Terror, yoxsa qanlı cinayət...

Mütəllim Rəhimli: "İlkin təəssüratlarıma görə, Neft Akademiyasında baş verən olay terror aktıdır"

Hikmət Hacızadə: "Daha çox terror olayına oxşayır"

Mikayıl Rəhimli: "Bu hadisəni törətmiş şəxs, yaxud şəxslər uzun müddət hazırlaşıblar"

Azərbaycan Dövlət Neft Akademiyasının binasında baş verən dəhşətli qətl bir çox suallar yaradıb. 13 nəfərin ölümü, 10 nəfərin yaralanması ilə sonuclanan olay siyasi qətl, yoxsa qanlı cinayətdir? Bu suala cavab tapmaq üçün siyasilərin təəssüratlarını öyrəndik.

Ədalət Partiyası sədrinin müavini Mütəllim Rəhimli deyir ki, məsələylə bağlı rəsmi orqanlar cəmiyyətə kifayət qədər açıqlama vermir. Bu da bir çox hallarda şayələrin yayılmasına səbəb olur. Onun sözlərinə görə, əldə olunan məlumatlar və şəxsi müşahidələr göstərir ki, bu, çox sadə məsələ deyil, kifayət qədər mürəkkəbdir.

"İlkin təəssüratlarıma görə, bu, terror aktıdır. Terror aktının törədilməsində də məqsəd təkcə ali məktəbə gəlib, tələbələri öldürməkdən ibarət olmayıb. Fikrimcə, bunun arxasında çox ciddi məqsədlər dayanır. Ancaq mənim üçün bu məqsədlər qaranlıqdır. Düzdür, açıqlanan məlumatlarda deyilir ki, hadisəni törədən şəxs Gürcüstan vətəndaşıdır, Rusiyada yaşayıb, Rusiyadan Azərbaycana gələrək bu hadisəni törədib. Amma hesab edirəm ki, bu məlumatlar da nəticə çıxarmaq üçün yetərli deyil. Bu, müəyyən məsələləri ört-basdır etməyə hesablana bilər". Mütəllim Rəhimli hesab edir ki, hadisə ciddi şəkildə araşdırılmalıdır: "Əməliyyat işçiləri daha yaxşı bilər, amma mənim zənnimcə, qətlləri törədən Fərda Qədirov tək olmayıb. Görünür ki, bu hadisə qrup şəklində həyata keçirilib. Ola bilsin ki, atəş açan bir nəfərdir. Məsələnin çox ciddi tədqiqata ehtiyacı var. Bu hadisənin arxasında gizli məqsədlər dayanır. Məsələn, kimlərəsə, hansısa qurumlara təzyiq məqsədi daşıya bilər".

Sabiq səfir Hikmət Hacızadə dedi ki, baş verən hadisədən sarsıntı keçirir, xalqımız böyük faciədir. O düşünür ki, belə hadisəni ya psixi xəstə törədə, ya da bu, hansısa mərkəzlərin planlaşdırdığı terror aktı ola bilər: "Fərda Qədirov psixi xəstəyə də oxşayırdı. Dünyada belə psixi xəstələrin törətdikləri qətlləri tez-tez eşidirik. Bu, 2009-cu ildə dünyada törədilən üçüncü belə hadisədir, Almaniyada, ABŞ-da da oxşar faciə baş verib. Azərbaycanda törədilən bu hadisə daha çox terror olayına oxşayır. Terror aktı kiminsə tapşırığıyla böyük bir planın tərkib hissəsi olaraq icra edilir. Bunu da üzə çıxarmaq üçün gərək istintaq aparılsın, əsaslar müəyyənləşdirilsin".

BAXCP Ali Məclisinin sədri Mikayıl Rəhimli baş verən olayı hansısa təsadüfün nəticəsi saymır. O hesab edir ki, bu hadisəni törətmiş şəxs, yaxud şəxslər uzun müddət hazırlaşıblar. Onların niyyətlərinin nədən ibarət olduğunu bu gün demək çox çətindir. Mikayıl Rəhimli inanır ki, hüquq-mühafizə orqanları tezliklə bu məsələyə aydınlıq gətirəcək, hadisənin nədən baş verdiyini, kimlərin maraqlarına xidmət etdiyini müəyyənləşdirəcəklər: "Azərbaycan övladlarına qarşı belə qəsdi həyata keçirmək vəhşilikdir, insanlığa yaraşmır. Bu günkü tablo baş verən sadəcə, bir vəhşilik olduğunu göstərir, bir nəfərin vəhşi ehtiraslarının nəticəsi kimi görsənir. Heç bir ciddi motiv, səbəb ortada yoxdur. Hadisəyə heç bir mülahizə ilə aydınlıq gətirmək mümkün deyil. Məsələni araşdırmaq, qatilin əlaqələrini öyrənmək lazımdır. İnsanlığa belə nifrət Fərda Qədirovda necə, haradan qaynaqlanıb? Ayrı-ayrı vaxtlarda müxtəlif ölkələrdə belə hadisələr olub. İzahları tapılıb, təsadüflər də olub. Bu məsələ də sona qədər araşdırılmalıdır. Heç bir halda düşünmək olmaz ki, bu, bir təsadüfdür. İnsan buna uzun müddət hazırlaşıb, silah, patron əldə edib, sonra da vəhşicəsinə qətllər törədib". Mikayıl Rəhimli dedi ki, sıradan bir insan ali məktəbin tədris korpusuna daxil olub və belə dəhşətli qətllər törədib: "Məsələ dərindən araşdırılmalı və qanlı olayın nədənləri müəyyənləşməlidir. Əgər hadisənin başqa iştirakçıları, təhrikçiləri, yönəldiciləri varsa, tezliklə üzə çıxarılmalıdır. Belə hadisələrin Allah etməsin, bir daha təkrarlanmaması üçün ciddi tədbirlər görülməlidir. Mən də dünyasını dəyişən bütün insanların ailələrinə başsağlığı verirəm, yaralananlara tezliklə sağalmağı arzulayıram". Ali Məclis sədri hesab edir ki, hadisədən ciddi nəticə çıxarılmalı, hüquq-mühafizə orqanları tədris müəssisələrinin mühafizəsini gücləndirməlidirlər: "Belə şübhəli insanlar auditoriyalara qədər yol tapa bidirlərsə, deməli, bu sahədə ciddi problemlər var, Təhsil Nazirliyi, hüquq-mühafizə orqanları önləyici tədbirlər görməlidirlər".

Ramiz Mikayıloğlu

Xalq cəbhəsi.- 2009.- 2 may.- S.6.