"Samirin vəsiyyəti"

Milli Qəhrəman Samir Xasıyevin döyüş yolu barədə çəkilmiş sənədli film belə adlanır

Ötən həftənin şənbə günü Hökumət Evində şəhid, Milli Qəhrəman Samir Xasıyevin həyat və döyüş yoluna həsr olunmuş, millət vəkili Qənirə Paşayevanın təşəbbüsü və yaxından dəstəyi ilə hazırlanmış "Samirin vəsiyyəti" adlı sənədli filmin təqdimat mərasimi keçirilib. Mərasimdə Milli Qəhrəmanın ailə üzvləri, yaxın qohumları, döyüş yoldaşları, tanınmış ziyalılar, millət vəkilləri iştirak ediblər.

Tədbirin aparıcısı tanınmış tele-jurnalist İlhamiyyə Rzayevanın bildirdiyinə görə, qəhrəmanlar yalnız o zaman ölürlər ki, unudulurlar: "Tez-tez belə bir məşhur deyimi dilə gətiririk ki, qəhrəmanlar ölmürlər, unudulmurlar. Bu deyimin özü kifayət qədər mübahisəlidir. Qəhrəmanlar düşmən gülləsindən ölmürlər, onlar yalnız unudulanda ölürlər. Bu baxımdan onu xüsusilə vurğulamaq istərdim ki, indi məhz bu cür tədbirlərin keçirilməsi, filmlərin çəkilməsi, nümayiş etdirilməsi dünyadan köçmüş qəhrəmanlarımıza yeni həyat vermək, onların ömrünün uzadılması deməkdir".

Millət vəkili Qənirə Paşayevanın sözlərinə görə, bu film, əslində, ona görə hazırlanıb araya-ərsəyə gətirilməyib ki, haqqında söz açılan şəhid onun yaxın qohumu, sirdaşıdır: "Bu filmin hazırlanması zərurəti ondan irəli gəlib ki, Samir Azərbaycanın Milli Qəhrəmanı, vətən yolunda canını qurban vermiş şəhidlərdən biridir. Eyni zamanda, bu film ona görə hazırlanmayıb ki, o, Samirin özünə lazımdır. Samir onsuz da vətəni, xalqı üçün canını əsirgəməyib. Dünyada insan üçün ən qiymətli və ən əziz olan canını torpağı, dövləti, vətəni üçün verib. O, öz qanı, öz canı ilə adını vətən torpaqlarına, tarixinə yazıb, həkk edib. Bu film müəyyən mənada Samirin valideynləri üçün də böyük önəm daşımır. Çünki onlar elə bir övlad yetişdiriblər ki, bu, heç də hər bir ata-anaya qismət olan məsələ deyil. Bununla yanaşı, hər ana, hər ata övladını da vətən yolunda qurban verə bilmir. Bu, böyüklükdür ki, məhz onlar öz övladlarını vətən yolunda qurban veriblər. O vaxt bir çoxları - xüsusilə imkanlı şəxslər- övladlarını müharibəyə, ön cəbhəyə göndərməməkdən ötrü müxtəlif vasitələrə əl atırdılar. Müxtəlif yollarla övladlarını müharibədən yayındırmağa çalışırdılar. Bunu Samirin də valideynləri edə bilərdi. Onların imkanları heç də digərlərindən az deyildi, ancaq onlar bunu etmədilər. Onlar övladlarının müharibəyə, ön cəbhəyə getmək qərarına hörmətlə, sayğıyla yanaşdılar, bu işə xeyir-dua verdilər. Yəni bu, ata-ana kimi onların vətəndaşlığını, böyüklüyünü göstərir. Bu film, sadəcə, ona görə araya-ərsəyə gətirilib ki, o, bizim bugünümüzə və gələcəyimizə lazımdır. Bu film bizim bugünükü və gələcək nəsillərimizə gərəkdir. Bizim gənclərimiz görməli, bilməlidirlər ki, insan hansı dəyərlərlə yaşamalıdır. Gənclərimiz onlara örnək olacaq vətən övladlarını, şəhidlərimizi, milli qəhrəmanlarımızı tanımalı, onlardan nümunə götürməli, onlar kimi vətənin, torpağın keşiyini çəkməyə cani-dildən hazır olmalıdırlar. Bax, bu film məhz bu zərurətdən irəli gəlib, bu məqsədlə hazırlanıb, araya-ərsəyə gətirilib". Qənirə Paşayevanın çıxışından sonra sözügedən sənədli film nümayiş etdirilib.

Qeyd edək ki, Samir Xasıyev 1973-cü il aprelin 23-də Bakı şəhərində, ziyalı ailəsində anadan olub. Məktəbi bitirdikdən sonra BDU-nun tarix fakültəsinə qəbul olunan Samir Xasıyev həmin vaxt hərbi borcunu yerinə yetirmək üçün könüllü ordu sıralarına gedib, öz ərizəsi ilə cəbhə bölgəsinə göndərilib. 1994-cü ilin əvvəllərindən döyüş yolu başlayan Samir Xasıyev Ağdam, Ağdərə, Tərtər istiqamətlərində gedən ağır döyüşlərdə iştirak edib, çoxlu qəhrəmanlıq nümunələri göstərib. Döyüşlərdə bir neçə dəfə yaralanmasına baxmayaraq, o, sağaldıqdan sonra yenidən döyüş bölgəsinə qayıdıb. Samir Xasıyev göstərdiyi qəhrəmanlıqlara görə dəfələrlə medallar, mükafatlar və fəxri fərmanlarla təltif olunub. İki aylıq zabit kursunu əla qiymətlərlə bitirkdikdən sonra artıq leytenant rütbəsində döyüş bölgəsinə qayıdan Samir Xasıyev yenidən torpaqlarımızın düşmən işğalından xilas olunmasında iştirak edib. 1994-cü ildə Samir Gəncəyə ezam olunub. Burada xidmət etdiyi zaman, o, dövlət çevrilişi cəhdinin qarşısının alınmasında göstərdiyi igidliyə görə medalla təltif olunub. 1995-ci ilin martında Azərbaycanda dövlət çevrilişinə cəhdin qarşısının alınmasında iştirak edən Samir Xasıyev Azərbaycan dövlətçiliyinin qorunması məqsədilə aparılan hərbi əməliyyatlar zamanı həlak olub. Ölümündən cəmi bir neçə gün sonra vətən və dövlət qarşısındakı xidmətləri yüksək qiymətləndirilən Samir Xasıyev prezidentin fərmanıyla "Azərbaycanın Milli Qəhrəmanı" adına layiq görülüb.

Sonra tədbirdə millət vəkilləri Aqil Abbas, Aynur Quliyeva, Həvva Məmmədova, İlham Məmmədov, ombudsman Elmira Süleymanova və digər şəxslər çıxış ediblər.

Səlcuq

Xalq Cəbhəsi.- 2009.- 24 noyabr.- S.9.