Sumqayıt: I rübün yekunları nikbinlik yaradır

Cari ilin start rübündə Sumqayıtda sosial-iqtisadi inkişaf göstəriciləri xeyli yüksək olub. Burada möhkəm təməl üzərində qurulan inkişaf konsepsiyasının planauyğun icrası sayəsində infrastruktur layihələri, tərəqqi proqramları ardıcıl həyata keçirilir, şəhər sakinlərinin rifahı yaxşılaşır.

İlin lik üç ayında şəhər üzrə ümumi məhsul buraxılışı ötən ilin müvafiq dövrü ilə müqayisədə iki dəfə artaraq 135 milyon manata çatıb. Bu nailiyyətdə qeyri-dövlət sektorunun payı 60 faizə enib. Başqa sözlə desək, 20 faiz azalıb. Böyük artım əsasən Sumqayıt Elektrik Stansiyasının işə salınması və kimya məhsulları istehsalının qismən bərpası ilə əlaqədardır. Bunun müqabilində isə özəl bölmədə nəzərəçarpan sıçrayış olmayıb. Şəhər iqtisadiyyatında əhəmiyyətli paya malik olan sənaye sahəsində buraxılan məhsulların həcmi müqayisə edilən dövrə nisbətən 2,5 dəfə çoxalıb və 90 milyon manat təşkil edib. İstehsal olunmuş sənaye məhsullarının əksəriyyəti istehlakçılarına göndərilib.

Rübün yekunlarına həsr olunan yığıncaqda Sumqayıt Şəhər İcra Hakimiyyətinin başçısı Vaqif Əliyev nəticələri hərtərəfli şərh edərək bildirdi ki, hesabat dövründə sosial-iqtisadi sahələrdə çalışan işçilərin orta aylıq əməkhaqqı 13,5 faiz artaraq 260 manat olub. Şəhərdə bütün maliyyə mənbələri hesabına ayrı-ayrı sahələrin inkişafına 20 milyon manat investisiya yönəldilib. Hələ nəzərə alsaq ki, sözügedən uğurlar Sumqayıt alüminium istehsalı sahəsinin, “Superfosfat”, “Aşqarlar” və “Sumqayıt Kompressorları” kimi iri səhmdar cəmiyyətlərinin fəaliyyətini dayandırdığı bir şəraitdə qazanılıb, inkişaf göstəricilərinin necə böyük zəhmət hesabına əldə edildiyi aydınlaşar. Üstəlik, xammal təchizatı və məhsullarının satışı məsələləri həll edilmədiyindən “Azərkimya” Dövlət Şirkətinin zavodları üzrə proqnozlaşdırılan əmtəəlik məhsul istehsalı çox aşağı olub. Əgər istifadə olunmayan potensial da reallaşdırılsa idi, uğurlar daha yüksək olardı. Məruzəçi inamla ifadə etdi ki, Prezident İlham Əliyevin sərəncamı ilə “Azərkimya” Dövlət Şirkətinin Azərbaycan Respublikası Dövlət Neft Şirkətinin tabeliyinə verilməsi kimya və neft-kimya müəssisələrinin fəaliyyətində ciddi dönüş yaradacaq, Sumqayıta yeni ruh, yeni nəfəs verəcək.

Şəhərin digər müəssisələrində vəziyyət ürəkaçan olub. “Azkompozit” şüşə lifli boru istehsalı zavodunda diametri 300-1800 millimetr olan borular, “Bismak” Qida Sənaye Kompleksi MMC-də yeni qənnadı məmulatları istehsal edilib. Burada istehsal həcmi ötən ilin həmin dövrünə nisbətən 4 dəfə artıb. “İntertekstil” və “Xovlu İplik” ASC-də yenidənqurma işləri davam etdirilib.

Sumqayıt Texnoparkının ikinci növbəsində 500 kilovoltluq kabel, qaynar sinkləmə, böyük mexaniki təmir, dəqiq emal, arqon-azot-oksigen, sayğaclar istehsalı zavodlarının tikintisi, plastik boru zavodunun genişləndirilməsi istiqamətində inşaat-quraşdırma işləri aparılmaqdadır.

“Azərbaycan Karton” MMC tərəfindən şəhərdə tamamilə yeni olan bir sahə – kağız emalı zavodunun inşası başa çatdırılıb, avadanlıqlar quraşdırılıb, ilkin məhsul istehsalına başlanılıb. Bu müəssisədə gündəlik 50 ton kağız istehsalı nəzərdə tutulur. Eyni zamanda, “Azərsun Holdinq” tərəfindən gündəlik 170 ton istehsal gücünə malik karton və kağız emalı fabrikinin tikintisi davam etdirilib. Təmizləyici qurğuda çirkab sularının təmizlənməsinə başlanılıb.

Həyata keçirilən tədbirlər nəticəsində hamısı daimi olmaqla 486 yeni iş yeri açılıb. Ümumilikdə isə 2003-cü ildən başlayaraq Sumqayıtda 22 mini daimi olmaqla, 40 minə yaxın yeni iş yeri yaradılıb.

Birinci rüb ərzində şəhərdə geniş miqyaslı abadlıq, quruculuq, yaşıllaşdırma işləri davam etdirilib.

