Nərimanov rayonunda cari ilin ilk rübünün yekunları təhlil olunmuşdur

Son illər Azərbaycanın sosial-iqtisadi inkişaf sahəsində əldə olunmuş uğurlar 2010-cu ilin birinci rübündə də davam etmiş, ölkəmizdə ümumi daxili məhsul 5,4 faiz, sənaye 5,6 faiz, qeyri-neft sektoru 2,8 faiz, kənd təsərrüfatı istehsalı isə 1,5 faiz artmışdır. Aprelin 14-də Azərbaycan Respublikasının Prezidenti İlham Əliyevin sədrliyi ilə Nazirlər Kabinetinin cari ilin ilk rübünün sosial-iqtisadi inkişafının yekunlarına həsr olunmuş iclasında bütün bunlar barədə ətraflı danışılmış, qazanılmış uğurlar yüksək qiymətləndirilmişdir. Hazırda ölkəmizin bütün şəhər və rayonlarında 2010-cu ilin birinci rübünün sosial-iqtisadi mənzərəsi geniş təhlil olunur, Nazirlər Kabinetinin məlum iclasında dövlət başçısının proqram xarakterli nitqindən irəli gələn məsələlərin icrası istiqamətində konkret vəzifələr müəyyənləşdirilir.

Dünən Nərimanov Rayon İcra Hakimiyyəti başçısı yanında şuranın iclasında 2010-cu ilin birinci rübündə rayonun sosial-iqtisadi inkişafının yekunları geniş müzakirə edildi, qarşıda duran vəzifələr müəyyənləşdirildi.

Tədbir iştirakçıları öncə ümummilli lider Heydər Əliyevin rayon icra hakimiyyəti binasının foyesindəki büstü önünə gül dəstələri qoydular, ulu öndərin əziz xatirəsini ehtiramla yad etdilər. Rayon fəallarının, idarə, müəssisə və təşkilatların, hüquq-mühafizə orqanları rəhbərliklərinin iştirakı ilə keçirilən yığıncağı giriş sözü ilə Nərimanov Rayon İcra Hakimiyyətinin başçısı Abdin Fərzəliyev açdı. Ölkənin davamlı inkişaf prosesində paytaxtın Nərimanov rayonunun da mühüm rol oynadığını bildirən natiq diqqəti 2010-cu ilin birinci rübündə əldə olunmuş uğurlara yönəltdi. Qeyd olundu ki, cari ilin yanvar-mart aylarında rayon iqtisadiyyatının əsasını təşkil edən sənayenin dinamik inkişafı davam etdirilmiş və bu müddət ərzində xidmətlər də daxil olmaqla 36,1 milyon manatlıq məhsul istehsal olunmuşdur. Sənaye məhsulunun ümumi həcmində qeyri-dövlət sektorunun xüsusi çəkisi 77 faizə çatmışdır. İlin əvvəlindən sənaye müəssisələrində işləyənlərin sayı 6745 nəfər, onların orta nominal əmək haqları isə 11,4 faiz artaraq 293,1 manat təşkil etmişdir. Ötən üç ayda rayonda yeni iş yerlərinin açılması ilə bağlı işlər davam etdirilmiş, rüb ərzində 701 daimi iş yeri yaradılmışdır.

Cari ilin ilk rübündə rayon üzrə əsas kapitala ümumi investisiya qoyuluşunun 9,6 milyon manat təşkil etdiyini və bunun 2009-cu ilin müvafiq dövrünə nisbətən 36 faiz çox olduğunu bildirən natiq rayonun tikinti sektorunda da yüksək göstəricilər əldə edildiyini diqqətə çatdırdı. Qeyd olundu ki, hesabat dövründə rayonun tikinti təşkilatları tərəfindən öz gücləri ilə yerinə yetirilmiş işin həcmi 46,6 milyon manat təşkil etmişdir. Rüb ərzində tikinti təşkilatlarında çalışan işçilərin sayı 6514 nəfər olmuş, onların orta aylıq əmək haqları 457 min manata çatmışdır.

Natiq iqtisadiyyatın başqa sahələrində olduğu kimi, əhalinin həyat səviyyəsini xarakterizə edən əsas göstəricilərdən olan pullu xidmətlərin də həcminin xeyli artaraq 40,9 milyon təşkil etdiyini, rayon ərazisində fəaliyyət göstərən ticarət müəssisələri üzrə əmtəə dövriyyəsinin 152,1 milyon manat, ictimai iaşənin əmtəə dövriyyəsinin isə 4,8 milyon manat olduğunu diqqətə çatdırdı.

