçün üç günlük seminar keçirilib.

Seminarın keçirilməsinə Böyük Britaniya Xarici İşlər Nazirliyi və USAİD maliyyə dəstəyi göstərib. Qeyd edək ki, seminara hər iki tərəfdən 10 jurnalist qatılıb. Başa çatan seminarda jurnalistlərin qarşılıqlı düşmənçiliyinin deyil, qarşılıqlı sülhün yarana bilməsi üçün göstərə biləcəkləri istiqamətlər, xidmətlər müzakirə olunub. Seminarın yekun qərarına əsasən, hər iki münaqişə tərəfi müharibə qurbanlarının indiki durumu ilə bağlı film çəkəcək, Ermənistan və Azərbaycan jurnalistlərinin münaqişəylə ilgili informasiyalarının yerləşdirilməsi üçün birgə sayt yaradılacaq, birgə qəzet məqalələri hazırlanacaq.

Vyanada ATƏT sədrinin şəxsi nümayəndəsi və Minsk qrupunun həmsədrləri, Azərbaycan və Ermənistanın vətəndaş cəmiyyətinin nümayəndələrilə Dağlıq Qarabağ münaqişəsinin həllinə dair keçirilən keçirilən ictimai forum barədə təəssüratlarından danışan politoloq Eldar Namazov bildirib ki, 5 saatlıq dialoq nələrdənsə xəbər verir: "Minsk qrupunun həmsədrləri hesab edirlər ki, münaqişənin nizamlanmasıyla bağlı əsas prinsipləri əxz etdirən sənəd artıq hazırdır. Belə görünür ki, həmsədrlər ölkə rəhbərlərilə apardıqları sülh danışıqlarına paralel olaraq, Azərbaycan və Ermənistan ictimai xadimlərini də prosesə cəlb edərək, onlarla dialoq aparırlar. Bu görüşlərin məqsədi ictimaiyyəti gedən danışıqlar barədə məlumatlandırmaqdır. Düzdür, həmsədrlər həmin sənədi bizə bütövlükdə təqdim etmədilər. Ancaq sənəddəki əsas prinsiplər və öz yanaşmaları haqqında kifayət qədər informasiyaları bizimlə bölüşdülər. Vyanadakı forumda eşitdiyim bəyanatlar, informasiyalar onu deməyə əsas verir ki, hazırda Minsk qrupu çərçivəsində gedən proses daha çox mərhələli həll variantının üzərində qurulub". Eldar Namazovun sözlərinə görə, həmsədrlərin açıqlamaları görüşdə iştirak edən Azərbaycan tərəfini qane edib. Ermənilər isə eşitdiklərindən o qədər də razı qalmayıb: "Amma onlara izah olundu ki, beynəlxalq vasitəçilərin mövqeyi belədir və onlar da bununla barışmalıdırlar".

Forumda iştirak edən digər QHT rəhbərləri də eyni fikirlər səsləndirib. Hətta ermənilərin acınacaqlı vəziyyətindən danışıb, onların peşiman olduğunu dilə gətiriblər.

Göründüyü kimi, Aərbaycanın bəzi QHT rəhbərləri və jurnalistləri bir müddət əvvəl başlanan "xalq diplomatiyası" oyununun növbəti mərhələsini həyata keçirirlər. Jurnalistlərin ermənilərlə birgə sayt yaratmaları və birgə məqalələrin hazırlanması, nəhayət, bəzi QHT rəhbərlərinin sözügedən forumdan məmnun qayıtmaları dediklərimizə bariz nümunədir. Ancaq məsələ burasındadır ki, "xalq diplomatiyası" oyununda iştirak edənlər sonradan bunun yanlışlığını başa düşdülər. Anladılar ki, bu, ancaq ermənilərin maraqlarına işləyən bir projedir. Yəni Bakıdan durub Dağlıq Qarabağdakı separatçıların ayağına getmək, onların "rəmzləri" altında danışıqlar aparmaq separatçıların "müsəqillik" arzularını gerçəkləşdirilməsi deməkdir. Xatırlayırsınızsa, bu sayaq görüşlər və forumlar dəfələrlə keçirilib. Hər dəfə də eyni vəziyyətin şahidi olmuşuq. Yəni ermənilər cildə girərək, dialoqa gedən azərbaycanlılarla çox sıcaq təmaslar qurur, guya ki, peşman olduqlarını dilə gətirir, iqtisadi və sosial çətinliklərindən danışıb bizləri təsirləndirir, sonradan həyasızcasına deyirlər ki, "Dağlıq Qarabağ ya müstəqil olmalı, ya da Ermənistanın tərkibinə keçməlidir". Digər bir məqam isə yeni qrant layihələriylə bağlıdır. Bu layihələrin Azərbaycana zərərinin miqyasını belə gözə almayanlar bundan bəhrələnməyə çalışırlar. Belə əqidə daşıyıcılarına yalnız bunu deyə bilərik-"bazar olmasın".

Arzu Şirinova

Xalq Cəbhəsi.- 2009.- 31 mart.- S.8.