Dünya uşaqları
Bakıda ekoloji layihələr irəli sürdülər
Aprelin 7-dən Azərbaycan paytaxtında start
götürən Ətraf Mühitin Mühafizəsi IV Beynəlxalq
Layihə Olimpiadası (İNEPO — Avrasiya) Bakı Əl
Oyunları Sarayında keçirilən təntənəli mərasimlə
başa çatdı. “Çağ” Öyrətim Şirkətinin
təşkilatçılığı, Təhsil, Ekologiya və
Təbii Sərvətlər nazirliklərinin, Dövlət Neft
və İctimai Teleradio Yayımları şirkətlərinin
dəstəyi ilə keçirilən dünya məktəblilərinin
ekoloji layihə yarışmasında ölkəmizin təmsilçiləri
37 medaldan 15-ni qazandılar.
33 ölkədən
300-dək məktəblinin qoşulduğu beynəlxalq layihə
olimpiadasının yekun mərhələsində 97 məktəblinin
təqdim etdiyi layihələrə Əl Oyunları
Sarayının geniş salonunda on minlərlə təbiətsevər
tamaşa etmiş, uşaqların ətraf mühitin mühafizəsi
ilə bağlı cəsarətli ideya və təklifləri
ilə maraqla tanış olmuşlar. Müxtəlif ölkələrin
ekoloq mütəxəssislərindən ibarət nüfuzlu
münsiflər heyəti məktəbli layihələrini diqqətlə
nəzərdən keçirmiş, ən yaxşı işləri
medallara layiq görmüşlər. Ümumiyyətlə,
yekun mərhələdə nümayiş etdirilmək
hüququ qazanmış layihələr elmi-təcrübi dəyərinə
görə yüksək qiymətləndirilmiş və
mükafatlandırılmışdır.
Olimpiadanın təntənəli
bağlanışına və qaliblərin təltif
olunmasına həsr olunmuş mərasimə dövlət və
hökumət rəsmiləri, millət vəkilləri,
tanınmış elm və mədəniyyət adamları,
ekoloji hərəkat fəalları, məktəblilərin
müəllimləri və valideynləri
toplaşmışdılar. Azərbaycanın dövlət
himni səsləndirildikdən sonra “Çağ” Öyrətim
Şirkətinin prezidenti Ənvər Özərən
iştirakçıları salamladı və
dördüncü dəfə Bakıda keçirilən məktəblilərin
beynəlxalq ekoloji layihə yarışması barədə məlumat
verdi.
Təhsil naziri Misir Mərdanov
uğurla başa çatan növbəti beynəlxalq
olimpiadanın ölkəmizin təhsil həyatında
mühüm və yaddaqalan hadisə olduğunu söylədi,
bu yarışmanı Azərbaycan Prezidenti İlham Əliyevin
ölkəmizdə elan etdiyi “Ekologiya ili”nə layiqli töhfə
kimi dəyərləndirdi. Nazir qalibləri səmimi təbrik
etdi, olimpiadanı ərsəyə gətirənlərə təşəkkürünü
bildirdi.
Türkiyənin Azərbaycandakı
səfiri Hulusi Kılıc iki qardaş ölkənin təhsil
işçilərinin növbəti layihəsi olan
olimpiadanın yüksək nəticələrindən məmnun
qaldığını söylədi, müəllimlərimizə
və onların yetirmələrinə yeni uğurlar
arzuladı.
Millət vəkilləri
Yaqub Mahmudov, Qənirə Paşayeva, BDU-nun professoru Şahlar Əsgərov,
Türkiyə səfirliyinin təhsil müşaviri Halis
Koyunçuoğlu və digər natiqlər də qalibləri
təbrik etdilər, olimpiadanın ətraf mühitin
mühafizəsi kimi qlobal hərəkata məktəblilərin
əməli töhfəsi olduğunu vurğuladılar. Yarışmanın
təşkilatçısı və hamisi olmuş
qurumların rəhbərləri, nüfuzlu rəsmilər və
ziyalılar mükafatları təntənəli surətdə
qalib məktəblilərə təqdim etdilər.
Təşkilat Komitəsinin
sədri, Azərbaycan—Türkiyə Özəl Liseyləri
Baş İdarəsinin rəisi Arif Gömləksiz qəzetimiz
üçün müsahibəsində bildirdi:
— İldən-ilə
aktuallaşan və kəskinləşən ekoloji problemlərə
şagirdlərimizin diqqətini cəlb etmək, onları ətraf
mühitin tarazlığını təmin edə biləcək
vətəndaşlar kimi yetişdirmək, ölkə və
dünya məktəblilərinin bu hərəkatda fəallığına
və əməkdaşlığına nail olmaq
üçün 4 ildir ki, Bakıda beynəlxalq məktəbli
olimpiadası təşkil edirik. Ötən illərdə əldə
etdiyimiz təcrübə, beynəlxalq fənn
olimpiadalarında qazandığımız uğurlar imkan verdi
ki, dördüncü yarışmanı da yüksək səviyyədə
həyata keçirək.
Yekun mərhələdə
iştirak edən 97 şagirdin 45-i Azərbaycan məktəblisi
idi. Sevindirici haldır ki, 37 medalın 16-nı onlar
qazandılar. Olimpiadada bizim liseylərin şagirdləri daha fəal
iştirak etdilər. Bu dəfə ölkəmiz üzrə
qazanılan 5 qızıl medaldan 2-ni, 4 gümüşdən
də 2-ni, 6 bürüncdən isə 1-ni “Çağ” məktəbliləri
qazandılar. Bununla, liseylərimizin yetirmələrinin beynəlxalq
bilik və bacarıq yarışmalarında qazandıqları
medalların sayı — qızıllar 77-yə,
gümüşlər 119-a, bürünclər isə 167-yə
çatdı.
Beynəlxalq yarışmanın yüksək səviyyədə keçirilməsinə göstərdikləri dəstəyə görə Təhsil Nazirliyinə və digər hamilərə dərin təşəkkürümüzü bildiririk. Sonda onu deyim ki, dünyanın müxtəlif qitələrini təmsil edən 33 ölkənin məktəbliləri Bakıda olduqları 5 gündə ölkəmiz barədə bir çox zəruri məlumatlar aldılar, vətənlərinə Azərbaycan barədə xoş təəssürat apardılar. Qarşımıza qoyduğumuz bütün hədəflərə nail olduq.
Tahir AYDINOĞLU
Xalq qəzeti.- 2010.- 14 aprel.- S. 4.