Əhalinin daha sıx məskunlaşdığı yaşayış massivlərində, əsasən də şəhərin mikrorayonlar hissəsindəki yeni parklar, yaşıllıq sahələri, abadlaşdırılmış xiyabanlar sakinlərin istirahəti üçün gözəl imkan yaradıb. Hesabat dövründə 45-ci məhəllədə 14 mərtəbəli binanın, 4-cü mikrorayonda Tarix muzeyinin qarşısında, 17-ci mikrorayonda Qayıbov küçəsinə paralel ərazidə yeni, müasir park və istirahət guşələri yaradılıb. Şəhərdəki fəvvarələrin bir neçəsi müasir qaydada yenidən qurulub.

“Ekologiya ili” çərçivəsində ərazinin yaşıllaşdırılmasına, əkilmiş sahələrə qulluq edilməsinə diqqət daha da artırılıb. Xeyli miqdarda ağac, dekorativ kollar əkilib, yeni qazon örtüyü salınıb. Mənzil istismar sahələrinin ərazilərində xeyli yaşıllaşdırma işləri aparılıb, ərazilər pasportlaşdırılıb, yaşıllıqların qorunmasına və becərilməsinə nəzarət artırılıb.

Dövlət başçımızın birbaşa sərəncamı ilə ayrılan vəsait hesabına görülmüş digər işlərlə yanaşı, şəhər ərazisində müasir konstruksiyalı, axşamlar işıqlandırılan və şəhərə xüsusi gözəllik verən dayanacaqların quraşdırılması işləri başa çatdırılıb.

“Azəriqaz” İstehsalat Birliyi tərəfindən 2010-cu ilə layihələşdirilmiş yeni qaz xətlərinin çəkilişinə başlanılıb. Hazırda 6 istiqamətdə, o cümlədən Çerkassı, Axundov küçələri boyunca, 20 və 21-ci mikrorayonlarda, Corat qəsəbəsində, bağlar massivində diametri 300 millimetr olan yeni magistral qaz xəttinin çəkilişi həyata keçirilməkdədir və artıq 2,5 kilometrə yaxın xətt çəkilib.

Hesabat dövründə şəhərin telefon şəbəkəsinin tam elektronlaşması üçün işlərin icrasına başlanılıb və yaxın zamanlarda başa çatdırılacaq.

Cari ilin birinci rübündə şəhərin təhsil müəssisələrində tədrisin keyfiyyətinin yaxşılaşdırılması istiqamətində bir sıra mühüm işlər görülüb, maddi-texniki baza möhkəmləndirilib. Təhsil Nazirliyi tərəfindən 9-cu və 11-ci sinif şagirdləri üçün təşkil olunmuş sınaq imtahanında şəhər üzrə orta müvəffəqiyyət göstəricisi respublikada birinci olub. Fənn olimpiadalarının mart ayında keçirilmiş respublika mərhələsində şəhər məktəblilərindən 12 nəfəri 1-4-cü yerləri tutublar.

Uşaq və Yeniyetmələrin Yaradıcılıq Mərkəzi və Şahmat məktəbi müasir şəkildə əsaslı təmir və yenidənqurmadan sonra uşaqların istifadəsinə verilib. Hər iki məktəbdənkənar tərbiyə ocağının yeniyetmələrin asudə vaxtlarının mənalı təşkilində müstəsna rolu var. Hazırda 1 nömrəli Uşaq Gənclər İdman Məktəbində müasir olimpiya mərkəzi səviyyəsində yenidənqurma və əsaslı təmir işləri davam etdirilir.

İlin əvvəlindən əhaliyə göstərilən tibb xidmətinin səviyyəsinin yüksəldilməsi sahəsində bir sıra məqsədyönlü tədbirlər həyata keçirilib, maddi-texniki bazanın möhkəmləndirilməsi davam etdirilib. Hazırda Uşaq Xəstəxanasında əsaslı təmir və yenidənqurma işləri aparılmaqla xəstəxananın müasir tibb avadanlığı və inventar təchizatı reallaşdırılır.

İkitərəfli xarici əməkdaşlıq sahəsində böyük təcrübəyə malik olan Sumqayıt çoxtərəfli əməkdaşlıq əlaqələrini genişləndirməkdədir. Eurocities-Avropa Şəhərləri İttifaqı və “Merlər sazişi” təşəbbüsü kimi inkişaf etmiş Avropa şəhərlərini özündə birləşdirən təşkilatlarla tərəfdaşlıq edən Sumqayıtda xarici ekspertlərin iştirakı ilə davamlı energetika üzrə fəaliyyət planı hazırlanır. Bu beynəlxalq layihələrdə Azərbaycandan yeganə şəhər olan Sumqayıt ölkəmizin nüfuzunun dünya miqyasında artırılması sahəsində də xüsusi rol oynamaqdadır.

Yığıncaqda rübün uğurları qeyd edilməklə bərabər, qarşıda duran vəzifələr də müəyyənləşdirildi.

Əli NƏCƏFXANLI

Xalq qəzeti.- 2010.- 22 aprel.- S. 5.