"Kamal" jurnalının 3-cü sayı

Azərbaycanda sovet dövründən fərqli olaraq son 10-15 ildə sırf elmi-kütləvi jurnallar az qala köşklərdə gözə dəymir. Görünür, ölkədə kitab mağazalarının tamam azaldığı bir dönəmdə elmi-kütləvi jurnallar da oxucu sarıdan qıtlıq keçirir deyə, bunların çapı naşirlərə sərf etmir. Sovet dövründə böyük tirajla çıxan "Elm və həyat" jurnalının hər kənddə belə neçə-neçə oxucuları vardı. Adamlar jurnalı oxuyub biri-birlərinə ötürürdülər. İndi isə köşklərdə məzmunsuz "sarı mətbuat"la bağlı jurnalların üstündəki adətkərdə yarıçılpaq şəkillər adamları özünə çağırmaq üçün biri-biriylə yarışa giriblər.

Ancaq ən çətin zamanda belə xalqın elmdən əl çəkməsi mümkün deyil. Artıq 3-cü sayı işıq üzü görən "Kamal" adlı jurnal bu baxımdan yaxşı bir ənənə başlayıb. "Milli maarifləndirici, elmi-texniki jurnal" devizi altında çıxan jurnal maraqlı elmi yazıları ilə yanaşı dizaynı, habelə keyfiyyətli çap kağızı ilə də diqqəti cəlb edir. Əlbəttə, belə jurnalları hamı oxumaq istəməz. Lap ona bəlkə də havayı versən. Di gəl ki, məzmunsuz jurnalları hamı oxumaq istər. Çünki onları oxumaq çox asandır.

Jurnalda maraqlı yazılar yer alıb: "Ştrix kod nədir?", "Qazmaçı robotlar Ayı insanları gəlişinə hazırlayırlar", "Özünü müalicə edən elastik beton yaradılıb", "Fossiliyalar necə meydana çıxır?", "Gənc Yerin tarixi", "Yerdə həyat həmişə varmış", "Su həyatdır", "Zanbaq-şəhərlər bəşəriyyəti ümumdünya tufanından qoruyacaq", "Hollandiyalı Praqanı təpəsi üstə fırladır", "Səhraya baxan ölüm ulduzu", "Əsaslı təmizlik işləri", "Genlər dəyişilməzdirmi?", "Mürgülə ki, yaddaşın möhkəm olsun", "Uzaq keçmişin izləri" və s. yazılar oxucunu canlı mənbə-ənənəvi oxu qaydası olan kitab-jurnalla üz-üzə qoyur. İndi internetdən məlumat almaq daha çox dəbdə olsa da, mütaliə, ünsiyyətin kitab forması daha etibarlı və daha ciddi yöndür. Çünki kitab-jurnal tipli oxuda oxucu dönə-dönə mövzu, materialla üz-üzə qala bilir.

Jurnalın yaradıcı heyətinə uğurlar diləyirik

Elçin Qaliboğlu

Xalq Cəbhəsi.- 2009.- 12 noyabr.- S.14.