Qaxda “Ekologiya ili” çərçivəsində işlər canlanmaqdadır

Respublikamızın hər yerində olduğu kimi Qaxda da tikinti-quruculuq, abadlıq işlərinin daha da genişləndirilməsi üçün müəyyən tədbirlər görülür. Aprelin 16-da rayon icra hakimiyyətində idarə və müəssisə rəhbərlərinin, YAP rayon təşkilatının fəallarının iştirakı ilə keçirilən müşavirə də məhz bu sahədə qarşıda duran vəzifələrin həllinə xidmət edirdi.

Müşavirədə rayon icra hakimiyyətinin başçısı Musa Şəkiliyev respublikamızda gedən quruculuq işlərinin ahənginə uyğun olaraq rayonun sosial-iqtisadi inkişafı, tikinti-abadlıq işləri ilə bağlı qarşıda duran vəzifələri təhlil etdi. Qeyd etdi ki, Azərbaycan Respublikasının Prezidenti İlham Əliyevin tapşırığına əsasən bu gün digər bölgələrdə olduğu kimi, Qaxda da əhalinin rifah halının yüksəldilməsi üçün yeni iş yerlərinin açılması, sahibkarlıq fəaliyyətinin genişləndirilməsi, kənd təsərrüfatının, emal sənayesinin dirçəldilməsi, adamları narahat edən digər bir sıra sosial problemlərin həlli ilə bağlı müəyyən layihələrin həyata keçirilməsi planlaşdırılmışdır. Bütün bunlar dövlətimizin dəstəyi və özəl sektorun inkişaf etdirilməsi ilə mərhələ-mərhələ öz həllini tapacaqdır. Lakin tezliklə həllini gözləyən bir çox məsələlər vardır ki, gərək bu məsələləri idarə, müəssisə kollektivləri və ictimaiyyətin qüvvəsilə qısa müddətə həll edək. Xüsusilə “Ekologiya ili” çərçivəsində başlanmış işləri sürətləndirməli, yaşayış yerlərində, rayondaxili və magistral yolların kənarlarında, şəhərin küçə və meydanlarında, şəhərətrafı ərazilərdə səliqə-sahman yaratmalı, yaşıllaşdırma işlərini başa çatdırmalıyıq.

Müşavirədə qərara alındı ki, rayonun ərazisində nümunəvi səliqə-sahman yaradılanadək hər həftənin şənbə, bazar günləri ümumrayon iməcilikləri keçirilsin.

Müşavirənin yekunlarına uyğun olaraq, aprelin 17-də keçirilən iməcilikdə idarə, müəssisə rəhbərləri, YAP rayon təşkilatının fəalları da daxil olmaqla 2000 nəfərə yaxın rayon sakini tərəfindən 1300 ədəd ağac əkildi, küçələrdəki, yol kənarlarındakı minlərlə ağaca qulluq edildi, ağardıldı, su arxları təmizləndi, məişət tullantıları götürüldü. İməcilik günü xüsusilə Qax-Güllük, Qax-Pavilyon yollarının, rayonun ərazisindən keçən Xaldan-Balakən magistral yolunun ətrafında nümunəvi səliqə-sahman yaradıldı. Həmçinin həmin gün şəhərin S.Vurğun, M.Məmmədov, Ü.Hacıbəyov, Vidadi, A.Məmmədov küçələrində sıradan çıxmış asfalt örtüyünün təmirinə başlandı.

Qax bələdiyyəsinin sədri Eyvaz Orucovun verdiyi məlumata görə, növbəti həftələrdə də iməciliklər davam etdirilməklə rayon ərazisində abadlıq işləri aparılacaqdır. Eyni zamanda Azərbaycan Respublikasının Prezidenti İlham Əliyevin Nazirlər Kabinetinin 2010-cu ilin birinci rübünün sosial-iqtisadi inkişafının yekunlarına həsr olunmuş iclasında verdiyi tapşırığa əsasən, şəhərdə uyğunsuz, şəhərin arxitekturasına, nəqliyyatın təhlükəsizliyinə xələl gətirən su, qaz xətlərinin mövcud standartlara uyğun şəkildə çəkilməsi də təmin ediləcəkdir.

İlqar MUSAOĞLU,

“Xalq qəzeti”nin bölgə müxbiri

Xalq qəzeti.- 2010.- 18 aprel.- S. 5.