A.Fərzəliyev əvvəlki dövrlərdə olduğu kimi, cari ilin ötən aylarında da Nərimanov rayonunda çox mühüm sosial və digər infrastruktur layihələrinin həyata keçirildiyini, bir sıra obyektlərin rəsmi açılış mərasimlərində ölkə Prezidenti İlham Əliyevin şəxsən iştirak etdiyini bildirdi. Natiq qeyd etdi ki, son zamanlar Heydər Əliyev Fondunun təşəbbüsü və bilavasitə maliyyə dəstəyi ilə rayon ərazisində mühüm sosial əhəmiyyətli layihələr həyata keçirilmişdir. Həmin layihələrin davamı olaraq 5 saylı şəhər kliniki xəstəxanasının yaxınlığında yeni məktəb binasının inşasına başlanılmış, Aşıq Molla Cümə küçəsində daun sindromlu xəstələr üçün mərkəzin inşası nəzərdə tutulmuşdur.

Məruzəçi daha sonra rayon ərazisində həyata keçirilən abadlıq-quruculuq tədbirlərindən, kommunal sektorda görülən işlərdən bəhs etdi. Qeyd olundu ki, əvvəlki dövrlərdə olduğu kimi, cari ilin birinci rübündə də sakinlərin elektrik enerjisi, qaz və içməli su ilə etibarlı şəkildə təminatı diqqət mərkəzində saxlanılmışdır.

Məlum olduğu kimi, ölkə Prezidenti İlham Əliyev 2010-cu ili Azərbaycanda “Ekologiya ili” elan etmiş, ətraf mühitin sağlamlaşdırılması, ekoloji tarazlığın qorunması ilə bağlı icra strukturlarına mühüm tapşırıqlar vermişdir. Bu məqsədlə Nərimanov rayonunda da mühüm işlər görülmüş, idarə, müəssisə və təşkilat kollektivlərinin, eləcə də rayon sakinlərinin iştirakı ilə geniş ağacəkmə kampaniyası həyata keçirilmişdir.

Məruzəçi həmçinin bildirdi ki, Nazirlər Kabinetinin iclasında dövlət başçısı İlham Əliyev əhalinin sağlamlığının qorunması məsələsinə böyük önəm verərək istehlak mallarının keyfiyyətinin aşağı olması ilə bağlı narahatlığını ifadə etdi və bu cür halların qarşısının alınmasına nəzarətin gücləndirilməsi barədə tapşırıq və göstəriş vermişdir. Məhz bu cür hallarla mübarizə tədbirlərini gücləndirmək məqsədilə rayon icra hakimiyyəti tərəfindən müvafiq komissiya yaradılmışdır. Həmin komissiya isə rayon ərazisində keyfiyyətsiz məhsulların istehsalına və satışına ictimai nəzarəti həyata keçirəcəkdir.

Natiq əhalinin sosial müdafiəsinin gücləndirilməsi, onların həyat səviyyəsinin yaxşılaşdırılması istiqamətində görülən işlərdən, eləcə də rayonun sosial-iqtisadi həyatının digər sahələrində həyata keçirilən tədbirlərdən bəhs etdi. Bundan əlavə, məruzəçi ölkəmizin gələcəyi üçün mühüm əhəmiyyət daşıyan növbəti parlament seçkilərinə hazırlıqla bağlı Nərimanov rayonunda aparılan məqsədyönlü işlərə toxundu, hamını bu vacib tədbirdə fəal iştiraka səslədi.

Nərimanov Rayon İcra Hakimiyyəti başçısı yanında şuranın iclasında çıxış edən natiqlər təmsil etdikləri sahələrin işi ilə bağlı hesabat verdilər, Prezident İlham Əliyevin müəyyənləşdirdiyi sosial-iqtisadi strategiyanın yerinə yetirilməsi istiqamətində bundan sonra da səylə çalışacaqlarını bildirdilər.

Tədbirə yekun vuran icra hakimiyyətinin başçısı Abdin Fərzəliyev rayonun daha da abadlaşdırılması, əhalinin rahat və firavan yaşaması üçün tədbirlərin bundan sonra da davam etdiriləcəyini, Prezident İlham Əliyevin qarşıya qoyduğu vəzifələri yerinə yetirmək üçün böyük məsuliyyətlə çalışacaqlarını bildirdi, 2010-cu ildə Nərimanov rayonunun sosial-iqtisadi inkişafının təmin olunması üçün bütün tədbirlərin həyata keçiriləcəyini bəyan etdi.

Mirbağır YAQUBZADƏ

Xalq qəzeti.- 2010.- 21 aprel.- S. 5.