Səhnəmizin Nargiləsi, Natəvanı, Tomrisi...

Onu səhnəmizin Nargiləsi, Natəvanı, Tomrisi də adlandırmaq olar. Çünki tanınmış sənətkar Amaliya Pənahovanın 45 illik səhnə fəaliyyəti zamanı canlandırdığı xaraktercə fərqli, bənzərsiz qadın obrazları arasında bu üçünü Azərbaycan tamaşaçısı daha çox xatırlayır və sevir. Nargilənin məsumluğu, Tomrisin cəsarəti və döyüşkənliyi, Natəvanın vətənpərvər obrazı aktrisanın ifasında daha canlı, təbii və real alınır.

Bu yaxınlarda Amaliya Pənahovanın 45 illik səhnə fəaliyyətinə, onun yaradıcılığının görünməyən məqamlarına işıq salan “Böyük istedadın çalarları” adlı kitab işıq üzü görüb.

Filologiya elmləri doktoru, professor Gülrux Əlibəylinin müəllifi olduğu kitab rəngli tərtibatda ingilis və rus dillərində oxuculara təqdim edilib. Kitaba ön sözü tanınmış jurnalist Nadejda İsmayılova yazıb. Yazıçılar Birliyində baş tutan təqdimat mərasiminə toplaşan ziyalılar, yaradıcı insanlar tanınmış sənətkar, Bakı Bələdiyyə Teatrının direktoru və bədii rəhbəri Amaliya Pənahovanın yaradıcılığına nəzər salıb, ürək sözlərini bildirdilər. Tədbiri açıq elan edən Yazıçılar Birliyinin sədri, xalq yazıçısı Anar Amaliya xanımın yaradıcılığına yüksək qiymət verildiyini bildirdi və kitabın işıq üzü görməsi münasibətilə aktrisanı təbrik etdi.

Aktrisa kitabla bağlı sevincini bu cür bölüşdü: – Bu kitabın özəlliyi ondan ibarətdir ki, burada müəllif oxucuları sənətimlə, ictimai fəaliyyətimlə, eləcə də ailə həyatımla daha yaxından tanış edir. Gülrux xanım bu kitabı hazırlayarkən mövzuya fəlsəfi yanaşıb. Hər fəslin başlanğıcında tanınmış dünya mütəfəkkirlərindən müxtəlif sitatlar verib. Burada mənim yaradıcılıq fəaliyyətim dövründə oynadığım rollarla bağlı yazılar, məqalələr, eləcə də müxtəlif illəri əhatə edən fotolar yer alıb.

Kitabın müəllifi G.Əlibəyli isə Amaliya xanımın yaradıcılığını həmişə maraqla izlədiyini, onu tanınmış yunan aktrisası Aspasiya Papatanaiuya bənzətdiyini söylədi. Tanınmış incəsənət xadimi, Teatr Xadimləri İttifaqının sədri, rejissor Azərpaşa Nemətov onun Azərbaycan teatr səhnəsində və kinoda oynadığı müxtəlif rollarla tamaşaçı məhəbbəti qazandığına toxundu və pedaqoq kimi fəaliyyətini yüksək qiymətləndirdi. O, bildirdi ki, sözügedən kitab əcnəbi dillərdə olduğundan, təkcə Azərbaycanda deyil, ölkəmizdən kənarda da özünə yer tapacaq. Tanınmış yazıçı, dramaturq Aqşin Babayev çıxışında kitabın elmi səviyyədə yazıldığını, aktrisanın sənətkarlıq xüsusiyyətlərinin peşəkarlıqla təsvir olunduğunu bildirdi. O, kitabı “sənətkarın həyat salnaməsi” adlandırdı.

Tədbirdə çıxış edən aktyor, xalq artisti Rafiq Əzimov, bəstəkar Firəngiz Qasımova, millət vəkili, publisist Elmira Axundova və digər qonaqlar aktrisanın yaradıcılığı haqqında öz fikirlərini bölüşdülər və ona bundan sonrakı fəaliyyətində daha böyük yaradıcılıq uğurları arzuladılar.

Əfsanə BAYRAMQIZI

Xalq qəzeti.- 2010.- 4 aprel.- S. 6.