İddia hüququn qanunla qorunan müdafiə vasitəsidir
“Hüquq ədəbiyyatı” nəşriyyatında
Ural Dövlət Hüquq Akademiyasının məzunu, Azərbaycan
Respublikası Ədliyyə Nazirliyi Məhkəmə
İcraçıları Baş İdarəsinin tabeliyində
olan xidmətdə çalışan Taleh Bayramovun hazırladığı
“İddia ərizələri: sənədlərin nümunələri
və komentariyaları” adlı kitabı çap olunmuşdur.
On çap vərəqi
həcmində nəşr edilən bu kitab son dəyişikliklər
nəzərə alınmaqla müasir prosesual mülki, əmək,
ailə və qanunvericiliyinin digər sahələri əsasında
hazırlanmışdır. Kitabda iddia, ailə-nikah mübahisələri,
mülki hüquq pozuntuları, əmək mübahisələri,
vətəndaşın işgüzar nüfuzunun, şərəf
və ləyaqətinin müdafiəsi mübahisələri,
mənzil mübahisələri, öhdəliklərin icra edilməməsindən
irəli gələn mübahisələr haqqında məlumatlar
açıqlanır, müxtəlif həlli vacib məsələlərlə
bağlı müraciət formaları, ərizə nümunələri
verilir.
BDU-nun mülki proses, əmək
və ekologiya hüququ kafedrasının professoru, hüquq
elmləri doktoru Mayis Əliyev nəşrə
yazdığı rəydə kitabın məziyyətlərini
göstərməklə onun əhəmiyyətini qiymətləndirir
və hüquqşünasların sənədləri
hazırlayarkən qarşılaşdıqları bəzi
çətinliklərin həlli məsələsinə
böyük önəm verir. O qeyd edir ki, “respublikamızda
formalaşmış hüquq təqdimetmə praktikası
göstərir ki, yüksək bəşəri nəzəri
biliklərə malik olan və qanunvericiliyi mükəmməl
şəkildə mənimsəmiş peşəkar
hüquqşünaslar konkret hüquqi sənədlərin tərtib
edilməsində problemlərlə rastlaşırlar. Buna əsas
səbəb kimi qüvvədə olan qanunvericilikdə
ayrı-ayrı sənəd nümunələrinin, o cümlədən
prosessual sənədlərin nümunələrinin dəqiq
şəkildə tətbiq edilməməsini göstərmək
olar. Bu baxımdan “İddia ərizələri: sənədlərin
nümunələri və komentariyaları” kitabı mövcud
problemlərin aradan qaldırılmasında mühüm rol
oynaya bilər”.
Kitabda toplanmış
komentariyalarda iddianın rolu, pozulmuş hüququn və yaxud
qanunla qorunan maraqların qanuni müdafiə vasitəsi kimi
izah olunur. Burada mübahisələrin və məhkəmə
aidiyyatının, iddia ərizələrinin tərtib
olunmasının, dövlət rüsumunun ödənilməsi
qaydası və məhkəməyə müraciətlər
barədə digər praktiki qaydalar öz əksini
tapmışdır.
Ümumi məhkəmələrdə baxılan mübahisələrə aid 36 sənədin nümunəsi də oxuculara təqdim olunur. Müəllif qeyd edir ki, hər bir şəxs doğulduğu andan toxunulmaz, pozulmaz hüququnun olduğunu bilməlidir. “...Bütün fiziki və hüquqi şəxslər özlərinin qanunla qorunan hüquq və azadlıqlarını, eləcə də maraqlarını qorumaq və təmin etmək məqsədilə qanunla müəyyən edilmiş qaydada məhkəmə müdafiəsindən istifadə etmək hüququna malikdirlər”. Müəllif daha sonra bildirir ki, məhkəməyə müraciət olunanda fiziki və hüquqi şəxslər tərəfindən məhkəməyə təqdim edilən ərizələrin tərtibatından çox şey asılıdır. Bəzən insanlar məlumatsız olduqlarından, iddia ərizələrini qeyri-müəyyən formada tərtib edib məhkəmələrə təqdim edirlər. Əslində, məhkəməyə təqdim olunmuş hər bir sənəd qanunvericilikdə nəzərdə tutulmuş qaydada tərtib olunmalıdır. Məhkəmədə işin başlanmasının əsasını qoyan fiziki və hüquqi şəxslər tərəfindən yazılmış iddia ərizələri qanuni şəkildə, sübutlara söykənərək qanunların müddəalarına əsaslanmaqla yazılmalıdır.
Taleh Bayramovun bu kitabı Konstitusiya ilə Azərbaycan vətəndaşlarına verilmiş ayrılmaz hüquqların müdafiəsi üçün hər birimizə yaxından kömək olacaq. Kitab hüquqşünaslar, həmçinin, məhkəmədə pozulmuş hüquqlarının və qanuni maraqlarının müdafiəsi məqsədilə hər kəs üçün nəzərdə tutulmuşdur.
Z. BƏŞİRQIZI
Xalq qəzeti.- 2010.- 22 aprel.- S. 7.